JẸLEMIA 7 - BIBLU WIWE LỌ 1923

¹ OHÓ hewá Jẹlemia de sọn OKLUNỌ de, dọmọ,

² Sitetọ họ̀n gbo ohò OKLUNỌ tọn ton mẹ, bo lá ohó he to finẹ, bo dọmọ, Mì sè ohó OKLUNỌ tọn, mì Juda tọn lẹpo, he nọ biọ whégbè to hòngbo helẹ̃ ji nado litaina OKLUNỌ.

³ Le we OKLUNỌ awhànpa lẹ tọn dọ, Jiwheyẹwhe Islaeli tọn, Mì vò aliho mitọn lẹ jlado po wiwà mitọn lẹ po, Yẹn na sọ hẹn mì nò otẹn he mẹ.

⁴ Mì dotu to ohó lalonọ lẹ mẹ blo, dọmọ, Tẹmpli OKLUNỌ tọn lọ, tẹmpli OKLUNỌ tọn lọ, tẹmpli OKLUNỌ tọn lọ, wẹ ehelẹ.

⁵ Na eyín mìwlẹ jla aliho mitọn lẹ do mlenmlẹn po wiwà mitọn lẹ po; eyín mìwlẹ hẹn whẹ̀dida sọ mlẹnmlẹn to omẹ de po kọmenu etọn po ṣẹnṣẹn;

⁶ eyín mìwlẹ ma bianukunna ojonọ, otósiọvi, po asusiọsi po, bo ma sọ kòn ohùn homẹvọnọ to oten he me, bo ma sọ zinzọnlin hodo yẹwhe dẽvo le hlan awugble mitọn titi gba:

⁷ whenenu wẹ yẹn na hẹn mì nado nò otẹn he mẹ, to aigba he yẹn ko na hlan otò mitọn lẹ mẹ, sọn hóhówhenu yèdo kakadoidoi

⁸ Dayi e go, mìwlẹ to tudo to ohó lalonọ lẹ mẹ, he ma sọgan doale

⁹ Be mìwlẹ na to ajojẹ, to mẹhù, bo to ayọde, bo yí lalo do tó whiwhle, bo to nuwhẹnwan mẹ̀ hlan Baali, bo sọ to zọnlinzin hodo yẹwhe devo lẹ mẹhe mìwlẹ ma ko yọnẹn,

¹⁰ bo sọ wá bo ṣite to nukọn ṣie to ohọ̀ he mẹ, ehejì yè ylọ oyín ṣie do, bo didọmọ, Yè whlẹn mí; na mìwlẹ nido to osùnú helẹ wà?

¹¹ Bé ohọ́ he, he yè yiylọ gbọn oyín ṣie dali, Yè hẹn lẹzùn odò ajoto lẹ tọn de to nukun mitọn lẹ mẹ wẹ? Dayi e go, Yẹn, yèdọ Yẹn, ko mọ ẹn, wẹ OKLUNỌ dọ.

¹² Ṣigba mì yì dinvie jẹ otẹn ṣie he tin to Ṣilo mẹ, fie yẹn hen oyín ṣie nado nọ nọ̀ to whẹwhẹwhenu, bo pòn núhe yẹn wà hlan ẹn na kanyinylan omẹ ṣie lẹ Islaeli tọn.

¹³ Podo dinvie na mìwlẹ ko wà azọn he lẹpo wutu, wẹ OKLUNỌ dọ, bọ yẹn sọ dọhó hlan mìwlẹ, finfọ́n to afọnnufú bo to hódọ, ṣigba mìwlẹ ma sè gba; bọ yen sọ ylọ mì, ṣigba mìwlẹ ma siọ gba:

¹⁴ enẹwutu wẹ yẹn na wà hlan ohọ̀ lọ, he yè to yiylọ gbọn oyín ṣie dali, ehemẹ mìwlẹ dotudo, podọ hlan otẹn lọ he yen na hlan mì podọ hlan otọ́ mìton lẹ dile yẹn ko wà hlan Ṣilo do.

¹⁵ Podọ yen na sọ zé mì dlangbé sọn nukun ṣie mẹ, dile yẹn ko zé mẹmẹsunnu mitọn lepo dlangbé do, yèdọ okún Eflaimi ton lẹpo pete.

¹⁶ Enẹwutu hiẹ hodè na omẹ helẹ blo, mọ hiẹ sọ zé awhá daga kavi odè na yé blo, mọ hiẹ sọ basi avùngbò hlan mi blo: na yẹn ma na sè we gba.

¹⁷ Bé hiẹ ma mọ núhe yé to wiwà to tòdaho Juda tọn lẹ mẹ, podọ to alihogbo Jelusalẹm tọn lẹ mẹ?

¹⁸ Yọpọ lẹ to nake sinyan, otọ́ lẹ to mìyọn pla, podọ yọnnusi lẹ to linfilí ho, nado basi aklahihi lẹ hlan ahọsi olọn tọn lọ, podọ nado kòn avọ́ nunina nùnù lẹ jẹgbonu hlan yẹwhe dẽvo lẹ, na yé nido hẹnhomẹgble mi hlan adi.

