JỌṢUA 13 - BIBLU WIWE LỌ 1923

¹ DINVIE Jọsua yín yónhonọ bo dohó to owhè mẹ; OKLUNỌ sọ dọ hlan ẹn dọ, Hiẹ yín whinwhẹn bo dohó to owhè mẹ, aigba susu gégé gbẹ́ sọ pò nado yín yíyí.

² Ehe wẹ aigba he gbẹ́ sọ pò: agbègbè Filistini tọn lẹpo, po Gesuli lẹ po;

³ Sọn Siholi, he tin to Egipti nukọn, yèdọ jẹ dògboji Eklọni tọn hlan agewàji, he yè hia hlan Kananinu lẹ: klunọ atọn Filìstinu lẹ tọn: Gazanu lẹ, Asidọdinu lẹ, Asikeloninu lẹ, Gitinu lẹ, po Eklọninu lẹ po; Aviminu lẹ ga,

⁴ To hùwàji: aigba Kananinu lẹ tọn lẹpo, po Meala he yín Zidọninu lẹ tọn po, jẹ Afẹki, jẹ dògboji Amọlinu lẹ tọn:

⁵ Po Gebalinu lẹ tọn po, po Lẹbalọni lẹpo po, hlan whèzẹtẹn dali, sọn Baali-gadi to osé Helmọni glọ jẹ bibiọ Hamati tọn mẹ:

⁶ Tòmẹnu otò okọta tọn sọn Lẹbalọni jẹ Mislefọtimaimi, yèdọ Zidọnianu lẹpo; yé wẹ yẹn na yàn tọ́n sọn ovi Islaeli tọn lẹ nukọn: kìki hiẹ ni kán ẹn na hlan Islaeli na ogú de, dile yẹn degbèna we do.

⁷ Enẹwutu dinvie má aigba he na ogú de hlan whẹndo sinẹnẹ lẹ, po dadawe whẹndo Manassẹ tọn po.

⁸ Leubẹninu lẹ po Gadinu lẹ po ko yí ogú yetọn po yé po, ehe Moṣe na yé, to Jọdani gododọ̃n hlan whèzẹtẹn dali, yèdọ dile Moṣe mẹmẹsi OKLUNỌ tọn na yé do;

⁹ Sọn Aloeli, he tin to tónu agbàdo Alnọni tọn tọn go, po tòdaho he tin to ṣẹnṣẹn agbàdo lọ tọn mẹ po, po danfafa Medeba tọn lẹpo po jẹ Dibọni;

¹⁰ Po tòdaho Sihọni ahọlu Amọlinu lẹ tọn tọn lẹpo po, he duahọlu to Hẹṣiboni mẹ, jẹ dògboji ovi Ammọni tọn lẹ tọn;

¹¹ Po Gileadi po, po dògboji Gẹsulinu po Maakatinu lẹ po tọn, po osé Helmọni lẹpo po, po Baṣani lẹpo po jẹ Saleka;

¹² Ahọludu Ogi tọn to Baṣani mẹ lẹpo, he duahọlu to Aẹilaíọti mẹ podọ to Edlei mẹ (doponẹ wẹ yè jódai sọn pipòtọ Lefaimi tọn mẹ); na ehelẹ wẹ Moṣe hò, bo yàn yé jẹgbonu.

¹³ Gãnṣo ovi Islaeli tọn lẹ ma yàn Gẹsulinu lẹ kavi Maakatinu lẹ tón jẹgbonu: ṣigba Gẹsuli po Maakati po nọnọ̀ ogbla Islaeli tọn mẹ, kaka jẹ egbé.

¹⁴ Hlan whẹndo Levi tọn kẹdẹ wẹ é ma má ogú de; avọ́ nunina OKLUNỌ tọn, Jiwheyẹwhe Islaeli tọn, yè basi gbọn miyọn dali lẹ wẹ ogú etọn, dile é dọhó hlan ẹn do.

¹⁵ Moṣe sọ na hlan whẹndo ovi Leubẹni tọn tọn lẹ kẹdẹdi whédo yetọn lẹ.

