JỌṢUA 10 - BIBLU WIWE LỌ 1923

¹ DINVIE é sọ wá jọ, whenuena Adoni-zedeki ahọlu Jelusalẹm tọn sè le Jọsua ko yí Ai do, bo ko sọ hù i sudo patapata; dile é ko wà hlan Jẹliko po ahọlu etọn po do, mọwẹ ewọ ko wà hlan Ai po ahọlu etọn po; podọ le tòmẹnu Gebiọni tọn lẹ ko basi jijọho hẹ Islaeli do, bo tin to ye ṣẹnṣẹn;

² obudi yé susu, na tòdaho de we Gebiọni, di dopo sọn tòdaho ahọlu tọn lẹ mẹ, podọ na é yín kiklohu Ai wutu, omẹ etọn lẹpo sọ yín huhlọnnọ.

³ Enẹwutu Adonì-zedeki ahọlu Jelusalẹm tọn doomọ hlan Hohami ahọlu Heblọni tọn, podọ hlan Pilami ahọlu Jalmuti tọn, podọ hlan Jafia ahọlu Lakisi tọn, podọ hlan Debili ahọlu Eglọni tọn, dọmọ,

⁴ Mì hẹji wá dẽ, bo gọalọna mi, bo gbọ mi ni hò Gebiọni: na ewọ ko basi jijọho hẹ Jọsua podọ hẹ ovi Islaeli tọn lẹ.

⁵ Enẹwutu wẹ ahọlu atọ́n Amọlinu lẹ tọn, ahọlu Jelusalẹm tọn, ahọlu Heblọni tọn, ahọlu Jalmuti tọn, ahọlu Lakisi tọn, ahọlu Eglọni tọn bé yéde pli dopọ, bo hẹji yì, yé po awhànpa yetọn lepo pó, bo dosla do Gebiọni ji, bo fùnawhàn hẹ ẹ.

⁶ Omẹ Gebiọni tọn lẹ sọ do omẹ hlan Jọṣua to osla mẹ to Gilgali, dọmọ, Á jokanna alọ towe sọn mẹmẹsi towe lẹ de blo; hẹji wá mí de plaun, bo whlẹn mí, bo gọalọna mí: na ahọlu Amọlinu lẹ tọn he nọnọ̀ otò okọta tọn mẹ lẹpo wẹ yè bé plidopọ do mí ji.

⁷ Mọwẹ Jọsua hẹji yì sọn Gilgali, ewọ, podọ omẹ awhàn tọn lepo po e po, po sunnu adántọ huhlọn tọn lẹpo po

⁸ OKLUNỌ sọ dọ hlan Jọsua dọ, A dibu na yé blo: na yẹn ko yí yé do alọ towe lọ mẹ; omẹ dopo yé tọn ma na nọte to nukọn towe gba.

⁹ Enẹwutu Jọsua wá ye ji ajiji; na ozán lẹpo wẹ é do yì sọn Gilgali.

¹⁰ OKLUNỌ sọ dogblagbla yé to Islaeli nukọn, é sọ hù yé do hù hùja daho to Gebiọni, bo sọ yanmọna yé gbọn aliho agayìyì tọn dali jẹ Bẹti-holọni, bo hò yé jẹ Azeka, podọ jọ Makeda.

¹¹ E sọ wá jọ, le yé họ̀njei sọn Islaeli nukọn, whenuena yé tin to odò yìyì Bẹtiholọni tọn mẹ, wẹ OKLUNỌ bli zannu daho lẹ dlan odò sọn olọn do yé ji jẹ Azeka, yé sọ kú: yé he kú po kénsu lẹ po sùhú yé he ovi Islaeli tọn lẹ yí ohi do hù.

¹² Whenẹnu wẹ Jọṣua dọhó hlan OKLUNỌ to azán he gbè whenuena OKLUNỌ jó Amọlinu lẹ to ovi Islaeli tọn lẹ nukọn; é sọ dọ to nukun Islaeli tọn mẹ dọ, Owhè, hiẹ ni nọte gù to Gebiọni ji; Podọ hiẹ, Osùn, to agbàdo Aijalọni ton mẹ

¹³ Owhè sọ nọte gú, osùn sọ site, Kaka akọta lọ ko yíahọsuna yéde to kẹ̀ntọ lẹ ji. Yè ma wlan ehe to owé Jasali tọn mẹ? Owhè sọ ṣite to ṣẹnsẹn olọn tọn, é ma sọ yawu nado yì odò nayì azán dopo nkọ pete.

