JẸLEMIA 47 - BIBLU WIWE LỌ 1923

¹ OHÓ OKLUNỌ tọn he wá Jẹlemia yẹwhegán lọ de gbọn Filistini lẹ tọn dali, whẹpo dọ Falo hò Gaza.

² Le wẹ OKLUNỌ dọ: Dayi e go, osìn lẹ tite daga sọn agéwaji, bo na sọ lẹzùn tòsìsa ogófla de, bo na sọ gbà aigba lọ po omẹ he tin to e mẹ lẹpo po, tòdaho lọ po yé he nọ nò e mẹ lẹ po: gbẹtọ lẹ na sọ dawhá podọ tòmẹnu aigba lọ tọn lẹpo na sọ dohùkuhulu.

³ Podọ afọ zingidi omẹ sinsinyẹn etọn lẹ tọn tọn, to zínzín kẹkẹ etọn lẹ tọn mẹ, to lilè kẹkẹfọ etọn tọn lẹ mẹ, otọ́ lẹ ma sọ pọ́n godo hlan ovi yetọn lẹ dali na madogan alọ lẹ tọn;

⁴ na azán he wá nado hẹn Filistini lẹpo gble tọn wutu, nado sán alọgọtọ he pò lẹpo sè sọn Tile po Zidọni po mẹ: na OKLUNỌ na hẹn Filistini lẹ, pipòtọ ohù tó Kaftoli tọn tọn gble.

⁵ Yè hẹn otapipa wá Gaza ji; yè hẹn Askelọni wá jẹ ovó mẹ, pipòtọ agbàdo yetọn tọn; nawe hiẹ na doalán dewe dẹn sọ?

⁶ Hiẹ ohi OKLUNỌ tọn È, nawẹ é na dẹn sọ whẹpo hiẹ yín obọenọ? Yí dewe do apà towe mẹ; gbọje, bo tin abọe.

⁷ Nawẹ hiẹ sọgan yín abọẹnọ do, mimọ OKLUNỌ ko na asẹ de e? do Askelọni go, do ohù tó lọ go, finẹ wẹ ewọ ko dè e te.