JẸLEMIA 39 - BIBLU WIWE LỌ 1923

¹ (TO owhè sinẹnẹtọ Zẹdekia ahọlu Juda tọn tọn mẹ, to osùn aotọ mẹ, wẹ Nẹbukadnẹzali ahọlu Babilọni tọn po awhànfuntọ etọn lẹpo po wá Jelusalẹm ji, bo glọn ẹn do;

² to owhè widopotọ Zẹdekia tọn mẹ, to osùn ẹnẹtọ mẹ, to azán sinẹnẹtọ osùn lọ tọn gbè wẹ yè basi gbigbà de to tòdaho lọ mẹ:)

³ bọ ahọvi ahọlu Babilọni tọn tọn lẹpo wá whégbè, bo sinai to ṣẹnṣẹn hòngbo lọ tọn mẹ, yèdọ Nẹlgali-ṣalezeli, Ṣamgalinebo, Salsekimi, Labi-salisi, Nẹlgali-ṣalezeli, Labi-magi, po pipòtọ ahọvi ahọlu Babilọni tọn tọn lẹpo po.

⁴ E sọ wá jọ whenuena Zẹdekia ahọlu Juda tọn po sunnu awhàn tọn lẹpo po mọ yé, whenẹnu wẹ yé họ̀nyì, bo jẹgbonu yì sọn tòdaho lọ mẹ to ozánmẹ, gbọn aliho ojipa ahọlu tọn tọn dali, to hòngbo lọ dali to odòkọ awe lẹ gblamẹ: ewọ sọ tón gbọn aliho Alaba tọn yì.

⁵ Ṣigba awhànfuntọ Kaldeanu lẹ tọn lẹ jemòji hodo yé, bo pla Zẹdekia to ofivotẹn Jẹliko tọn lẹ mẹ: podọ whenuena yé ko wle e, Ye hẹn ẹn heji wá Nẹbukadnẹzali aholu Babilọni tọn de jẹ Libla to aigba Hama tọn mẹ, ewọ sọ dọ whẹ̀dida lẹ hẹ ẹ.

⁶ Whenẹnu wẹ ahọlu Babilọni tọn hù visunnu Zẹdekia tọn lẹ to Libla mẹ to nukun etọn lẹ nukọn: ahọlu Babilọni tọn hù megbògbo Juda tọn lẹpo ga.

⁷ Humọ é dè nukun Zẹdekia tọn lẹ jẹgbonu, bo sín in do afọgàn lẹ mẹ, nado hẹn ẹn yì jẹ Babilọni.

⁸ Podọ Kaldeanu lẹ yí miyọn do mè ohò ahọlu tọn po ohò gbẹtọ lẹ tọn lẹ po, bo sọ hó odòkọ Jelusalẹm tọn lẹ liai.

⁹ Whenẹnu wẹ Nẹbuzaladani awhàngan ogànwhé tọn lọ bé pipotọ gbẹtọ lẹ tọn he pò to tòdaho lọ mẹ lẹ mẹglọmẹ yì biọ Babilọni mẹ wòvá lẹ ga, he sí je e de, po pipòtọ gbẹtọ lẹ tọn he pò pt.

¹⁰ Ṣigba Nẹbuzaladani awhàngan ogànwhé lọ tọn pòdai sọn wamọnọ gbẹtọ lẹ tọn mẹ, he ma tindo núde, dó aigba Juda tọn mẹ, bo na ovẹngle lẹ po ogle lẹ po yé to ojlẹ dopolọ mẹ.

¹¹ Dinvie Nẹbukadnẹzali ahọiu Babilọni tọn na asẹ gbọn Jẹlemia tọn dali hlan Nebuzaladani awhàngan ogànwhé lọ tọn, dọmọ,

¹² Yí ewọ bo pọ́n e go dagbedagbe, bo wà awugble de do e blo; ṣigba nọ wà hlan ẹn yèdọ dile ewọ na dọ hlan we do.

¹³ Mowẹ Nẹbuzaladani awhàngan ogànwhé lọ tọn domẹhlan, podọ Nẹbusazebani, Labi-salisi, po Nẹligali-salezeli po, Labi-magi, po ogándaho ahọlu Babilọni tọn tọn lẹpo po;

¹⁴ yé domẹhlan, bo dè Jẹlemia tẹ́n sọn awánu ogànwhé lọ tọn me, bo yí i hlan Gedalia visunnu Ahikami tọn, visunnu Ṣafani tọn de, na ewọ ni do hẹn ẹn yì owhé: mọwẹ ewọ sọ nò gbẹtọ lẹ ṣẹnṣẹn.

¹⁵ Dinvie ohó OKLUNỌ tọn wá Jẹlemia de, whenuẹna yè sú i do awánu ogànwhé lọ tọn mẹ, dọmọ,

¹⁶ Yì, bo dọhó hlan Ebẹdi-melẹki Etìopianu lọ, dọmọ, Le wẹ OKLUNỌ awhànpa lẹ tọn dọ, Jiwheyẹwhe Islaeli tọn: Dayi e go, Yẹn na hẹn ohó ṣie lẹ wá tòdaho he ji na oylan, podọ na dagbe ma gba; yé na yín hinhẹnsẹ to nukọn towe to azán nẹ gbè.

¹⁷ Ṣigba yen na whlẹn wẹ to azán nẹ gbè, wẹ OKLUNỌ dọ: hiẹ ma na sọ yín jijo do alọ omẹ ewlẹ tọn mẹ avosatọ mẹhe tọn hiẹ yín gba.

¹⁸ Na yẹn na whlẹn we nugbonugbo, hiẹ ma na sọ jai gbọn ohi lọ dali gba, ṣigba ogbè towe na tin na nuyanwẹnna de hlan we: na hiẹ ko yí tudido towe do yẹn mẹ wutu, wẹ OKLUNỌ dọ.