JỌṢUA 22 - BIBLU WIWE LỌ 1923

¹ WHENẸNU wẹ Jọsua ylọ Leubẹninu lẹ, po Gadinu lẹ po, po odá whendo Manassẹ tọn po,

² Bo do hlan yé dọ, Mìwlẹ ko yìn enẹ he Moṣe mẹmẹsi OKLUNỌ tọn degbèna mì lẹpo, bo ko sọ tuntóai hlan ogbè ṣie to enẹ he yẹn ko degbèna mì lẹpo mẹ:

³ mìwlẹ ma ko jó mẹmẹsunnu mìtọn lẹ dai to azán susu helẹ mẹ jẹ egbé he, mì ko yìn asẹ gbèdide OKLUNỌ Jiwheyẹwhe mìtọn tọn

⁴ Dinvie OKLUNỌ Jiwheyẹwhe mìtọn ko na ogbọjẹ hlan mẹmẹsunnu mìtọn lẹ, dile é dọhó hlan mì do: enẹwutu dinvie mì ni lé, bo yì gohò mìtọn lẹ mẹ, bo yì aigba nutindo mìtọn tọn ji, ehe Moṣe mẹmẹsi OKLUNỌ tọn na mì to Jọdani gododọ̃n

⁵ Kiki mì sà yí ayipipa vivẹnunọ ṣokẹdẹ nado basi gbèdide po osén lọ po, he Moṣe mẹmẹsi OKLUNỌ tọn degbèna mì, nado yiwanna OKLUNỌ Jiwheyẹwhe mìtọn, podọ nado nọ Zinzọnlin to aliho etọn lẹpo mẹ, podọ nado yìn gbèdide etọn lẹ, podọ nado sẹbọ ẹ do ogo, podọ nado yí ayiha mìtọn lẹpo, po gbigbọ mìtọn lẹpo po do nọ sèn ẹn.

⁶ Mowẹ Jọsua dona yé, bo kija yé yì yé sọ yì gohò yetọn lẹ kòn.

⁷ Dinvie hlan oda whendo Manassẹ tọn Moṣe ko na ogú to Baṣani mẹ: ṣigba hlan odá awetọ wẹ Jọṣua na to mẹmẹsunnu yetọn lẹ ṣẹnṣẹn to Jọdani gọdodọ̃n hlan whèyìhọ dali. Humọ whenuena Jọsua kija yé yì gohò yetọn lẹ kòn, é dona yé,

⁸ bo dọhó hlan yé, dọmọ, Mì gọ̀yì po adọkun gégé po do gohò mìtọn kòn, po kanlinyìnyìn gégé po, po fataka po, po sika po, po gànvẹ̃ po, po gànyú po, po avọ̀ susu gégé po; mì ni má ogblannu kẹ̀ntọ mìtọn lẹ tọn hẹ mẹmẹsunnu mìtọn lẹ.

⁹ Ovi Leubẹni tọn lẹ po ovi gadi tọn lẹ po po odá whẹ̀ndo Manassẹ tọn po diọkò, bo klan sọn ovi Islaeli tọn lẹ mẹ sọn Ṣilo, he tin to aigba Kanani tọn ji, nado yì aigba Gileadi tọn ji hlan aigba nutindo yetọn tọn ji, fietọn yè hẹn yé tindo, kẹdẹdi gbèdide OKLUNỌ tọn gbọn alọ Moṣe tọn mẹ.

¹⁰ Whenuena yé wá agbègbe Jọdani tọn dali, he tin to aigba Kanani tọn ji, ovi Leubẹni tọn lẹ po ovi Gadi tọn lẹ po po odá whẹ̀ndo Manassẹ tọn po dó agbà de to finẹ to Jọdani dali, agbà daho de nado mọ hlan.

¹¹ Ovi Islaeli tọn lẹ sọ sè dọ, Dayi e go, ovi Leubẹni tọn lẹ po ovi Gadi tọn lẹ po po odá whẹ̀ndo Manassẹ tọn po ko dó agbà de to nukọntitegbe aigba Kanani tọn tọn, to agbègbe Jọdani tọn dali, to ada he tinna ovi Islaeli tọn lẹ.

¹² Whenuena ovi Islaeli tọn lẹ sè e, agùn ovi Islaeli tọn lẹ tọn pete pli yéde dopọ to Ṣilo, nado hẹji yì péhẹ yé nado funawhàn.

