JẸLEMIA 34 - BIBLU WIWE LỌ 1923

¹ OHÓ he wá Jẹlemia de sọn OKLUNỌ de, whenuena Nẹbukadnẹzali ahọlu Babilọni tọn, po awhànfuntọ etọn lẹpo po, po ahọludu aigba lọ tọn lẹpo po he tin to ahọluigba etọn glọ, po akọta lẹpo po hoavùn hẹ Jelusalẹm, podọ hẹ tòdaho etọn lepo, dọmọ:

² Le wẹ OKLUNỌ dọ, Jiwheyẹwhe Islaeli tọn, Yì, bo dọhó hlan Zẹdekia ahọlu Juda tọn, bo dọ na ẹn, dọ, Le wẹ OKLUNỌ dọ, Dayi e go, Yẹn na jó tòdaho he do alọ ahọlu Babilọni tọn tọn mẹ, ewọ na sọ yí miyọn do mè ẹn;

³ hiẹ ma to na sọ hòngán tón sọn alọ etọn mẹ gba, ṣigba na yín wiwle nugbonugbo, podọ jijo do alọ etọn me; podọ nukun towe le na mọ nukun ahọlu Babilọni tọn tọn le, ewọ na sọ dọhó hẹ we onù pé onù, hiẹ na sọ yì jó Babilọni.

⁴ Gãnṣo sè ohó OKLUNỌ tọn, Zẹdekia E ahọlu Juda tọn le wẹ OKLUNỌ dọ gbọn hiẹ tọn dali dọ, Hie ma na kú gbọn ohi lọ dali gba;

⁵ hiẹ na kú to jijọho mẹ; po mimẹ̀ otọ́ towe lẹ tọn po, ahọlu nukọntọn lẹ he tin jẹnukọnna we mọwẹ yé na basi mimẹ̀ de na we; yé na sọ ví we, domo, Só klunọ! na yen ko dọ ohó lọ, we OKLUNỌ dọ.

⁶ Whenẹnu wẹ Jẹlemia yẹwhegán lọ dọ ohó he lepo hlan Zẹdekia ahọlu Juda tọn to Jelualem mẹ,

⁷ whenuena awhànfunto ahọlu Babilọni tọn tọn lẹ hoavùn hẹ Jelusalẹm, podọ hẹ tòdaho Juda tọn he yè pòaai lẹpo, hẹ Lakisi podọ hẹ Àzeka; na ehelẹ kẹdẹ wẹ pòai sọn tòdaho Juda tọn le mẹ di tòdaho dokónọ lẹ.

⁸ Ohó he wá Jelemia de sọn OKLUNỌ de, godo he ahọlu Zẹdekia ko basi alẹ̀nù de po omẹ he tin to Jelusalẹm mẹ lepo po, nado dèmisẽluna mẹdekannunọ hlan yé;

⁹ dọ sunnu dopodopo ni do gbọ devisunnu etọn, podọ sunnu dopodopo deviyọnnu etọn he yín sunnusi Heblu de, kavi yọnnusi Heblu de, ni yì vónu; dọ mẹde ma na do sèn ede sọn yé de, nado dọ, sọn Ju nòvisunnu etọn de de:

¹⁰ ahọvi lẹpo po gbẹtọ íẹpo po sọ sètónuna, he ko biọ alónú lọ mẹ, dọ omẹ dopodopo ni do gbọ devisunnu etọn, podọ omẹ dopodopo deviyọnnu etọn, ni yì vónu, dọ mẹde sèn yede sọn yé de ba blo; yé sètónuna, bo sọ gbọ yé ni yi:

¹¹ ṣigba ehegodo yé lé, bo sọ hẹn devi sunnu lẹ po deviyọnnu lẹ po, mẹhe yé ko gbọ ni yì vónu lẹ, nado lẹ́gọ̀, bo sọ hẹn yé wá biọ mẹmẹglọ mẹ na devi sunnu lẹ podọ na deviyọnnu lẹ:

