JẸLEMIA 50 - BIBLU WIWE LỌ 1923

¹ OHO he OKLUNỌ dọ gbọn Babilọni tọn dali, gbọn aigba Kaldeanu lẹ tọn tọn dali, gbọn Jẹlemia yẹwhegán lọ dali.

² Mì lá to akọta lẹ ṣẹnṣẹn bo dèmisẽlu, bo zé asia de daga; mì dèmisẽlu, mì sọwhla blo: mì dọmọ, Yè yí Babilọni, yè dowinyan Bẹli, Yè gbà Mẹlodaki liai; yè dowinyan bosiọ etọn lẹ, yè gbà ovòdun etọn lẹ liai.

³ Na akọta de hẹji sọn agewaji ja e ji to finẹ, he na hẹn aigba etọn zùn avọjẹ, bọ mẹde ma na nò e mẹ: yè hẹn yé liònyì, yẹn hẹn yé yì, gbẹtọ po gbékanlin po.

⁴ To azán nelẹ mẹ, podọ to ojlẹ nẹ mẹ, wẹ OKLUNỌ dọ, ovi Islaeli tọn lẹ na wá, yé po ovi Juda tọn lẹ po dopọ; yé na to yìyì to aliho yetọn ji po avi po, bo na to OKLUNỌ Jiwheyẹwhe yetọn din.

⁵ Yé na to kinkanbiọ gbọn Ziọni tọn dali po nukunmẹ yetọn lẹ po hlanfidali, dọmọ, Mì wá, yé na kòn yéde dopọ hlan OKLUNỌ to alẹ̀nù madopodo de mẹ he ma na yín winwọn.

⁶ Omẹ ṣie lẹ ko yín lẹngbọ búbú: lẹngbọhọtọ yetọn lẹ ko hẹn yé nado dánbú, yé ko ló yé yì to osé lẹ ji: yé ko yì sọn osé ji jẹ okọta ji, yé ko wọn ogbọjẹ tẹnmẹ yetọn.

⁷ Yé mẹhe mọ yé lẹpo wẹ ko dù yé và: mẹglatọ yetọn lẹ sọ dọmọ, Míwlẹ ma ylannuwà gba, na yéwlẹ ko wàylando do OKLUNỌ go wutu, fininò dódó tọn, yèdọ OKLUNỌ, otódo otọ́ yetọn lẹ tọn.

⁸ Mì họ̀nyì sọn gblagbla Babilọni tọn mẹ, bo sọ tónjẹgbonu yì sọn aigba Kaldeanu lẹ tọn mẹ, bo sọ tin di alúnkun to lẹngbọpa lẹ nukọn.

⁹ Na, pọ́n, yẹn na fọ́nadán bo sọ hẹn obépli akọta daho lẹ de tọn sọn otò agéwaji tọn mẹ nado hẹji wá Babilọni ji: yé na sọ tò yéde do ohaji do e ji; finẹ wẹ ewọ na yín wiwle sọn: ogá yetọn lẹ na tin di sunnu hlọnhlọnnọ de tọn he basi wènsinọ; he ma nọ lẹ́gọ̀ tata

¹⁰ Podọ Kaldea na yín ogblannu de: yé he yí i do dùgbanna lẹpo na yín opékọnọ, wẹ OKLUNỌ dọ.

¹¹ Na míwlẹ yín homẹhùnnọ wutu, na mìwlẹ jaya wutu, mì mẹhe wla ogú ṣie emi, na mìwlẹ yín jidetọ di yìnsiwhe to ogbé kòn, bo sọ to awhádo di osósú huhlọnnọ lẹ;

¹² onọ mitọn na yín winyanmọtọ badabada; ewọ he ji mì na sọ yín oflunọ: dayi e go, ewọ yín godotọpete akọta lẹ tọn, zungbo de, aigba húhú de, po ozùnkan de po.

¹³ Na homẹgble OKLUNỌ tọn wutu é ma na yín ninò gba, ṣigba é na yín ojẹvó petepete: omẹ he gbọn Babilọni dali jei lẹpo na yín awujinọ, bo sọ dèpislọ do azònylankan etọn lẹpo.

¹⁴ Mì tò míde do haji do Babilọni ji lédo pé, mì mẹhe dé ogábá lọ lẹpo, ségá do e, mì pò ogá lẹ de dai blo: na ewọ ko wàylando do OKLUNỌ go.

¹⁵ Mì dabóbó do e ji lédo pé; ewọ ko jó alọ etọn, yè hẹn agbó etọn lẹ jai, yè sisó odòkọ etọn lẹ liai: na ahọsuyí OKLUNỌ tọn wẹ; mì yiahọsu to e go; le ewọ ko wà do, wà hlan ẹn.

