JẸLEMIA 33 - BIBLU WIWE LỌ 1923

¹ HUMỌ ohó OKLUNỌ tọn sọ wá Jẹlemia de wlawetọ, to whenuẹna yè gbé sọ sú i do awánu ogànhọ tọn mẹ, dọmọ,

² Le wẹ OKLUNỌ he wà ẹ dọ, OKLUNỌ he dọ e nado hẹn ẹn lòdọ; OKLUNỌ wẹ oyín etọn:

³ Dawhaylọ hlan dẽ, yẹn na sọ siọ we, bo sọ do onú dahodaho lẹ po sinsinawu lẹ po hia we, he hiẹ ma yọnẹn.

⁴ Na le wẹ OKLUNỌ dọ, Jiwheyẹwhe Islaeli tọn, gbọn ohọ̀ tòdaho he tọn lẹ tọn dali, podọ gbọn ohọ̀ ahọlu Juda tọn lẹ tọn dali, he yè họliai nadọ basi odokó de do osé lẹ tamẹ, podọ do ohi lọ tamẹ:

⁵ Yé wá nado hoavùn hẹ Kaldeanu lẹ, ṣigba yé tin nado yí oṣiọ gbẹtọ lẹ tọn le do gọ̀ yé, mẹhe yẹn ko hù to ádi ṣie me podọ to homẹwlu ṣie mẹ, podọ na kanyinylan mẹhetọn yẹn ko whla nukunmẹ ṣie sọn tòdaho he de.

⁶ Dayi e go, Yẹn na hẹn azọ̀nhẹngbọ wá nẹ̃ bo hẹnazọ̀ngbọna yé; Yẹn na sọ dè ogegé jijọho po nugbo po tọn hia hlan yé.

⁷ Podọ yẹn na sọ hẹn mẹglọnọ Juda tọn po mẹglọnọ Islaeli tọn po nado lẹ́gọ̀, bo na dó yé di tintan tọn.

⁸ Yẹn na sọ klọ yé wé sọn oylawà yetọn lẹpo mẹ, ehedali yé ko gbọn do wàylando do ogo e; yẹn na sọ jona oylanwà yetọn lẹpo, ehedali yé ko do wàylando do ogo e, podọ ehedali yé ko gbọn do jẹsénmẹ do ogo e.

⁹ Podọ tòdaho he na sọ tin hlan mi na oyín ayajẹ tọn de, na pipà de podọ na gigo de, to akọta aigba lọ tọn lẹpo nukọn, he na sè dagbe he yẹn wà hlan yé lẹpo, bo na dibu bo sọ sisọ na dagbe lẹpo lọ podọ na jijọho lẹpo lọ he yẹn hìadote hlan ẹn.

¹⁰ Le wẹ OKLUNỌ dọ: Yè na gbé sọ sè to otẹn he mẹ, ehetọn mì dọmọ, E tin ojẹvò, matin gbẹtọ podọ matin gbékanlin, yèdọ to tòdaho Juda tọn lẹ mẹ, podọ to alihogbo Jelusalẹm tọn lẹ mẹ, he yín ojẹvò, matin gbẹtọ podọ matin tòmenu podọ matin gbékanlin,

¹¹ ogbè ayajẹ tọn po ogbè homẹhùn tọn po, ogbè asisúnọ tọn po ogbè asiyòyò tọn po, ogbè yé he to didọmọ, Na opẹ lẹ hlan OKLUNỌ awhànpa lẹ tọn, na yínyọn wẹ OKLUNỌ, na lẹblanu etọn tote doidoi: po yé he hẹn avọ̀sánnú opénina tọn lẹ wá biọ ohò OKLUNỌ tọn mẹ lẹ tọn po. Na yẹn na hen mẹglọnọ aigba lọ tọn nado lẹ́gọ̀ di tintan ton, wẹ OKLUNỌ dọ.

¹² Le wẹ OKLUNỌ awhànpa lẹ tọn dọ: E na gbé sọ tin to otẹn he mẹ, he yín ojẹvò, matin gbẹtọ podọ matin gbékanlin, to tòdaho etọn lẹpo mẹ, ofininò lẹngbọhọtọ lẹ tọn de, he to hinhẹn lẹngbọpa yetọn lẹ nado mlọnai.

