JỌṢUA 11 - BIBLU WIWE LỌ 1923

¹ E sọ wá jọ, whenuena Jabini ahọlu Hazọli tọn sè e, wẹ é do omẹ hlan Jobabi ahọlu Madọni tọn podọ hlan ahọlu Ṣimiọni tọn, podọ hlan ahọlu Akisa tọn,

² Podọ hlan ahọlu he tin to agèwaji lẹ, to otò okọta tọn mẹ, podọ to Alaba hùwàji Kinelọti tọn mẹ, podó to dòdòklidò mẹ, podọ to aga Dọli tọn lẹ mẹ to whèyìhọ ji,

³ Hlan Kananinu lẹ to whèzẹtẹn po whèyìhọ po ji, po Amọlinu lẹ po po Hitìnu lẹ po, po Pelizinu lẹ po, po Jẹbusinu lọ po to otò okọta tọn mẹ, po Hivinu lẹ po to Hẹlmọni glọ to aigba Kizpa tọn ji.

⁴ Yé sọ tón yì gbonu, yé po awhànpa yetọn lẹpo po po yé po, gbẹtọ susugégé, yèdọ di tọ̀kẹn he tin to hùtó tò gégé mẹ, osé lẹ po kẹkẹ lẹ po to pọ́gégé.

⁵ Ahọlu he lẹpo sọ pli dopọ; yé sọ wá bo tòlẹ́do dopọ to osìn Milọmi tọn kọ́n, nado hòavùn hẹ Islaeli.

⁶ OKLUNỌ sọ dọ hlan Jọsua dọ, A yín avòsatọ na yé tọn wutu blo: na osò to ojlẹ he mẹ wẹ yẹn na jó yé omẹ pó alantọṣiọ to Islaeli nukọn: hiẹ na sandònmẹna osé yetọn lẹ, bo yí miyọn do mẹ kẹkẹ yetọn lẹ.

⁷ Mowẹ Jọṣua, po omẹ awhàn tọn lẹpo po po e po, wá yé ji to osìn Melọmi tọn lẹ dali ajiji, bo zón jẹ yé ji.

⁸ OKLUNỌ sọ jó yé do alọ Islaeli tọn mẹ, yé sọ hò yé, bo domọna yé jẹ Zidọni daho, podọ jẹ Mialefọti-maimi, podọ jẹ agbàdo Mizpẹ tọn to whèzẹtẹn dali; yé hò yé, kaka yé ma do pò omẹ de dai na yé.

⁹ Jọṣua sọ wà hlan yé dile OKLUNỌ degbè nẹ̃ do: é sándònmẹna osé yetọn lẹ, bo yi miyọn do mé kẹkẹ yetọn lẹ.

¹⁰ Jọṣua sọ diọkò to ojlẹ nẹ mẹ, bo yí Hazọli, bo yí ohi do hò ahọlu yetọn: na Hazọli wẹ ota ahọludu nẹlẹ tọn to daidai.

¹¹ Yé sọ yí ohi do hò ayiha he tin to e mẹ lẹpo, bo hù yé súdo patapata: mẹde ma pò bo to gbigbọ: é sọ yí miyọn do mé Hazọli.

¹² Tòdaho ahọlu nẹlẹ tọn lẹpo, po ahọlu yé tọn lẹpo po, wẹ Jọṣua yi, é sọ yí onù ohi tọn do hò yé, bo hù yé súdo patapata; dile Moṣe mẹmẹsi OKLUNỌ tọn degbè do.

¹³ Bigba na tòdaho he nọte to agbó yetọn lẹ ji, Islaeli ma mó ode yé tọn gba, adavo Hazọli kẹdẹ; enẹ wẹ Jọsua mó.

¹⁴ Ogblannú tòdaho nẹlẹ tọn lẹpo, po kanlinyìnyìn lẹ po, ovi Islaeli tọn lẹ yí na ogblàn de hlan yéde; aigba gbẹtọ lẹpo wẹ yé yí onù ohi tọn do hò, kaka yé do hù yé sudo, mọ yé ma sọ pò omẹ depope dai he to gbigbọ.

¹⁵ Dile OKLUNỌ degbèna Moṣe mẹmẹsi etọn do, mọwẹ Moṣe degbèna Jọsua do: mọwẹ Jọsua sọ wà do; é ma pò nude dai mawà sọn ehe OKLUNỌ degbèna Moṣe lẹpo mẹ.

¹⁶ Mowẹ Jọṣua yí aigba nẹ lẹpo, otò okọta tọn, po hùwaji lẹpo po, po aigba Goṣẹni tọn lẹpo po, po dòdòklidò po, po Alaba po, po otò okọta Islaeli tọn po, po dòdòklidò doponẹ lọ tọn po;

¹⁷ Sọn osé Halaki, he yì aga jẹ Seìli, yèdọ jẹ Baali-gadi to agbàdo Lebanọni tọn mẹ to osé Helmọni glọ: po ahọlu yetọn lẹpo po wẹ é yí, bo hò yé, bo hù yé.

¹⁸ Jọṣua basi awhàn họ̀ ojlẹ dindẹn de hẹ ahọlu nẹlẹ pó.

¹⁹ Tòdaho de ma tin he basi jijọho hẹ ovi Islaeli tọn lẹ, adavo Hivinu lẹ tòmẹnu Gibiọni tọn lẹ: yé yí yé mẹpo to awhànpétẹn.

²⁰ Na é tin sọn OKLUNỌ de nado hẹn ayiha yetọn lẹ sinyẹn, nado wá Islaeli ji to awhànpétẹn mẹ, na é nido hù yé súdo patapata, bọ yé ma na do tindo nukundagbe depope, ṣigba dọ ewọ nido hù yé súdo, dile OKLUNỌ degbèna Moṣe do.

²¹ Jọṣua sọ wá to ojlẹ nẹ mẹ, bo sán Anakimi sẹ̀ sọn otò okọta tọn mẹ, sọn Heblọni, sọn Debili, sọn Anabi, podọ sọn otò okọta Juda tọn tọn lẹpo mẹ, podọ sọn otò okọta Islaeli tọn tọn lẹpo mẹ. Jọsua hù yé omẹ pó po tòdaho yetọn lẹpo po súdo patapata.

²² Anakimi lẹ de ma pò to aigba ovi Islaeli tọn lẹ tọn de mẹ: Gaza mẹ kẹdẹ, Gati mẹ, po Asidọdi po mẹ, wẹ vúde pò te.

²³ Mowẹ Jọṣua yí aigba lẹpo pete, kẹdẹdi ehe OKLUNỌ dọ hlan Moṣe lẹpo; Jọsua sọ na ẹn na ogú de hlan Islaeli kẹdẹdile gònugnu yetọn lẹ te gbọn whẹndo yetọn lẹ dali. Aigba lọ sọ tindo gbọjẹ sọn awhàn si.