¹³ Ovi Islaeli tọn lẹ sọ do omẹ hlan ovi Leubẹni tọn lẹ, podọ hlan ovi Gadi tọn lẹ podọ hlan odá whẹ̀ndo Manassẹ tọn, yì aigba Gileadi tọn ji, Finebasi visunnu Eleazali yẹwhenọ tọn;

¹⁴ po ahọvi ao po po e po, ahọvi dopo sọn owhé otò lẹ de tọn gbè na whẹ̀ndo dopodopo Islaeli tọn lẹ tọn; yé dopodopo yé tọn sọ yín ogán owhé otò yétọn lẹ tọn le tọn to fọtọ̀n Islaeli tọn tọn lẹ ṣẹnṣẹn.

¹⁵ Yé sọ wá ovi Leubẹni tọn lẹ de, po ovi Gadi tọn lẹ po de, po odá whẹ̀ndo Manassẹ tọn po de, to aigba Gileadi tọn ji, yé sọ dọhó hẹ yé, dọmọ,

¹⁶ Le wẹ agùn OKLUNỌ tọn pete dọ, Ylanwiwá tẹ wẹ ehe mì wà do Jiwheyẹwhe Islaeli tọn he, nado diọkò to egbé he sọn hihodo OKLUNỌ mẹ, to enẹ mẹ mi ko dó agbà de na mì, nado ṣiatẹ hẹ OKLUNỌ to egbé he?

¹⁷ Ylanwá Peọli tọn yín pẹvi gbahu na mí, ehe mẹ mí ma ko lè mide wé sọn jẹ egbé he, gãnṣo azònylankan de wá agùn OKLUNỌ tọn pete ji,

¹⁸ dọ mì nọma diọkò yì to egbé he sọn OKLUNỌ hihodo mẹ blo? é na sọ yín, mimọ mì ṣiatẹ to egbé hẹ OKLUNỌ, dọ to osò ewọ na yín homẹgbletọ hẹ agùn Islaeli tọn pete.

¹⁹ Depope, eyín aigba nutindo mìtọn tọn yífi mawé, whenẹnu mì bo juwayì aigba nutindo OKLUNỌ tọn tọn kọ̀n, fìemẹ gohò OKLUNỌ tọn nọnọ̀, bo yí nutindo to mí ṣẹnṣẹn: ṣigba mì ṣiatẹ hẹ OKLUNỌ blo, kavi ṣiatẹ hẹ mìwlẹ blo, to didó agbà de na mì mẹ dogó agbà OKLUNỌ Jiwheyẹwhe mitọn tọn.

²⁰ Akani visunnu Zelahi tọn ma wà ylanwiwa de to onú dodèpa me bọ homegble flẹ jẹ agùn Islaeli tọn pete ji? dawe nẹ dopo ma wẹ dọn to ylanwiwà etọn mẹ gba.

²¹ Whenẹnu wẹ ovi Leubẹni tọn lẹ po ovi Gadi tọn lẹ po po odá whendo Manassẹ tọn po gblọnhó, bo dọhó hlan ogán Islaeli tọn fọtọ́n lẹ tọn lẹ, dọ,

²² OKLUNỌ, Jiwheyẹwhe yẹwhe lẹ tọn, OKLUNỌ, Jiwheyẹwhe yẹwhe lẹ tọn, ewọ yọnẹn, podọ Islaeli ewọ na yọnẹn; eyín é yín atẹ mẹ wẹ, kavi eyín ylanwiwà mẹ do Okluno go wẹ, (a whlẹn mí to azán he gbé blo,)

²³ dọ mìwlẹ ko dó agbà de na mí nado diọkò yì sọn hihodo OKLUNỌ mẹ; kavi eyín nado na to ejifìnẹ avọ́ nunina mimẹ̀ kavi avọ́ nunina jinulili tọn, kavi eyín nado na avọsanu avọ́ nunina jijọho tọn lẹ to ejifìnẹ, gbọ OKLUNỌ lọsu ni kanbiọ;

²⁴ eyín mí ma kuku ko wà ehe sọn ayipipa mẹ, podọ sọn núdétamẹ, dọmọ, To ojlẹ he ja mẹ ovi mìtọn lẹ sọgan dọ hlan ovi mìtọn le, dọmọ, Ẹtẹ mìwlẹ tindo nado wà po OKLUNỌ po, Jiwheyẹwhe Islaeli tọn?