¹³ To tòdaho otò okọta tọn lẹ mẹ, to tòdaho dòdòklidò tọn lẹ mẹ, podọ to tòdaho ohuwaji tọn lẹ mẹ, podọ to aigba Bẹnjamini tọn mẹ, podọ to otẹn le mẹ lédo Jelusalẹm, podọ to todaho Juda tọn lẹ mẹ, wẹ lengbọpa lẹ na gbé sọ gbọn to alọ ewọ he dọ na yé tọn lẹ glọ, wẹ OKLUNỌ dọ.

¹⁴ Dayi e go, azán lẹ wá, wẹ OKLUNỌ dọ, bọ yẹn na yí ohó dagbe he yẹn dọ gbọn owhé Islaeli tọn dali tọn podọ gbọn owhó Juda tọn dali tọn wà.

¹⁵ To azán nẹlẹ mẹ, podọ to ojlẹ nẹ mẹ, wẹ yẹn na hẹn Alà dódó tọn de nado whén daga hlan Davidi; ewọ na sọ hẹn whẹ̀dida po dódój? o sẹ to aigba lọ mẹ.

¹⁶ To azán nẹlẹ mẹ wẹ yè na whlẹn Juda gán, Jelusalẹm na sọ nọnọ̀ blẹo: podọ ehe wẹ oyín lọ gbọn ehe dali yè na nọ ylọ ẹ, OKLUNỌ wẹ dódó mítọn.

¹⁷ Na le wẹ OKLUNỌ dọ: Sinsán sè de ma na tin sọn Davidi mẹ gba nado sín ofìn owhé Islaeli tọn tọn ji;

¹⁸ mọ yẹwhenọ Levinu lẹ ma na ba sunnu de pò to nukọn ṣie nado nọ na avọ́ nunina mimẹ̀ lẹ, podọ nado nọ mó avọ́ nunina ojinulili lẹ, podọ nado nọ basi avọ́ to whepoponu.

¹⁹ Ohó OKLUNỌ tọn sọ wá jẹ Jẹlemia de, dọmọ,

²⁰ Le wẹ OKLUNỌ dọ: Eyín mìwlẹ sọgan gbà alẹ̀nù ṣie okle tọn, po alẹ̀nù ṣie ozánmẹ tọn po, sọmọ bọ okle po ozán po ma na do tin to osã yetọn mẹ;

²¹ whenẹnu wẹ alẹ̀nù ṣie hẹ Davidi devi ṣie sọgan yín gbigbà, bọ ewọ ma na do tindo visunnu de nado dùahọlú to ofìn etọn ji; podọ hẹ Levinu yẹwhenọ devizónwàtọ ṣie lẹ.

²² Le awhànpa olọn tọn lẹ ma sogan yín hihia do, kavi otọ̀kẹ́n ohù tọn jijlẹ; mọwẹ yẹn na hẹn okún Davidi devi ṣie tọn sudeji, po Levinu lẹ lọ po, he to devizónwà hlan mi lẹ.

²³ Ohó OKLUNỌ tọn sọ wá jẹ Jẹlemia de, dọmọ,

²⁴ Bé hiẹ ma lẹn núhe omẹ he lẹ dọ, dọmọ, Owhédo awe he OKLUNỌ dè lẹ, é ko zé yé dlangbé? le wẹ yé vlẹ omẹ ṣie lẹ do, na yé sọ do yín akọta de to yé nukọn ba blo.

²⁵ Le wẹ OKLUNỌ dọ: Eyín alẹ̀nù ṣie okle po ozanmẹ po tọn ma nọte, eyín yẹn ma ko dè asedoai olọn po aigba po tọn lẹ;

²⁶ bé whenẹnu wẹ yẹn ga na zé okún Jakob tọn dlanai, po Davidi devi ṣie tọn po, sọmọ bọ yen ma na sọ yí sọn okún etọn mẹ nado yín ogándùtọ lẹ to okún Ablaham, Isaki, po Jakob po tọn ji gba: na yẹn na lẹ́gọ̀ do mẹglọnọ yetọn de, bo sọ tindo lẹblanu to yé ji.