JỌṢUA 20 - BIBLU WIWE LỌ 1923

¹ OKLUNỌ sọ dọhó hlan Jọsua, dọmọ,

² Dọhó hlan, ọvi Islaeli tọn lọ, dọmọ, Dèdẹ̀ tòdaho fibẹ̀tado tọn lẹ na mì, fietọn yẹn dọ hlan mí gbọn alọ Moṣe tọn mẹ:

³ dọ mẹhutọ he hù omẹ depope to mayọnẹn mẹ podọ to madodego mẹ nido nọ họ̀nyì finẹ; yé na sọ yín hlan mì na fibẹ̀tado de sọn ahọsuyítọ ohùn tọn si.

⁴ Ewọ na sọ; họnyì jẹ dopo todaho helẹ tọn mẹ, bo na site to bibiọ hòngbo tòdaho lọ tọn mẹ tọn ji, bo lá whèhó etọn to otó mẹho todaho nẹ tọn lẹ tọn mẹ; yé na sọ yí i do tòdaho lọ mẹ do yé de, bo na otẹn dè, na é nido nọnọ̀ yé ṣẹnṣẹn.

⁵ Eyín ahọsuyítọ ohùn tọn domọna to e godo, whenẹnu yé ma to na jó mẹhùtọ lọ do alọ etọn mẹ gba; na é hò kọmenu etọn madodego wutu, bo ma ko gbẹwan nẹ̃ daidai gba.

⁶ Ewọ na nọnọ̀ tòdaho nẹ mẹ, kaka é na do ṣite to agùn nukọn na whẹ̀dida, kakajẹ okú yẹwhenọ daho he na tin to azán nẹlẹ mẹ tọn tọn whenu: whenẹnu wẹ mẹhùtọ lọ na diọkò, bo na wá tòdaho etọn titi mẹ, podọ owhé etọn titi gbe, wá tòdaho fie é ko họ̀nyì sọn mẹ.

⁷ Yé sọ dè Kẹdẹṣi to Galile mẹ do olá, to otò okọta: Náftali tọn mẹ, po Ṣekẹmi po to ótò okọta Eflaimi-tọn mẹ, po Kiliatialba po (doponẹ wẹ Heblọni) to otò okọta Juda ton mẹ,

⁸ Podọ to Jọdani gododọ̃n to Jẹliko hlan whèzẹtẹn dali, yé dèdẹ́ Bezeli to zùngbo mẹ to danfafa ji sọn whẹ̀ndo Leubẹni tọn mẹ, po Lamọti po to Galile mẹ sọn whẹ̀ndo Gadi tọn mẹ podọ Golani to Baṣani mẹ sọn whẹ̀ndo Manassẹ tọn mẹ.

⁹ Ehelẹ wẹ tòdaho didè lẹ na ovi Islaeli tọn lẹpo, podọ na ojonọ he wáwási to yé ṣẹnṣẹn, dọ, mẹdepope he hù ome de mayọnẹn nido nọ họ̀nyì finẹ, bó ma kú gbọn alọ ahọsuyítọ ohùn tọn tọn mẹ blo, kaka é do ṣite to agùn nukọn.