¹² enẹwutu wẹ ohó Okluno tọn wá Jẹlemia de sọn OKLUNỌ de, lomọ,

¹³ Le wẹ OKLUNỌ dọ, Jiwheyẹwhe Islaeli tọn: Yẹn basi alẹ̀nù de po otọ́ mitọn lẹ po to azán he gbè yẹn hẹn yé jẹgbonu tón sọn aigba Egipti tọn mẹ, tón sọn owhé mẹmẹglọ tọn me, dọmọ,

¹⁴ To Opòdo owhè ṣinawe tọn mẹ, mìwlẹ na gbọ ome dopodopo nọvisunnu etọn he yín Ju de, ni yì he ko sà ede hlan we, bo ko sọ sèn we ovhe ṣidopo, hiọ na gbọ ewo ni yì vọnu sọn de we: ṣigba otọ́ mìton lẹ ma tuntóai hlan mi kavi té otọ́ yetọn dai gba.

¹⁵ Podọ yè sọ hẹn mìwlẹ lé, bo ko sọ wà enẹ he yín ojlọjẹ to nukun ṣie lẹ mẹ, to didèmisẽluna mẹdekannunọ omẹ dopodopo hlan okọmẹnu etọn mẹ; mìwlẹ ko sọ basi alẹ̀nù de to nukon ṣie to ohó he yè nọ ylọ gbọn oyín ṣie dali mẹ;

¹⁶ ṣigba mìwlẹ lẹ bo sọ flu oyín ṣie, bo sọ hẹn ome dopodopo devi sunnu etọn, podọ ome dopodopo deviyọnnu etọn, mehe mìwlẹ ko gbọ ni yì vọ́nu to homẹhùn mitọn mẹ, nado lẹ́gọ̀, mìwlẹ sọ hẹn yé biọ mẹglọnọ mẹ, nado tin hlan mì na devi sunnu lẹ podọ na deviyọnnu lẹ.

¹⁷ Enẹwutu le wẹ OKLUNỌ do: Mìwlẹ ma ko tuntóai hlan mi, nado dèmìsèluna medekannunọ, omẹ dopodopo hlan nọvisunnu etọn gba: dayi e go, Yẹn dèmisèluna medekannunọ de hlan mì, wẹ OKLUNỌ dọ, hlan ohi lọ, hlan azònylankan lọ, podọ hlan ohùvé lọ: podọ yẹn na sọ hẹn mì nado yín onúsisi de hlan ahọludu aigba tọn lẹpo

¹⁸ Podọ yẹn na sọ na omẹ he ko jesénmena alẹ̀nù ṣie lọ lẹ, he ma ko yí oho alẹ̀nù lọ tọn lẹ wà he yé basi to nukọn ṣie, oyìnvú he yé sán doawe, bo sọ ju gbon oha etọn lẹ ṣẹnṣẹn;

¹⁹ ahọvi Juda tọn lẹ, po ahọvi Jelusalẹm tọn lẹ po, ojò lẹ, po yẹwheno le po, po gbẹtọ aigba lọ tọn lẹpo po, he ju gbọn oha oyìnvú lọ tọn lẹ ṣẹnṣẹn;

²⁰ yèdọ yẹn na jó yé do alọ kẹ̀ntọ yeton lẹ tọn mẹ, podọ do alọ yé he to ogbè yetọn din lẹ ton mẹ: podọ osiọ yetọn lẹ na tin na núdùdù hlan ohè olon tọn lẹ, podọ hlan gbékanlin aigba tọn lẹ.

²¹ Podọ Zẹdekia ahọlu Juda tọn po ahovi eton lẹ po we yẹn na jó do alọ kentọ yetọn lẹ tọn mẹ, podọ do alo yé he to ogbè yetọn din lẹ tọn mẹ, podọ do alọ awhànfuntọ aholu Babilọni tọn lẹ tọn tọn mẹ, he yè hẹn hẹji yì sọn mì de.

²² Dayi e go, Yen na degbè, wẹ OKLUNỌ dọ, bo hẹn yé nado lẹ́gọ̀ jẹ tòdaho he mẹ; yé na sọ hoavùn hẹ ẹ, bo yi ì, bo sọ yí miyọn do mó ẹn: podọ yẹn na sọ hẹn tòdaho Juda tọn lẹ zùn ovójẹ de, matin tòmẹnu.