JẸLEMIA 35 - BIBLU WIWE LỌ 1923

¹ OHÓ he wá Jẹlemia de sọn OKLUNỌ de to azán Jehọiakimí visunnu Josia tọn ahọlu Juda tọn tọn le mẹ, dọmọ.

² Yì owhó Lekabinu lẹ tọn gbè, bo dọhó hlan yé, bo hẹn yé wá biọ ohò OKLUNỌ tọn mẹ, biọ dopo abò lẹ tọn mẹ, bo na ovẹ̃n yé nado nù.

³ Whenẹnu wẹ yẹn yí Jaazania visunnu Jẹlemia tọn, visunnu Habazenia tọn, po mẹmẹsunnu etọn lẹ po, po visunnu etọn lẹpo po, po owhé Lekabinu le tọn po pete;

⁴ yẹn sọ hẹn yé wá bio ohò OKLUNỌ tọn mẹ, biọ abò visunnu Hanani tọn mẹ visunnu Igdalia tọn, Jiwheyẹwhe gbẹtọ lọ, he tin to abò ahọvi lẹ tọn dali, he tin to aga abò Maaseia visunnu Ṣalumi tọn tọn, hihótọ ovẹ̃ngbà lọ tọn:

⁵ yẹn sọ zé kloba he gó na ovẹ̃n do visunnu ówhé Lekabinu lẹ tọn tọn nukọn, po kọfo lẹ po, Yen sọ dọ hlan yé dọ, Mì nù ovẹ̃n.

⁶ Ṣigba yé dọmọ, Mìwlẹ ma na nù ovẹ̃n de gba: na Jonadabi visunnu Lekabi otọ́ mítọn tọn dosénna mí, dọmọ, Mìwlẹ ma na nù ovẹ̃n de, míwlẹ, kavi visunnu mìton lẹ gbèdegbède:

⁷ mọ mìwlẹ ma na do ohò, kavi do okún, kavi do ovẹngle, kavi tindo depope gba: ṣigba azán mìton lepo wẹ mì na do nò gohò lẹ mẹ; na mì nido nọgbè azán susu to aigba lọ mẹ ehemẹ mì wáwási te.

⁸ Míwlẹ ko sọ sètónuna ogbè Jonadabi visunnu Lekabi otọ́ mítọn tọn ton to ehe me é nase mí te lẹpo, nado nù ovẹ̃n de to azán mítọn lepo mẹ blo, míwlẹ, asi mítọn lẹ, visunnu mítọn lẹ, kavi viyọnnu mítọn lẹ;

⁹ kavi nado do ohò lẹ na mí nado nọ nọ e mẹ blo: mọ mí ma tindo ovẹngle, kavi ogle, kavi okún gba:

¹⁰ ṣigba míwlẹ ko to gohó le mẹ nò, bo ko sètónuna, bo sọ wà kẹdẹdi ehe Jonadabi oto mítọn dosénna mí lẹpo.

¹¹ Ṣigba é sọ wá jọ, whenuena Nẹbukadnẹzali ahọlu Babilọni tọn hẹji wá biọ aigba lọ mẹ, wẹ míwlẹ dọmọ, Wá, bo gbọ mí ni yi Jelusalẹm na osi awhànfuntọ Kaldeanu lẹ tọn tọn, podọ na osi awhànfunto Silianu lẹ tọn tọn; mọ wẹ mìwlẹ sọ nọ Jelusalẹm mẹ.

¹² Whenẹnu wẹ ohó OKLUNỌ tọn wá Jelemia de, dọmọ,

¹³ Le we OKLUNỌ awhànpa lẹ tọn dọ, Jiwheyẹwhe Islaeli tọn: Yì, bo do hlan omẹ Juda tọn lẹ po tòmẹnu Jelusalẹm tọn lẹ po, dọ, Bó mìwlẹ ma na yí oplónnamẹ nado tuntóai hlan ohó ṣie lẹ? wẹ OKLUNỌ dọ.

¹⁴ Yè yí ohó Jonadabi visunnu Lekabi tọn tọn lẹ wà, he ewọ dosénna visunnu etọn lẹ ma nado nù ovẹ̃n, podọ jẹ egbé he yé ma nù núde, na yé sètónuna osén otọ́ yetọn tọn: ṣigba yẹn ko dọhó hlan mìwlẹ, finfọ́n afọnnufú bo to hódo; mìwlẹ ma ko sọ tuntóai hlan mi gba.

¹⁵ Yẹn ko do devi ṣie yẹwhegán lẹpo hlan mì ga, finfọn afọnnufú bo to yé dohlan, dọmọ, Mì lẹ́gọ̀ dinvie omẹ dopodopo sọn aliho ylankan etọn mẹ, bo jla wiwà mitọn lẹ do, bo sọ hodo yẹwhe devo lẹ yi nado sẹ́n yé blo, mìwlẹ na sọ nọ̀ aigba lọ mẹ he yẹn ko na hlan mì podọ hlan otọ́ mitọn lẹ: ṣigba mìwlẹ ma ko tó otọ́ mitọn dai gba, bo ma sọ tuntóai hlan mi.

¹⁶ Sọle visunnu Jonadabi visunnu Lekabi tọn tọn lẹ ko yí osén otọ́ yetọn tọn wà he ewọ do dosónna yé, ṣigba omẹ he lẹ ma ko tuntóai hlan mi gba;

¹⁷ enẹwutu le wẹ OKLUNỌ dọ, Jiwheyẹwhe awhànpa lẹ tọn, Jiwheyẹwhe Islaeli tọn: Dayi e go, Yẹn na hẹn oylan he yẹn ko dọ do yé go lẹpo wá Juda ji podọ tomẹnu Jelusalẹm tọn lepo ji: na yen ko dọhó hlan yé ṣigba ye ma ko sè wutu; bọ yẹn ko ylọ hlan yé, ṣigba yé ma ko siọ gba.

¹⁸ Jelemia sọ dọ hlan owhó Lekabinu lẹ tọn dọ, Le wẹ OKLUNỌ awhànpa lẹ tọn dọ, Jiwheyẹwhe Islaeli tọn: na míwlẹ ko sètónuna osén Jonadabi otọ mitọn tọn wutu, bo sọ yìn gbèdai etọn lẹpo, bo sọ wà kẹdẹdi ehe ewọ do dosénna mì lẹpo:

¹⁹ enẹwutu le wẹ OKLUNỌ awhànpa lẹ tọn dọ, Jiwheyẹwhe Islaeli tọn: Jonadabi visunnu Lekabi tọn ma na ba sunnusi de pò nado nọ site to nukọn ṣie kakadoi.