¹⁶ Dògboji yetọn sọ tin sọn Aloeli, he tin to tónu agbàdo Alnọni tọn tọn ji, po tòdaho he tin to ṣẹnṣẹn agbàdo lọ tọn mẹ po, po danfafa lẹpo po to Mẹdeba dali;

¹⁷ Hẹṣiboni, po tòdaho etọn lẹpo po he tin to danfafa lọ ji; Dibọni, po Bamọtíbaali po, po Bẹti-baalìmeọni po;

¹⁸ Po Jahazi po, po Kedemọti po, po Mẹfaati po;

¹⁹ Po Kilialaimi po, po Sibima po, po Zeletisahali po to osé agbàdo lọ tọn mẹ;

²⁰ Po Bẹti-peọli po, po dòdòmẹ Pisga tọn lẹ po, po Bẹti-jẹsimọti po;

²¹ Po tòdaho danfafa tọn lẹpo po, po ahọludu Sihọni ahọlu Amọlinu lẹ tọn lẹpo po, he duahọlu to Hẹṣiboni mẹ, mẹhe Moṣe hò po ogán Midiani tọn lẹ po, Evi, po Lekẹmi po, po Zuli po, po Huli po, po Leba po, ahọvi Sihọni tọn lẹ, he nọnọ̀ aigba lọ ji lẹ.

²² Balaami ga visunnu Beọli tọn, dọṣẹnọ lọ, wẹ ovi Islaeli tọn lẹ yí ohi do hú to pipòtọ alantọṣiọ yetọn tọn lẹ mẹ.

²³ Dògboji ovi Leubẹni tọn lẹ tọn wẹ Jọdani, po dògboji etọn po. Ehe wẹ ogú ovi Leubẹni tọn lẹ tọn kẹdẹdi whédo yetọn lẹ, tòdaho lẹ po gbeta etọn lẹ po.

²⁴ Moṣe sọ na hlan whẹndo Gadi tọn, hlan ovi Gadi tọn lẹ, kẹdẹdi whédo yetọn lẹ.

²⁵ Dògboji yetọn wẹ Jazeli, po tòdaho Gileadi tọn lẹpo po, po oda aigba ovi Ammọni tọn lẹ tọn po, jẹ Aloeli he tin to Labba nukọn;

²⁶ Podọ sọn Hẹẹibọni jẹ Lamati-mizpẹ, po Betonimi po; podọ sọn Mahanaimi jẹ dògboji Debili tọn;

²⁷ Podọ to agbàdo mẹ Bẹti-halami, po Bẹtinimila po, po Sokoti po, po Zafoni po, po pipòtọ ahọludu Sihọni ahọlu Hẹṣiboni tọn tọn po, Jọdani po dògboji etọn po, jẹ pòdopatapata ohù Kinneleti tọn tọn to Jọdani gododọ́n hlan whèzẹtẹn dali.

²⁸ Ehe wẹ ogú ovi Gadi tọn lẹ tọn kẹdẹdi whédo yetọn lẹ, tòdaho lẹ po gbeta etọn lẹ po.

²⁹ Moṣe sọ na ogú hlan oda whẹ́ndo Manassẹ tọn: é sọ tin na oda whẹ̀ndo ovi Manassẹ tọn lẹ tọn kẹdẹdi whédo yetọn lẹ.

³⁰ Dògboji yetọn sọ tin sọn Mahanaimi, Baṣani lẹpo, ahọludu Ogi ahọlu Baṣani tọn tọn lẹpo, po tòpẹvi Jaili tọn lẹpo po, he tin to Baṣani mẹ, tòdaho kandeko:

³¹ Po oda Gileadi tọn po, po Asitalọti po, po Adlei po, tòdaho ahọludu Ogí tọn tọn lẹ to Baṣani mẹ, wẹ na ovi Makili visunnu Manassẹ tọn tọn lẹ, yèdọ na oda ovi Makili tọn tọn lẹ kẹdẹdi whédo yetọn lẹ.

³² Ehelẹ wẹ ogú he Moṣe má lẹ to danfafa Moabi tọn lẹ ji, to jọdani gododọ̃n to Jẹliko, hlan whèzẹtẹn dali.

³³ Ṣigba hlan whẹ́ndo Levi tọn Moṣe ma na ogú de gba: OKLUNỌ, Jiwheyẹwhe Islaeli tọn, wẹ ogú yetọn, dile é dọhó hlan yé do.