¹⁹ Bé yé hẹnhomegble mi hlan adi? we OKLUNỌ dọ; be yede ma wẹ yé hẹnhomẹgblena, hlan ofluje nukunmẹ yétọn titi lẹ tọn?

²⁰ Enẹwutu le wẹ OKLUNỌ JIWHEYẸWHE dọ: Dayi e gò, adi ṣie po homẹwlu ṣie powẹyè na kòn jẹgbonu do otẹn he ji, do gbẹtọ ji, podọ do gbékanlin ji, podọ dọ atin dangbo tọn lẹ ji, podọ do sinsẹ́n aigba tọn ji; podọ é na to jiji, yè ma na hẹn ẹn ṣi.

²¹ Le wẹ OKLUNỌ awhànpa lẹ tọn dọ, Jiwheyẹwhe Islaeli tọn: Yí avọ́ nunina mimẹ̀ mitọn lẹ dogọ́ avọ́ mitọn lẹ, mì ni sọ to olàn dù

²² Na yẹn ma dọhó hlan otọ́ mitọn lẹ kavi degbèna yé to azán he gbè yẹn hẹn yé tón sọn aigba Egipti tọn mẹ, gbọn avọ́ nunina mimẹ̀ lẹ kavi avọ̀ lẹ tọn dali gba:

²³ Ṣigba onú he wẹ yẹn degbèna yé dọmọ, Mì nọ tuntóai hlan ogbè ṣie, yẹn na sọ yín Jiwheyẹwhe mitọn, míwlẹ na sọ yín omẹ ṣie lẹ: mì bo sọ nọ zinzọnlin to aliho ṣie lẹpo mẹ he yẹn degbèna mì, na é nido yín dagbe to mì de.

²⁴ Ṣigba yé ma tuntóai kavi dotó yetọn ai gba, ṣigba to zọnlinzin to hónamẹ yetọn titi lẹ mẹ podọ to otasinyẹn ayiha ylankan yetọn tọn mẹ, bo sọ to godogọyì nukọnyì ma gba.

²⁵ Sọn azán he gbè gbọn otò mitọn lẹ tón sọn aigba Egipti tọn ji jẹ azán he gbè, wẹ yẹn ko to devi ṣie yẹwhegan lepo dohlan mì, tọ fìnfòn afọnnufù egbesọegbesọ bo to yé dohlan yé:

²⁶ Gãnṣo y e ma tuntóai hlan mi, kavi dotó yetọn ai gba, ṣigba hẹn okọ̀ yetọn lín: yé wà oylan hugan otọ́ yetọn lẹ.

²⁷ Hiẹ na sọ dọ ohó he lẹpo hlan yé; ṣigba ye ma to na tuntóai hlan we gba: hiẹ na sọ ylọ hlan yé ga ṣigba yé ma to na siọ we gba.

²⁸ Hiẹ na sọ dọ hlan yé dọ, Akọta he ma ko tuntóai hlan ogbè OKLUNỌ Jiwheyẹwhe yetọn tọn wẹ ehe, bo ma sọ yí mẹplọnlọ: yè hẹn nugbowà súdo, yè sọ sán ẹn sè sọn onù yetọn mẹ.

²⁹ Sán ojẹgbakun towe sẹ̀, Hiẹ Jelusalẹm, bọ zé e dlangbé, bo zé avi de daga to fìyìaga vọtọ lẹ go; na OKLUNỌ ko gbódlanai bo sọ hò whẹndo homegble etọn tọn, pla,

³⁰ Na ovi Juda tọn lẹ ko wà ene he yín oylan to nukun ṣie mẹ, wẹ OKLUNỌ dọ: Ye ko zé osunu yetọn lẹ do ohọ lọ mẹ; he yè to yiylọ gbọn oyín ṣie dali, nado flu i.

³¹ Yé ko sọ dó otẹn yìaga Tofẹti tọn lẹ, he tin to agbado visunnu Hinọmi tọn tọn mẹ, nadò nọ mẹ̀ visunnu yetọn lẹ po viyọnnu yétọn lẹ po to miyọn mẹ; ehe yen ma degbèna, mọ é ma biọ ayiha ṣie mẹ wá gba.

³² Enẹwutu, dayi e go, azán lẹ lọ wá, wẹ OKLUNỌ dọ bọ yè ma na sọ ylọ ẹ Tofẹti ba, kavi agbado visunnu Hinọmi tọn tọn, adavo agbado Ohùjá tọn: na yé na nọ diṣiọ to Tofẹti mẹ, na otẹn dẽvo de ma na tin finẹ wutu.

³³ Osiọ omẹ he lẹ tọn lẹ na yín nu dùdù na ohẹ̀ olọn tọn lẹ, podọ na gbékanlin aigba tọn lẹ; mẹde ma na sọdozínyé mẹgba.

³⁴ Whenẹnu wẹ yẹn na hẹn nado doalọte sọn todaho Juda tọn lẹ mẹ, podọ sọn alihogbo Jelusalẹm tọn lẹ mẹ, ogbè aglinjẹ tọn po ogbè homehùn tọn po, ogbè asisúnọ tọn po ogbè asiyoyọ tọn po: na aigba lọ na lẹzùn aigbọgbé de.