¹⁴ Azán de ma tin di enẹ to nukọn etọn kavi to godo etọn, bọ OKLUNỌ tùntóai hlan ogbè gbẹtọ de tọn: na OKLUNỌ hòavùn na Islaeli.

¹⁵ Jọsua sọ lẹ́gọ̀, po Islaeli lẹpo po gó nẹ̃ wá osla mẹ to Gilgali.

¹⁶ Ahọlu atọ́n helẹ sọ họ̀nyì, bo whla yéde do aigbaslo mẹ to Makeda.

¹⁷ Yè sọ dọ na Jọṣua, dọmọ, Yè din ahọlu atọ̀n lẹ mọ, whiwhla to aigbaslo mẹ to Makeda.

¹⁸ Jọṣua sọ dọmọ, Mì bli zannu daho lẹ do onù aigbaslo lọ tọn ji, bo dè omẹ do e kọ̀n na nado họ́ yé:

¹⁹ ṣigba mì ṣite blo; mì domọna kẹ̀ntọ mìtọn lẹ, bo hò godotọ yé tọn lẹ; mì dike na yé nado biọ tòdaho yetọn le mẹ yì blo: na OKLUNỌ Jiwheyẹwhe mìtọn ko jó yé do alọ mìtọn mẹ.

²⁰ E sọ wá jọ, whenuena Jọsua po ovi Islaeli tọn lẹ po ko dotana yíyí yé do hù hùja, kaka yè do sú yé do, bọ pipòtọ yé tọn he po lẹ ko biọ todaho dòkọnọ lẹ mẹ,

²¹ wẹ gbẹtọ lẹpo gò do osla mẹ do Jọsua de to Makeda to jijọho mẹ: mẹde ma whàn odó etọn do ovi Islaeli tọn lẹ depope go.

²² Whenẹnu wẹ Jọṣua dọmọ, Mì hùn onù aigbaslo lọ tọn, bo hẹn ahọlu atọ́n nẹlẹ tọ́n wá dè sọn aigbaslo lọ mẹ.

²³ Yé sọ wà mọ, bo hẹn ahọlu atọ́n nẹlẹ tón wá e de sọn aigbaslo lọ mẹ, ahọlu Jelusalẹm tọn, ahọlu Heblọni tọn, ahọlu Jalmuti tọn, ahọlu Lakisi tọn, ahọlu Eglọni tọn.

²⁴ E sọ wá jọ, whenuena ye hẹn ahọlu atọ́n nẹlẹ tón wá Jọṣua de, wẹ Jọṣua ylọ omẹ Islaeli tọn lẹpo, bo dọ hlan ogán sunnu awhàn tọn tọn he yì po yé po lẹ dọ, Mì sẹ̀ wá, yí afọ mìtọn lẹ do okè ahọlu helẹ tọn ji. Yé sọ sè wá, bo yí afọ yetọn lọ do okọ́ yé tọn lẹ ji

²⁵ Jọṣua sọ dọ hlan yé dọ, Mì dibu blo, mì sọ yín avọ̀satọ blo; mì yín huhlọnnọ po tudotọ dagbe tọn po: na le wẹ OKLUNỌ na wà do hlan kentọ mìtọn mẹhe mì to ovùnhò hẹ lẹ

²⁶ Enẹgodo Jọṣua hò yé, bo hù yé, bo zé yé pla atin atọ́n go: yé sọ tin to pipla to atin lẹ lọ ji kakajẹ whèjai.

²⁷ E sọ wá jọ to ojlẹ odò yìyì owhè tọn mẹ, wẹ Jọṣua degbè, yé sọ dè yé wá odò sọn atin lẹ ji, bo sọ bẹ́ yé dlan aigbaslo hemẹ yé ko whla yéde do, bo zé zannu daho lẹ do onù aigbaslo lọ tọn, kakajẹ egbé he.

