JẸLEMIA 31 - BIBLU WIWE LỌ 1923

¹ TO ojlẹ nẹ mẹ, wẹ OKLUNỌ dọ, wẹ yẹn na yín Jiwheyẹwhe whédo Islaeli tọn lẹpo ton, yéwlẹ na sọ yín omẹ ṣie lẹ.

² Le wẹ OKLUNỌ dọ, Gbẹto he yè pòdai sọn ohi lọ mẹ lẹ ko din ojọmiọn mọ to zùngbo mẹ; yèdọ Islaeli, whenuena ewọ yì nado din ogbọjẹ na ede.

³ OKLUNỌ sọawuhia sọn aganu hlan mi, domọ, Mọwẹ, Yẹn ko yí owanyi madopodo de do yiwanna we: enẹwutu we yẹn ko yí dagbewanyi do dòn we.

⁴ Yẹn na vó we dó, hie na sọ yín didó, Hiẹ awhli Islaeli tọn È: hie na sọ vọ yín meyí tableti towe lẹ do doasọna, bo na sọ tón jẹgbonu to owè yé he to ajogidi basi lẹ tọn mẹ.

⁵ Hie na sọ vó ovẹngle lẹ dó to osé Samalia tọn lẹ ji: didótọ lẹ na dó, bo na sọ hẹn osinsẹ́n etọn pò.

⁶ Na azán de na tin, bo núhoto lẹ to okọta Eflaimi tọn lẹ ji na dawhá dọ, Mì tite, bo gbọ mí ni heji yì jẹ Ziọni jẹ OKLUNỌ Jiwheyẹwhe mítọn de.

⁷ Na le wẹ OKLUNỌ dọ, Mì yí homẹhùn do jihàn na Jakob, bo dabobo do ota akọta, lẹ tọn: mì lá, mì pà, bo dọmọ, OKLUNỌ E, whlẹn pipòtọ Islaeli ome towe lẹ tọn.

⁸ Dayi e gọ, Yẹn na hẹn yé sọn oto agéwaji tọn lẹ, bo sọ bó yé pli sọn nukọnnukon aigba ton pete wá nukuntọ́nnọ po sẹkúnọ po, yọnnu hòhonọ podọ ewọ he yí ovi do to zinzèn po yé po dopọ: ogbé daho de wẹ yé na do lẹ́gọ̀ do fìle.

⁹ Yé na wá po avi po, Yẹn na sọ yí ovẹ̀vẹ̀ do do yé, Yẹn na hẹn yé wá otọ osìn lẹ tọn lẹ kòn, to aliho jijlọ de me ehemẹ yé ma na dahli te: na otọ́ de wẹ yen hlan Islaeli, Eflaimi sọ we oplọnji ṣie.

¹⁰ Sè ohó OKLUNỌ tọn mì akọta lẹ emi, bo sọ dọ ẹ to olopó lẹ mẹ to aganu boboe; bo dọmọ, Ewọ he vúnvún Islaeli na sọ bé ẹ pli, bo to yìnyìn in, dile lengbọhọtọ de nọ wàna lẹngbọpa etọn do.

¹¹ Na OKLUNỌ ko fli Jakob, bo sọ fli i gò sọn alo ewọ he yín huhlọnnọ hú i tọn mẹ.

¹² Yé na sọ wá bo to hànji to fiyìaga Ziọni tọn me, bo na fó to sisa dọpọ jẹ dagbewà OKLUNỌ tọn kòn, jẹ azò lọ kòn, podọ jẹ ovẹ̃n lọ kòn, podọ jẹ amì lọ kòn, podọ jẹ ovú lẹngbọpa lọ tọn kòn po kanlinpa lọ po: alindọn yeton na sọ tin di ojipa osìnnọ de; ye ma na sọ blawu depope gbède ba.

¹³ Whenenu wẹ awhli lọ na to ayajẹ to owè mẹ, Yọpọ sunnu le po yọnhonọ lẹ po dopọ; na yẹn diọ awubla yetọn do ayajẹ mẹ, bo na mionhomẹna yé, bo sọ hẹn yé jaya sọn awubla yetọn mẹ.

