JẸLEMIA 46 - BIBLU WIWE LỌ 1923

¹ OHÓ OKLUNỌ tọn he wá Jẹlemia yẹwhegán lọ de gbọn akọta lẹ lọ tọn dali.

² Na Egipti tọn: gbọn awhànfuntọ Falo-neko aholu Egipti tọn lẹ tọn dali, he tin to otò Euflate dali to Kalsemẹsi mẹ, he Nebukadlẹzali ahọlu Babilọni tọn hò to owhè enẹtọ Jehọiakimi visunnu Josia tọn, ahọlu Juda tọn tọn mẹ.

³ Mì jla gáhẹnú lọ po awọyínú po do, bo dòn sepọ jẹ awhànfuntẹn.

⁴ Blapana osé le, bo hé yé ji, mì osónọ lẹ, bo sọ site to gbonu po awhàngbakún mitọn lẹ po; mì sún owhán le, mi yí agawu oganlìnlọn tọn lẹ do ogo.

⁵ Etewutu wẹ yẹn ko mọ ẹn? Yè hen yé yín avosatọ bo sọ yín lilé hlangodo; yè linú hlọnhlọnnọ yetọn lẹ liai, bo sọ hen yé họ̀nyì ola, bo ma sọ pọ́n godo: obudaho tin to awà lẹpo ji, wẹ OKLUNỌ dọ.

⁶ A dike awuyatọ họ̀nyì blo, a sọ dike sunnu hlonhlonnọ hòngán blo; to agéwaji me to otò Euflate tọn dali wẹ yé ko mùsa bo so jai.

⁷ Menu wẹ ehe he tite daga taidi Nile lo, osìn mẹheton lẹ to yéde mimí taidi otò lẹ?

⁸ Egipti tite daga taidi Nile, osìn etọn le sọ mìmí yéde taidi otò lẹ: ewọ sọ domọ, Yẹn na tite daga, yẹn na inyon aigba ji; yẹn na và tòdaho lọ po tomẹnu etọn lẹ po.

⁹ Hẹji yì, mì osú lẹ; bo sọ jẹadán, mì kẹkẹ lẹ; bo sọ gbọ sunnu hlọnhlọnnọ lẹ ni jẹgbonu yì: Kusi po Puti po, he hẹn awọyínu lọ go; po Ludimi lọ po, he hẹn ogá lọ bo sọ dé ẹ.

¹⁰ Na azán nẹ wẹ azán OKLUNỌ tọn, OKLUNỌ awhànpa lẹ tọn, azán ahọsuyí ton de, na é nido yíahọsu na ede sọn meglatọ etọn lẹ mẹ: podọ ohi lọ na sọ dùsúdo bo sọ yín opókọnọ, bo sọ nù gigú etọn sọn ohùn yetọn mẹ: na OKLUNỌ, OKLUNỌ awhànpa lẹ tọn, tindo avsánnu de to otò agéwaji mẹ to otò Euflate dali.

¹¹ Hẹji yì biọ Gileadi mẹ, bo yí alángblenú, Hiọ awhli viyọnnu Egipti tọn: ovú mẹ wẹ hiẹ to obó lẹ zán te: azònhẹngbọ de ma tin finẹ na we gba

¹² Akọta lẹ ko sè owinyan towe tọn, aigba sọ tin gú na awhá towe: na omẹ hlọnhlọnnọ ko mùsa jẹ hlọnhlọnnọ lọ ji, yè hẹn yé omẹ awe lẹ jai dopọ.

¹³ Ohó he OKLUNỌ dọ hlan Jẹlemia yẹwhegán lọ, dọ le Nẹbukadlẹzali ahọlu Babilọni tọn do wá bo hò aigba Egipti tọn do.

¹⁴ Mì lá to Egipti me bo dèmisẽlu to Migdọli mẹ, bo sọ dèmisẽlu to Nọfi mẹ podọ to Tahpanhẹsi mẹ: mì dọmọ, Ẹite gbonu, bo wleawuna dewe; na ohi lọ ko dùsúdo lédo we pó.

¹⁵ Etẹwutu wẹ yè zà omẹ huhlọnnọ towe lẹ yì? Yé ma nọte gba, na OKLUNỌ zín yé dai wutu.

