JỌṢUA 14 - BIBLU WIWE LỌ 1923

¹ EHELẸ wẹ ogú he ovi Islaeli tọn lẹ yí to aigba Kanani tọn mẹ, ehe Eleàzali yẹwhenọ, po Jọṣua ovi Nuni tọn po, po ogán ọwhó otọ́ whendo ovi Islaeli tọn lẹ tọn tọn má hlan yé,

² Gbọn mimá ogú yẹtọn tọn dali, dile OKLUNỌ degbé do gbọn alọ Moṣe tọn mẹ, na whendo ṣinẹnẹ lẹ, podọ na oda whendo lọ tọn.

³ Na Moṣe ko na ogú whẹ́ndo awe lẹ po oda po tọn to Jọdani gododọ̃n: ṣigba hlan Levinu lẹ é ma na ogú de to yé ṣẹnṣẹn gba.

⁴ Na ovi Josẹfu tọn yín whendo awe, Manassẹ po Eflaimi po: yé ma sọ na mimá de hlan Levinu lẹ to aigba lọ mẹ gba, adavo tòdaho lẹ nado nọnọ̀ e mẹ, po agbohomẹ etọn lẹ po na kanlinyìnyìn yetọn lẹ podọ na agbàn yetọn.

⁵ Dile OKLUNỌ degbèna Moṣe do, mọwẹ ovi Islaeli tọn lẹ wà do, yé sọ má aigba lọ.

⁶ Whenẹnu wẹ ovi Juda tọn lẹ sẹ̀wá Jọsua de to Gilgali: Kalebi visunnu Jẹfunnẹ tọn Kenizinu dọ hlan ẹn dọ, Hiẹ yón ọnú he OKLUNỌ dọ hlan Moṣe Jiwheyẹwhe gbẹtọ gbọn yẹn tọn dali podọ gbọn hiẹ tọn dali to Kadesi-balnea.

⁷ Omẹ owhè kandé tọn wẹ yẹn whenuena Moṣe mẹmẹsi OKLUNỌ tọn do mi hlan sọn Kadesi-balnea nado bẹ̀pọ́n aigba lọ; yẹn sọ hẹn ohó wá e de dile é te to ayiha ṣie mẹ do.

⁸ Adi mẹmẹsunnu ṣie he hẹji yì po yẹn po lẹ tọn hẹn ayiha gbẹtọ lẹ tọn yé: ṣigba yẹn hodo OKLUNỌ Jiwheyẹwhe ṣie pete.

⁹ Moṣe sọ whle to gbenẹgbe, dọmọ, Nugbònugbo aigba he afọ towe ko zín lọ na yín ogú de hlan we podọ hlan ovi towe lẹ kakadoi, na hiẹ kò hodo OKLUNỌ Jiwheyẹwhe towe pete wutu,

¹⁰ Podọ dinvie, dayi e go, OKLUNỌ ko whla mi dogbẹ, dile é dọhó do, owhè kande atón helẹ mẹ, sọn ojlẹ he mẹ OKLUNỌ ko dọ ohó he hlan Moṣe, whenuena Islaeli to zọnlinzin to zùngbo mẹ: podọ dinvie, pọ́n, yẹn to egbé he yín omẹ owhè kanwe atón tọn.

¹¹ Jẹ dinvie yẹn tin huhlọn to egbé dile yẹn te to azán he gbè Moṣe do mi hlan: dile huhlọn ṣie te whenẹnu, yèdọ mọwẹ huhlọn ṣie te dinvie, na awhàn, podọ nado tón yì podọ nado wá Whégbe.

¹² Enẹwutu dinvie na osé he mi, ehe OKLUNỌ dọhó etọn to gbenẹgbe; na hiẹ mọ to gbenẹgbe le Anakimi lẹ tin to finẹ do, po tòdaho kiklọ dòkónọ le po: é sọgan yín dọ OKLUNỌ na tin po yẹn pọ, yẹn bo na sọ yàn yé jẹgbonu, dile OKLUNỌ dọ do.

¹³ Jọṣua sọ dona ẹn; é sọ na Heblọni hlan Kalẹbi visunnu jẹfunnẹ tọn na ogú de.

¹⁴ Enẹwutu Heblọni lẹzùn ogú Kalẹbì tọ́n visunnu Jẹfunnẹ tọn Kenizinu, jẹ egbé he; na dọ ewọ hodo OKLUNỌ, Jiwheyẹwhe Islaeli tọn pete wutu.

¹⁵ Dinvie oyín Heblọni tọn daidai wẹ Kiliati-alba; Alba he yín omẹ daho talala to Anakimi ṣẹnṣẹn. Aigba lọ sọ tindo jijọho ṣọn awhàn sì.