JỌṢUA 2 - BIBLU WIWE LỌ 1923

¹ JỌṢUA visunnu Nuni tọn sọ do sunnu awe hlan sọn ṣitimi di amé gbọn nuglọ, dọmọ, Yì là aigba lọ pọ́n, po Jẹliko po. Yé sọ yì, bo wá owhé galọtọ de tọn gbè oyín mẹhetọn nọ yín Lahabi, bo mlọn finẹ.

² Yè sọ dọ na ahọlu Jẹliko tọn, dọmọ, Sunnu de lẹ sọn ovi Islaeli tọn mẹ wá ofi to ozán he mẹ nado dindòna aigba lọ.

³ Ahọlu Jẹliko tọn sọ do omẹ hlan Lahabi, dọmọ, Hẹn dawe he wá de we lẹ tọ́n, he biọ owhé towe gbè: na otò he wẹ yé wá nado dindòna.

⁴ Nawe lọ sọ bẹ dawe awe lẹ, bo whla yé; é sọ dọmọ, Nugbo, omẹ ewlẹ wá dẽ, ṣigba yẹn ma yọ́n fie yé te gba:

⁵ E sọ wá jọ to ojlẹ súsú họ̀ngbo tọn tọn, whenuena é yín zinvlu, wẹ dawe ewlẹ tón yì: fie omẹ ewlẹ yì yẹn ma yọnẹn: mì yawu domóna yé; na mì na pla yé.

⁶ Ṣigba ewọ ko hẹn yé wá aga to ohọ̀ta, bo yí zinkán sékanfun tọn vàna yé, he é ko bẹ́ tò do ohọ̀ta

⁷ Omẹ ewlẹ sọ doafọna yé to aliho jei Jọdani jẹ tọ̀pẹsẹ lẹ kọ̀n: le yé mẹhe doafọna yé lẹ tón yì, yé sú họ̀ngbo.

⁸ Whẹpo yé na do mlọnai, é hẹ́ aga wá yé de to ohọ̀ta;

⁹ ewọ sọ dọ hlan omẹ ewlẹ dọ, Yẹn yọnẹn dọ OKLUNỌ ko na aigba he mì, podọ zingidi mìtọn ko jẹ mí ji, podọ tòmẹnu aigba lọ tọn lẹpo wẹ yé kònyìngbe to mì nukọn.

¹⁰ Na mí ko sè lé OKLUNỌ hẹn osìn Ohù Vẹ̃ tọn hú to mì nukọn do, whenuena mì tón sọn Egipti; po onú he mì wà hlan ahọlu awe Amolinu lẹ tọn po, he tin to Jọdani godo, hlan Sihọni, podọ hlan Ogi, yé mẹhe mì hùsúdo gbidigbidi.

¹¹ Le míwlẹ sè e, ayiha mìtọn lẹ yé, mọ gbigbọ de ma sọ pò to omẹ depope homẹ, na mì tọn wutu: na OKLUNỌ Jiwheyẹwhe mìtọn, ewọ wẹ Jiwheyẹwhe to olọn mẹ aga, podọ to aihọn ji to odò.

¹² Enẹwutu dinvie, yẹn vé mì, whle hlan mi gbọn OKLUNỌ lọ dali, sọle yẹn ko zán homẹhùn hẹ mì, dọ mìwlẹ ga na zán homẹhùn hẹ owhé otọ́ ṣie tọn, bo na ohia dagbe de mi:

¹³ podọ mìwlẹ na whlẹn otọ́ ṣie dogbẹ̀, po onọ ṣie po, po nọvisunnu ṣie lẹ po, po nọviyọnnu ṣie lẹ po, po enẹ he yé tindo lẹpo po, bo na sọ whlẹn ogbẹ̀ mìtọn lẹ sọn okú mẹ

¹⁴ Omẹ ewlẹ sọ dọ hlan ẹn dọ, Ogbẹ̀ mitọn na mìtọn, eyín mi ma dọ azón mìtọn he; é na sọ wá jọ, whenuena OKLUNỌ na aigba he mi, wẹ mí na yí homẹhùn po nugbo po do zán hẹ we.

¹⁵ Whenẹnu wẹ é yí okàn de do dè yé jẹte gbọn vẹ́sẹ́nu: na owhé etọn tin to otò dòkọdó ji, ewọ sọ nọnọ̀ adó lọ ji.

¹⁶ Ewọ sọ dọ hlan yé dọ, Mì yì osé ji, na afọdonamẹtọ lẹ nika hòjẹ mì; bo whla mìde do finẹ azán atọ̀n kaka afọdonamẹtọ lẹ do lẹ́gọ̀: enẹgodo mì nido yí aliho mìtọn yì.

¹⁷ Omẹ ewlẹ sọ dọ hlan ẹn dọ, Mí na yín matinwhẹgbledo, sọn whiwhle towe he mẹ he hiẹ ko hẹn mí nado whle.

¹⁸ Dayi e go, whenuena mi wá biọ aigba lọ mẹ, hiẹ na sìn okàn sekànvẹ̃ṣẹẹẹ tọn hè hiẹ do dè mí jẹte do vẹ́sẹ́nu: hiẹ na sọ bẹ́pli do owhé gbé do dewe de otọ́ towe, po onọ towe po, po nọvisunnu towe lẹ po, po whédo otọ́ towe tọn lẹpo po.

¹⁹ E na sọ yín, dọ omẹ depope he na tọ́n sọn ohọ̀n owhé towe tọn lẹ mẹ jẹ aligboji, ohùn etọn na tin to ota etọn, míwlẹ na sọ yín matinwhẹgbledo: mẹdepope he na tin po hiẹ po to owhé gbè, ohùn etọn na tin to ota mitọn, eyín alọ depope tin to e ji.

²⁰ Ṣigba eyín hiẹ dọ azọ̀n mitọn he, whenẹnu míwlẹ na yín matinwhẹgbledo sọn whiwhle towe mẹ he hiẹ ko hẹn mi nado whle.

²¹ Ewọ sọ dọmọ, Kẹdẹdi hlan ohó mìtọn lẹ, mọwẹ é ni yín. Ewọ sọ jò yé hlan yì, yé sọ fọ́nyì: ewọ sọ sìn okàn sekànvẹsẹsẹ tọn lọ do vẹ́sẹ́nu.

²² Yé sọ yì, bo wá osé lọ kòn, bo nò fine azán atọ̀n; kaka afọdonamẹtọ lẹ lọ do lẹ́gọ̀: afọdonamẹtọ lẹ lọ din yé to aliho lẹpo ṣigba bo ma mọ yé.

²³ Whenẹnu omẹ awe lẹ lẹ́gọ̀, bo jẹte sọn osé lọ ji, bo juwayi, bo wá Jọsua visunnu Nuni tọn de; yé sọ dọ ehe jọ̀ do yé go lẹpo nẹ̃.

²⁴ Yé sọ dọ hlan Jọsua, dọ Nugbonugbo OKLUNỌ ko yí aigba lọ lẹpo do alọ mìtọn lẹ mẹ; humọ otòmẹnu aigba lọ tọn lẹpo wẹ yọ́ kọnyìngbe to mi nukọn.