¹⁶ Mì sán núdotọ lọ sè sọn Babilọni mẹ, po ewọ he hẹn agbogọdọẹ lọ go to ojlẹ ojijẹ tọn mẹ po: na osi ohi nukunbia tọn lọ, yé na lé omẹ dopodopo do omẹ etọn lẹ de, yé na sọ họ̀nyì omẹ dopodopo jẹ aigba etọn titi ji.

¹⁷ Islaeli wẹ lẹngbọ kikata lẹ de; kinnikinni lẹ ko yàn ẹn yì: tintan ahọlu Ásilia tọn ko dù i và; podọ to ehe godo Nẹbukadlẹzali ahọlu Babilọni tọn ko gbà ohú etọn lẹ.

¹⁸ Enẹwutu le wẹ OKLUNỌ awhànpa lẹ tọn dọ, Jiwheyẹwhe Islaeli tọn: Dayi e go, yẹn na sayahẹ ahọlu Babilọni tọn po aigba etọn po, dile yẹn ko sayahẹ ahọlu Asilia tọn do.

¹⁹ Yẹn na sọ vó Islaeli hẹnwá jẹ apó etọn mẹ, ewọ na sọ nọ yìn ede to Kalmẹli po Baṣani po go, alindọn etọn na sọ yín pékọnọ to okọta Eflaimi tọn lẹ ji podọ to Gileadi mẹ.

²⁰ To azán nẹlẹ mẹ, podọ to ojlẹ nẹ mẹ, wẹ OKLIJNỌ dọ, oylanwà Islaeli tọn na yín dindin, yè ma na sọ mọ de; podọ ylando Juda tọn, yé ma na sọ yín mimọ: na yẹn na jona yé mẹhe yẹn jódai di pipòtọ de lẹ.

²¹ Hẹji yì aigba atẹsitọ tọn ji, yèdọ do e ji, podọ do tòmẹnu odlapón tọn lọ ji: hù bo klandovo, wẹ OKLUNỌ dọ, bo sọ wà kẹdẹdi ehe yẹn degbèna we lẹpo.

²² Hunhlun awhàn tọn de tin to aigba lọ mẹ, po vivà daho tọn po.

²³ Nawẹ yè hẹn ogòmẹ aigba pete lọ tọn sán sọn ṣẹnṣẹn bo sọ gbà dole nawẹ yè hẹn Babilọni lẹzùn ovọ́jẹ de dole to akọta lẹ ṣẹnṣẹn

²⁴ Yẹn ko do omọ̀ de na we, hiẹ sọ yín wiwle ga, Hiẹ Babilọni E, hiẹ ma sọ yín ayipatọ gba: yè mọ hiẹ, bo sọ wle ga, na hiẹ ko hoavùn hẹ OKLUNỌ wutu.

²⁵ OKLUNỌ ko hùn awhànfunnuhò etọn, bo bó awhànfunnu adidùdù etọn tọn lẹ jẹgbonu: na OKLUNỌ, OKLUNỌ awhànpa lẹ tọn, tindo azón de nado wà to aigba Kaldeanu lẹ tọn mẹ

²⁶ Mì wá e ji sọn agbègbè lẹpo ji, mì hùn agbànhó etọn lẹ: mì dón ẹn pli di okiti lẹ, bo sọ klan ẹn dovo: mì dike núde yín jódai sọn ewọ mẹ blo.

²⁷ Hù oyìnsú etọn lẹpo; gbọ yé ni jẹte yì hùhùten: dindọn hlan yé na yè hẹn azán yetọn wá, ojlẹ odlapón yetọn tọn.

²⁸ Ogbè yé he họ̀nyì bo sọ hòngán sọn aigba Babilọni tọn mẹ lẹ tọn, nado lá to Ziọni mẹ ahọsuyí OKLUNỌ Jiwheyẹwhe mítọn tọn, ahọsuyí tẹmpli etọn tọn.

²⁹ Ylọ ogásétọ susu pli do Babilọni ji, yé he dó ogába lọ lẹpo; dosla do e ji lédo pé; a dike omẹ etọn de hòngán blo: nahọsu i kẹdẹdi azón etọn; kẹdẹdi ehe ewọ ko wà lẹpo, wà hlan ẹn: na ewọ ko yín saklanọ do OKLUNỌ go, do Omẹ Wiwe Islaeli tọn lọ go.

³⁰ Enẹwutu wẹ yọ̀pọ sunnu etọn lẹ na jai to alihogbo eton lẹ mẹ, podọ sunnu etọn awhàn tọn lẹpo na sọ yín hinhẹnwá abọẹninọ mẹ to azán nẹ me, wẹ OKLUNỌ dọ.

³¹ Dayi e go, yẹn tin agò do ogo we, hiẹ omẹ saklanọ E, wẹ OKLUNỌ dọ, OKLUNỌ awhànpa lẹ tọn: na yè hẹn azán towe wá, ojlẹ he yẹn na do dla we pọ́n.

