JẸLEMIA 37 - BIBLU WIWE LỌ 1923

¹ ZẸDEKIA visunnu Josia tọn dùgán di ahọlu, to otẹn Konia visunnu Jehọiakimi tọn mẹ, mẹhe Nẹbukadnẹzali ahọlu. Babilọni tọn hẹn zùn ahọlu do aigba Juda tọn mẹ.

² Ṣigba ewọ, kavi devi etọn lẹ, kavi omẹ aigba lọ tọn lẹ de ma tuntóai hlan ohó OKLUNỌ tọn lẹ gba, he é dọ gbọn yẹwhegán Jẹlemia dali.

³ Zẹdekia ahọlu lọ sọ do Jehukali visunnu Sẹlemia tọn, po Zẹfania visunnu Maaseia yẹwhenọ lọ tọn po hlan yẹwhegán Jẹlemia de, dọmọ, Hodó lò hlan OKLUNỌ Jiwheyẹwhe mítọn na mí.

⁴ Dinvie Jẹlemia to whégbè wá bo sọ to gbonu yì to gbẹtọ lẹ ṣẹnṣẹn: na yé ma ko yí i do ogànwhó gba.

⁵ Yè sọ hẹn awhànfuntọ Falo tọn lẹ jẹgbonu sọn Egipti wá whenuena Kaldeanu lẹ he glọn Jelusalẹm do lẹ sè linlin yé tọn, yé gbà kija sọn Jelusalẹm.

⁶ Whenẹnu wẹ ohó OKLUNỌ tọn wá yẹwhegán Jẹlemia de, dọmọ,

⁷ Le wẹ OKLUNỌ dọ, Jiwheyẹwhe Islaeli tọn: Le wẹ mì na dọ hlan ahọlu Juda tọn, he do mì hlan dẽ nado kanbiọ sọn dè; Dayi e go, awhànfuntọ Falo tọn lẹ, he yè hẹn jẹgbonu wá nado gọalọna mì, na lẹ́gọ̀ do Egipti biọ aigba yetọn titi mẹ.

⁸ Kaldeanu lẹ na sọ vó wá, bo hoavùn hẹ tòdaho he; yé na sọ yí i, bo yí miyọn do mè ẹn.

⁹ Le wẹ OKLUNỌ dọ: Mì klọ alindọn mitọn lẹ blo, dọmọ, Kaldeanu lẹ na fọ́nyì sọn mí de nugbonugbo: na yé ma na inyì gba.

¹⁰ Na le míwlẹ tlẹ KO hò awhànfuntọ Kaldeanu lẹ tọn pete he hoavùn hẹ mì lẹ, bo sọ sọnú yé luntón, gãnṣo yé na tite omẹ dopodopo to gòhọ etọn mẹ, bo yí miyọn do mó tòdaho he.

¹¹ E sọ wá jọ dọ whenuena yè gbà awhànfuntọ Kaldeanu lẹ tọn lẹ kija sọn Jelusalẹm mẹ na osi awhànfuntọ Falo tọn lẹ tọn,

¹² whenẹnu wẹ Jẹlemia tón jegbonu yì sọn Jelusalẹm mẹ nado yì biọ aigba Bẹnjamini tọn mẹ, nado yí mimá etọn sọn finẹ, to gblagbla gbẹtọ lẹ tọn mẹ.

¹³ Podọ whenuena é tin to hòngbo Bẹnjamini tọn mẹ, awhàn gán hihẹ tọn de tin finẹ, oyín mẹhetọn nọ yín Ilija, visunnu Ṣelẹmia tọn, visunnu Hanania tọn; é hen Jẹlemia yewhegán lo go, dọmọ, Hiẹ sí jei Kaldeanu lẹ de.

¹⁴ Whenẹnu wẹ Jẹlemia dọmọ, Lalo é yín; yẹn ma sí jei Kaldeanu lẹ de gba; ṣigba ewọ ma tuntóai hlan ẹn gba: mọ wẹ Ilija hẹn Jẹlemia go, bo hẹn ẹn wa ahọvi lẹ de.

¹⁵ Ahọvi lẹ sọ yín homẹgblenọ do Jẹlemia go, bo hò e, bo yí i do gànwhé to ohò Jonatani wékantọ lọ tọn mẹ: na yé ko basi enẹ na gànwhé lọ.

¹⁶ Whenuena yè hẹn Jẹlemia wá biọ ohò odòmẹ tọn lọ mẹ, podọ biọ gànhò lẹ mẹ, Jẹlemia ko sọ nai finẹ azán susu;

¹⁷ whenenu wẹ Zẹdekia ahọlu lọ domẹhlan, bo plan ẹn wá: ahọlu lọ sọ kanbiọ to nuglọ to owhé etọn gbè, bo dọmọ, Ohó de tin finẹ sọn OKLUNỌ de la? Jẹlemia sọ dọmọ, E tin. Ewọ sọ dọ ga dọ, Yè na jó hiẹ do alọ ahọlu Babilọni tọn tọn mẹ.

¹⁸ Humọ Jelemia do hlan ahọlu Zẹdekia dọ, Etẹmẹ wẹ yẹn ko wàylando do ogo we, kavi do devi towe lẹ go, kavi do omẹ he lẹ go, bọ mìwlẹ ko do yí mi do ganwhé?

¹⁹ Fie wẹ yẹwhegán mitọn lẹ te dinvie he dọdọdai hlan mìwlẹ, dọmọ, Ahọlu Babilọni tọn ma na wá mì ji, kavi aigba he ji gba?

²⁰ Podọ dinvie yẹn vè we, sè, klunọ ṣie ahọlu E: yẹn vè we, gbọ ovèvó ṣie ni flẹ do nukọn towe: bọ hiẹ ma na sọ hẹn mi nadolégò do ówhé Jonatani wékantọ lọ tọn gbè gba, yẹn nikã kú finẹ.

²¹ Whenẹnu wẹ Zẹdekia ahọlu lọ degbè, yé sọ yí Jẹlemia do awánu ogànwhé tọn mẹ, yé sọ nọ na agó akla tọn dopo e egbesọegbesọ sọn alihogbo akladatọ lẹ tọn ji, kaka yè do zán akla lẹpo tó tòdaho lọ mẹ. Le wẹ Jẹlemia nai do to awánu ogànwhé lọ tọn mẹ.