²⁵ Na OKLUNỌ ko yí Jọdani do basi dògboji de to mí po mì po ṣẹnṣẹn, mì ovi Leubẹni tọn lẹ po ovi Gadi tọn lẹ po; mọwẹ ovi mìtọn lẹ na hẹn ovi mìtọn lẹ doalọte sọn budisi OKLUNỌ mẹ.

²⁶ Enẹwutu wẹ mí dọmọ, Mì gbọ mi ni wleawu dinvie nado dó agbà de na mí, é ma yín na avọ́ nunina mimẹ̀, kavi na avọsannu gba:

²⁷ ṣigba é na yín kunnudenu tò mí po mì po ṣẹnṣẹn, podọ to whendo mìtọn lẹ ṣẹnṣẹn to mí godo, dọ mí nido wà sinsẹ̀nzọ́n OKLUNỌ tọn to nukọn etọn po avọ́ nunina mimẹ̀ mìtọn lẹ po, po avọsannu mìtọn lẹ po, po avọ́ nunina jijọho tọn mìtọn lẹ po; dọ ovi mìtọn lẹ ni ma do dọ hlan ovi mìtọn lẹ blo to ojlẹ he ja mẹ dọ, Míwlẹ ma tindo mimá de to OKLUNỌ mẹ gba.

²⁸ Enẹwutu wẹ mí do dọmọ, E na yín, whenuena yé dọ hlan míwlẹ kavi hlan whẹ̀ndo mìtọn lẹ to ojlẹ he ja mẹ, wẹ míwlẹ na dọmọ, Mì dayi ohia agbà OKLUNỌ tọn tọn go, ehe otọ́ mìtọn lẹ basi, é ma yín na avọ́ nunina mimẹ̀, kavi na avọsannu gba; ṣigba kunnudenu de wẹ to mí po mì po ṣẹnṣẹn.

²⁹ Jiwheyẹwhe dike blo dọ míwlẹ ni do ṣiatẹ hẹ OKLUNỌ, bo lẹ́ to azán he gbè sọn OKLUNỌ hihodo mẹ, nado dó agbà de na avọ́ nunina mimẹ̀, na avọ́ nunina jinulili tọn, kavi na avọnuninu, mayín agbà OKLUNỌ Jiwheyẹwhe mìtọn tọn he tin gohọ̀ nukọn.

³⁰ Whenuena Finehasi yẹwhenọ, po ahọvi agùn tọn lẹ po, yèdọ ogán fọtọ́n Islaeli tọn lẹ tọn he tin to e de lẹ, sè ohó he ovi Leubẹni tọn lẹ po ovi Gadi tọn lẹ po po ovi Manasse tọn lẹ po dọ, é hẹnhomẹhùn yé dagbedagbe

³¹ Finehasi visunnu Eleazali yẹwhenọ tọn sọ dọ hlan ovi Leubẹni tọn lẹ podọ hlan ovi Gadi tọn lẹ, podọ hlan ovi Manassẹ tọn lẹ dọ, Azán he gbè wẹ mí yọnẹn dọ OKLUNỌ tin to ogbla mí tọn mẹ, na mìwlẹ ma ko wà ylanwiwà he do OKLUNỌ go gba wutu: dinvie wẹ mì whlẹn ovi Islaeli tọn lẹ sọn alọ OKLUNỌ tọn mẹ.

³² Finehasi visunnu Eleazali yẹwhenọ tọn, po ahọvi lẹ po, diọkọ sọn ovi Leubẹni tọn lẹ de, podọ sọn ovi Gadi tọn lẹ de, sọn aigba Gileadi tọn ji, yì aigba Kanani tọn ji, yì ovi Islaeli tọn le de, bo sọ henohó wá na yé.

³³ Onú lọ sọ hẹnhomẹhùn ovi Islaeli tọn lẹ; ovi Islaeli tọn lẹ sọ dona Jiwheyẹwhe, bo ma sọ dọhó yìyì aga tọn, de ba nado funawhàn hẹ yé, nado và aigba fiemẹ ovi Leubẹni tọn lẹ po ovi Gadi tọn lẹ po nọnọ̀.

³⁴ Ọvi Leubeni tọn lẹ po oví Gadi tọn lẹ po ylọ agbà lọ dọ Edi: Na, yé dọmọ, kunnudenu de wẹ to mí ṣẹnṣẹn dọ OKLUNỌ Wẹ Jiwheyẹwhe.