¹⁴ Yẹn na sọ yí ojó do hen alindọn yẹwhenọ lẹ lọ tọn mọawu, yè na sọ yi dagbewà do pékòna ome ṣie lẹ, wẹ OKLUNỌ dọ.

¹⁵ Le wẹ OKLUNỌ dọ: Yè sè ogbè de to Lama mẹ, avigbè, po avi vivé po, Lakali to avivi na ovi etọn lẹ; é gbó nado yín homemiọnnanọ na ovi etọn lẹ, na ye ma tin wutu.

¹⁶ Le wẹ OKLUNỌ dọ: Jagòna ogbè towe sọn avivivi mẹ, po nukun towe lẹ po sọn odasìn mẹ: na yè na nale azon towe, wẹ OKLUNỌ dọ; yé na sọ vó gò wá sọn aigba kẹ̀ntọ lọ tọn mẹ.

¹⁷ Todido sọ tin na opòdo godomẹ towe, wẹ OKLUNỌ dọ; ovi towe le na sọ vọ gò wá jẹ agbó yetọn titi ji.

¹⁸ Yẹn ko sè Eflaimi to ede ví nugbonugbo dole dọ, Hiẹ ko hò mi, yẹn sọ yín mẹhihò, di oyìnvú he oglepònu ma mádona de: hiẹ ni diọ mi, yẹn na sọ yín mẹdidiọ; na hiẹ wẹ OKLUNỌ Jiwheyẹwhe ṣie.

¹⁹ Nugbonugbo godo he yè hẹn mi diọ, yẹn diọlinlẹn; podọ godo he yè naplọn mi, yẹn linu asapada ṣie: yè hen winyanhù mi, mọwẹ, yèdọ jẹflu, na yen hẹnagbàn ovlẹ ovú ṣie tọn wutu.

²⁰ Bé Eflaimi wẹ visunnu vivó ṣie? bé ovi homẹhùnno de wẹ ewọ? na whedepopenu yen dọhó do e go, Yẹn nọ to finflin i vivévivé jànwẹ: enẹwutu wẹ yè hẹn homẹ ṣie dọnú na ẹn; Yẹn na tindo lẹblanu to e ji nugbonugbo, wẹ OKLUNỌ do.

²¹ Ze alihia lẹ daga na we, basi odòtmalidotọ lẹ na we: zé ayiha towe do pannukọn alihogbo lọ, yèdọ aliho lọ ehe hiẹ gbọn yì: sọ diọ, hiẹ awhli Islaeli tọn E, sọ lé jẹ tòdaho towe hele mẹ.

²² Nawẹ hiẹ na to fidali pọ dondali po yì dẹn sọ, hiẹ viyọnnu agòjotọ E, na OKLUNỌ ko dá onú yọ́yọ́ to aigba lọ mẹ, Yọnnusi de na lédo sunnusi de.

²³ Le we OKLUNỌ awhànpa lẹ tọn dọ, Jiwheyẹwhe Islaeli tọn: Gãnṣo yé na sọ vó ohógbè he zán to aigba Juda tọn mẹ podọ to tòdaho etọn lẹ mẹ, whenuena yẹn na lẹ́gọ̀ do mẹglọnọ yeton kòn dọ: OKLUNỌ ni dona we, hiẹ, fininò nugbowà tọn E, Osó owiwe tọn E.

²⁴ Juda po tòdaho etọn lẹpo po na sọ nọ nò e mẹ dopọ; oglesi lẹ, po yé he yìyì po lengbọpa lẹ po lẹ.

²⁵ Na yen ko hen alindọn nusikọnanọ lọ mọawu, podọ alindọn awublẹnọ lepo wẹ yẹn ko hen góhò.

²⁶ Ehe ji wẹ yẹn fọ́n te, bo pọ́n, amlọn ṣie sọ yín vivi hlan mi.

²⁷ Dayi e go, azán lẹ wá, wẹ OKLUNỌ dọ, bọ yen na yi okun gbẹtọ tọn po okún gbékanlin tọn po do do owhé Islaeli tọn po owhé Juda tọn po.