¹⁶ E hẹn mẹsusu nado mùsa, mọwẹ, yé jai ode do awetọ ji: Yé sọ dọmọ, Mì tite, bo gbọ mí ni sọ vọ yì jẹ omẹ mítọn lọsu lẹ de podọ jẹ aigba ajitẹn mítọn tọn, son ohi nukunbianamẹnọ lọ mẹ.

¹⁷ Yé dawhá finẹ, awhá tata de wẹ Falo ahọlu Egipti tọn; é ko gbọ ojlẹ didè ju yì.

¹⁸ Le yẹn togbè, wẹ Ahọlu lọ dọ, oyín mẹhetọn yín OKLUNỌ awhànpa lẹ tọn, nugbonugbo taidi Taboli to osé lẹ ṣẹnṣẹn, podọ taidi Kalmeli to ohù tó, mọwẹ ewọ na wá do.

¹⁹ Só hiẹ he nò hẹ viyọnnu Egipti tọn, basi núzinzán mẹmẹglọ tọn na dewe: na Nọfi na lẹzùn ojẹvú de, bo sọ yín mimẹ̀, matin tòmẹnu.

²⁰ Egipti wẹ oyìnsiwhe whànpẹnọ talala de; aigba yè hẹn slegàngàn jẹgbonu sọn agéwaji wá e ji.

²¹ Omẹ dàpà etọn lẹ ga to gblagbla etọn mẹ tin taidi oyìnvú apó tọn lẹ; na yè hẹn yé lẹ́ godo ga, yè hẹn yé họ̀nyì dopọ, yé ma nọte gba: na yè hẹn azán oya yetọn tọn wá yé ji, ojlẹ odlapún yetọn tọn.

²² Hunhlungbè etọn na yì taidi odàn lọ; na yé na dèdo po awhànfuntọ lẹ po, bo sọ wá e ji po asiọvi lẹ po, di sinsántọ nake tọn lẹ.

²³ Yé na sán zùnkan etọn liai, wẹ OKLUNỌ dọ, na é ma sogan yín dindin gba; na yé tin sù hú owèn lẹ, bo sọ yín madosọha wutu.

²⁴ Viyọnnu Egipti tọn wẹ yè na dowinyan; é na yín jijé do alọ omẹ agéwaji tọn lẹ tọn mẹ.

²⁵ OKLUNỌ awhànpa lọ tọn, Jiwheyẹwhe Islaeli tọn, dọmọ: Dayi e go, Yẹn na sayahẹ Amọni No tọn, po Falo po, po Egipti po gọ́na yẹwhe etọn lẹ po ahọlu etọn lẹ po; yèdọ Falo, po yé he dotudo e go lẹ po:

²⁶ podọ yẹn na sọ jó yé do alọ enẹlẹ he to ogbè yetọn lẹ din lẹ tọn mẹ, podọ alọ Nẹbukadlẹzali ahọlu Babilọni tọn tọn mẹ, podọ do alọ devi etọn lẹ tọn mẹ: podọ enegodo yè na nọ nọ̀ e mẹ, le é te to azán hóhó tọn lẹ mẹ, wẹ OKLUNỌ dọ.

²⁷ Ṣigba hiẹ dibu blo, Jakob devi ṣie lọ, bo sọ yín avosatọ bloy hiẹ Islaeli: na, pọ́n, yẹn na whlẹn we sọn aganu, podọ okún towe sọn aigba mẹmẹglọ yetọn tọn mẹ; Jakob na lẹ́gọ̀, bo sọ yín abọẹnọ podọ to blẹo, mẹde ma na sọ hẹn ẹn savo.

²⁸ Hiẹ dibu blo, Jakob devi ṣie lọ, wẹ OKLUNỌ dọ; na yẹn tin to de we: na yẹn na basi opòdo gigọ́ akọta lẹ tọn de to fiedali yẹn ko yàn ye do, ṣigba yẹn ma na basi opòdo gigọ́ hiẹ tọn de gba; ṣigba yẹn na yí whẹ̀dida do doplọnlọ ogo we, bo na jó we do masayahẹ lala gba.