JỌṢUA 16 - BIBLU WIWE LỌ 1923

¹ MIMÁ na ovi Josẹfu tọn lẹ tón yì sọn Jọdani to Jẹliko, to osìn Jeliko tọn lẹ kòn to whèzẹtẹn ji, yèdọ Zùngbo lọ, aga yìyì sọn Jẹliko gbọn otò okọta tọn me jẹ Bẹteli;

² E sọ tón yì sọn Bẹteli jẹ Luzi, bo gbọn mọ jẹ dògboji Alkinu lẹ tọn jẹ Atalọti;

³ Ṣigba é yì odò hlan whèyìhọ dali jẹ dògboji Jafletinu lẹ tọn, jẹ dògboji Bẹti-holọni tọn to odò, yèdọ jẹ Gezeli: po tintón yì gbonu etọn lẹ po tin to ohù tó.

⁴ Ovi Josẹfu tọn lẹ, Manassẹ po Eflaimi po, yí ogú yetọn.

⁵ Dògboji ovi Eflaimi tọn lẹ tọn kẹdẹdi whédo yetọn lẹ wẹ lankọ: yèdọ dògboji ogú yetọn tọn hlan whèyìhọ dali wẹ Atalọti-addali, jẹ Bẹti-holọni to aga;

⁶ Dògboji lọ sọ tón yì hlan whèyìhọ dali to Mekinẹtati to agewaji dali; dògboji lọ sọ diọkò hlan whèzẹten dali jẹ Taanati-ṣilo, bo gbọn e dali mọ to whèzẹtẹn Janoahi tọn ji;

⁷ E sọ yì odò sọn Janoahi jẹ Atalọti, podọ jẹ Naalahi, bo sọ jẹ Jẹliko dali, bo jẹgbonu yì Jọdani.

⁸ Sọn Tappuahi dògboji lọ gbọn mọ yì whèyìhọ dali jẹ tòpa Kanahì, po tintón etọn lẹ po sọ tin to ohù tó. Ehe wẹ ogú whendo ovi Eflaimi tọn lẹ tọn tọn kẹdẹdi whẹdo yetọn lẹ;

⁹ Dopọ hẹ todaho he yè klandovo lẹ na ovi Eflaimi tọn lẹ to ogbla ogú ovi Manassẹ tọn lẹ tọn tọn mẹ, tòdaho lẹpo po gbeta yetọn lẹ po.

¹⁰ Yé ma sọ yàn Kananinu he nọnọ̀ Gezeli mẹ lẹ tón gba: ṣigba Kananinu nọnó ogbla Eflaimi tọn mẹ, jẹ egbé he, bo sọ lẹzùn mẹmẹsi lẹ nado wà sẹ́njọzón.