²⁸ E na sọ wá jọ, dọ taidi le yẹn ko hó yé nado dọnsùn podọ nado hóhai, nado takìtina podọ nado súdo, podọ nado bianukunna; mọwẹ yẹn na sọ hó ye nado do podọ nado do, wẹ OKLUNỌ dọ.

²⁹ To azán nẹlẹ me yé ma na sọ dọ ba dọ, Otọ́ ko dù ovẹ̃nsinsẹ́n odéwhá lẹ, yè sọ zé adú ovi lẹ tọn do ojijó ji.

³⁰ Ṣigba omẹ dopodopo na kú na oylanwà etọn titi: omẹ dopodopo he dù ovẹ̃nsinsẹn odéwhá lẹ, wẹ adú etọn lẹ na yín zize do ojijó ji.

³¹ Dayi e go, azán le wá, wẹ OKLUNỌ dọ, bọ yẹn na basi alẹnù yọ́yọ́ de hẹ owhé Islaeli tọn, podọ hẹ owhé Juda tọn:

³² Kẹdẹdi alẹ̀nù he yẹn basi hẹ otọ́ yetọn lẹ to azán he mẹ yẹn yí alo do hẹn yé nado hẹn yé tón sọn aigba Egipti tọn ji ma wẹ gba; alẹnù ṣie he yé gbà, le yẹn tlẹ yín OKLUNỌ to yé ji do, wẹ OKLUNỌ dọ.

³³ Ṣigba ehe wẹ alẹ̀nù he yẹn na basi hẹ owhó Islaeli tọn to azán nẹlẹ godo, wẹ OKLUNỌ dọ; Yẹn na yí osén ṣie do ohò yetọn mẹ dọn, podọ ayiha yetọn mẹ wẹ yẹn na wlan ẹn do; Yẹn na sọ yín Jiwheyẹwhe yetọn, yéwlẹ na sọ yín omẹ ṣie:

³⁴ Yé ma sọ to na plọn omẹ dopodopo kọmẹnu etọn, podọ omẹ dopodopo nọvisunnu etọn ba, dọmọ, Yón OKLUNỌ; na yé mẹpó wẹ na yọn mi, sọn mẹwhiwhè yé tọn mẹ jẹ mẹkiklo yé tọn mẹ, wẹ OKLUNỌ dọ; na yẹn na jona oylanwà yetọn, ylando yeton wẹ yẹn ma sọ to na flin ba gba.

³⁵ Le wẹ OKLUNỌ dọ, he na owhè omẹ na hinhọ́n de to okle, po asẹdai osùn tọn po po sunwhlẹvu lẹ tọn po na hinhọ́n de to ozánmẹ, he hẹn ohù whiwhé, whenuena agbówhẹn etọn lẹ to zíngidiyẹn; OKLUNỌ awhànpa lẹ tọn wẹ oyín etọn:

³⁶ Eyín asẹdai helẹ fọ́nyì sọn nukọn ṣie, wẹ OKLUNỌ dọ, whenẹnu wẹ okún Islaeli tọn ga na doalọte sọn yínyín akọta de mẹ to nukọn ṣie kakadoi.

³⁷ Le wẹ OKLUNỌ dọ: Eyín olọn aga sọgan yín jijlẹ, bọ odòdo aigba tọn lẹ yín dindinmọ to oglọ, whenẹnu we yẹn ga na zé okún Islaeli ton díangbé na ehe yé ko wà lẹpo wẹ OKLUNỌ do.

³⁸ Dayi e go, azán lẹ wá, wẹ OKLUNỌ dọ, bọ tòdaho lọ na yín didó hlan OKLUNỌ sọn atòhọ Hananẹli jẹ hòngbo lọnglọnẹn lọ tọn ji

³⁹ Podọ okàn nújijlẹ tọn lo na gbé sọ yì titegbe hlan okọta Galebi dali, bo na sọ lé pó jẹ Goa.

⁴⁰ Agbàdo osiọ lẹ tọn pete, po afín tọn po, po dangbo lẹpo po jẹ tọ̀pẹṣẹ Kidlọni, jẹ lọnglọnẹn hòngbo osọ tọn ji hlan whèzẹtẹn dali, na yín wiwe hlan OKLUNỌ; é ma na vín dindọnsùn gba, kavi siséliai gbèdegbède ba gba.