²⁸ Jọṣua sọ yí Makeda to gbenẹgbe, bo yí onù ohi tọn do hò e, po ahọlu etọn po; é hù yé súdo patapata po ayiha he tin to e mẹ lẹpo po, é ma pò mẹde dai gba: é so wà hlan ahọlu Makeda tọn dile é wà hlan ahọlu Jẹliko tọn do.

²⁹ Jọsua sọ tọ́n sọn Makeda, po Islaeli lẹpo po po e po, wá Libna, bo hòavùn hẹ Libna:

³⁰ OKLUNỌ sọ jó e ga, po ahọlu etọn po, do alọ Islaeli tọn mẹ; é sọ yí onù ohi tọn do hò e, po ayiha he tin to e mẹ lẹpo po; é ma pò mẹde dai toye mẹ gba; é sọ wà hlan ahọlu etọn dile é ko wà hlan ahọlu Jẹliko tọn do.

³¹ Jọṣua sọ tón sọn Libna, po Islaeli lẹpo po po e po wá Lakisi, bo dosla do kòji nẹ, bo hòavùn hẹ ẹ:

³² OKLUNỌ sọ jó Lakisi do alọ Islaeli tọn mẹ, é sọ yí i to azán awetọ gbè, bo yí onù ohi tọn do hò e, po ayiha he tin to e mẹ lẹpo po, kẹkẹdi ehe é wà hlan Libna lẹpo.

³³ Whenẹnu Holamì ahọlu Gezeli tọn hẹji wá nado gọalọna Lakisi; Jọsua sọ hò e po omẹ etọn lẹ po, kaka é ma do pò mẹde dai nẹ̀.

³⁴ Jọṣua sọ tón sọn Lakisi, po Islaeli lẹpo po po e po, wá Eglọni, yé sọ dosla do kọ̀ji nẽ, bo hòavùn hẹ ẹ;

³⁵ yé sọ yí i to azája nẹ gbè, bo yi onù ohi tọn do hò e, ayiha he tín to e mẹ lẹpo e hù súdo pátapata to gbenẹgbe, kẹdẹdi ehe é wà hlan Lakisi lẹpo.

³⁶ Jọṣua sọ hẹji yì sọn Eglọni, po Islaeli lẹpo po po e po, wá Heblọni; yé sọ hòavùn hẹ ẹ:

³⁷ yé sọ yí i, bo yí onù ohi tọn do hò e, po ahọlu etọn po, po tòdaho etọn lẹpo po, po ayiha he tin to e mẹ lẹpo po; é ma pò mẹde dai; kẹdẹdi ehe é wà hlan Eglọni lẹpo; aigba é hù i súdo patapata, po ayiha he tin to e mẹ lẹpo po.

³⁸ Jọṣua bo lẹ́, po Islaeli lẹpo po po e po, wá Debili: bo sọ hòavùn hẹ ẹ:

³⁹ Ewọ sọ yí i, po ahọlu etọn po, po tòdaho etọn lẹpo po: yé sọ yí onù ohi tọn do hò yé, bo hù ayiha he tin to e mẹ lẹpo súdo patapata; é ma pò mẹde dai gba: le é wà hlan Heblọni do mọwẹ é wà hlan Debili do, podọ hlan ahọlu etọn; dile é wà ga hlan Libna podọ hlan ahọlu etọn.

⁴⁰ Mowẹ Jọṣua hò aigba lẹpo do, otò okọta tọn, po hùwaji po, po dòdòklidò po, po dòdomẹ lẹ po, po ahọlu yetọn lẹpo po; é ma pò mẹde dai: ṣigba é hù núhe to gbigbọ lẹpo súdo patapata, dile OKLUNỌ, Jiwheyẹwhe Islaeli tọn, degbè do

⁴¹ Jọṣua hò yé sọn Kadesi-balnea yèdọ jẹ Gaza, po otò Gọsẹni tọn lẹpo po, yèdọ jẹ Gibioni.

⁴² Ahọlu helẹpo, po aigba yetọn po wẹ Jọsua yí to ojlẹ dopo mẹ, na OKLUNỌ, Jiwheyẹwhe Islaeli tọn hòavùn na Ialaeli wutu.

⁴³ Jọṣua po Islaeli lẹpo po po e po sọ lẹ́gó do osla mẹ to Gilgali.