³² Bọ Osaklanọ na mùsa bo jai, bọ mẹde ma na fọ́n ẹn tite: Yẹn na so pla miyọn de to tòdaho lẹ mẹ, bọ é na dù mẹhe tin lédo e lẹpo và.

³³ Le wẹ OKLUNỌ awhànpa lẹ tọn dọ: Yè bianukunna ovi Islaeli tọn lẹ po ovi Juda tọn lẹ po dopọ: podọ yé he bó yé mẹglọnọ lẹ hẹn yé go gligli; yé kó nado gbọ yé ni yì.

³⁴ Huhlọnnọ wẹ oflitọ yetọn; OKLUNỌ awhànpa lẹ tọn wẹ oyín etọn: ewọ na yí owhèhó yetọn dọ mlẹnmlẹn, na ewọ nido na ogbọjẹ hlan aigba lọ, bo sọ hẹn tòmẹnu Babilọni tọn lẹ nabọẹ.

³⁵ Ohi de tin to Kaldeanu lẹ ji, wẹ OKLUNỌ dọ, podọ to tòmẹnu Babilọni tọn lẹ ji, podọ to ahọvi etọn lẹ ji, podọ to omẹ nuyọnẹntọ etọn lẹ ji.

³⁶ Ohi de tin to ogòyítọ lẹ ji, yé na sọ nọ dèafù: ohi de sọ tin to omẹ hlọnhlọnnọ lẹ ji, yè na sọ hẹn yé jeflu.

³⁷ Ohi de tin to osé yetọn lẹ ji, podọ to kẹkẹ yetọn lẹ ji, podọ to gbẹtọ flusọ he tin to gblagbla e tọn mẹ lẹpo ji, yé na sọ lẹzùn di yọnnusi lẹ: ohi de tin to adọkunnu etọn lẹ ji, yé na sọ yín fìnfìnbé.

³⁸ Akú de tin to osìn etọn lẹ ji, yé na sọ yín húhú: na aigba bosiọ winwlan lẹ tọn de wẹ, yé sọ yín nulunọ to ovòdun yetọn lẹ ji.

³⁹ Enẹwutu wẹ gbékanlin zùnkan mẹ tọn lẹ po kanlin he nọ gbó lẹ po na nọ nò finẹ, podọ gòngo lẹ na nọ nó e mẹ: e mẹ ma na sọ yín ninò gbède kakadoi; mọ é ma na sọ yín ninò e mẹ sọn owhẹ̀ndo jẹ íwhẹndo.

⁴⁰ Di whenuena Jiwheyẹwhe sisé Sọdọmi po Gomọla po po todaho sẹpo etọn lẹ po liai, wẹ OKLUNỌ dọ; mọwẹ omẹ de ma na nò finẹ, mọ visunnu visunnu tọn depope ma na wáwási to e mẹ gba.

⁴¹ Dayi e go, gbẹtọ lẹ de sọn agéwaji ja; po akọta daho de po, yè na sọ fọnadan ahọlu susu daga sọn adà nukọnpete aigba tọn lẹ mẹ

⁴² Yé hẹn ogába po owhán po go, okanọ wẹ yé, bo ma tindo lẹblanu de; ogbè yetọn to wányẹn taidi ohù, yé sọ hó osé lẹ ji; omẹ dopodopo tò to ohaji, di sunnu de hlan awhàn, do oji we, hiẹ viyọnnu Babilọni tọn E.

⁴³ Ahọlu Babilọni tọn ko sè linlin ye tọn, alọ etọn lẹ sọ zùn madogannọ: apè ko té do e go, po awuvó lẹ po di yọnnu de tọn lo ajipanu.

⁴⁴ Dayi e go, ewọ na hẹji wá taidi kinnikinni de son osakla Jọdani ton mẹ do fininò sinsinyen lẹ ji, aigba yẹn na hẹn yé dowezun ajiji yì sọn e de; podọ mẹdepope yè dè, ewọ wẹ yen na dè do e ji: na mẹnu we tin taidi yẹn? podọ mẹnu wẹ na dè ojlẹ de na mi? podọ mẹnu wẹ lẹngbọhọtọ lọ he na note to nukọn ṣie?

⁴⁵ Enẹwutu mì sè hónamẹ OKLUNỌ tọn, he ewọ ko yí do Babilọni go; po linlen etọn lẹ po, he ewọ ko lẹn do aigba Kaldeanu lẹ tọn go: nugbonugbo yé na dòn yé wó dai, yèdọ omẹ flinflin lẹngbọpa lọ tọn lẹ; nugbonugbo ewọ na hẹn fininò yetọn zùn ovóje to yé de.

⁴⁶ To hunhlun yíyí Babiloni tọn tọn ji aigba sisọ, yè sọ sè awhá lọ to akọta lẹ ṣẹnṣẹn.