JẸLEMIA 30 - BIBLU WIWE LỌ 1923

¹ OHÓ he wá Jẹlemia de sọn OKLUNỌ de, dọmọ,

² Le wẹ OKLUNỌ dọhó do, Jiwheyẹwhe Islaeli tọn, dọmọ, Wlan na we ohó he yẹn ko dọ hlan we lẹpo do owó de mẹ.

³ Na, pọ́n, azán lẹ wá, we OKLUNỌ dọ, bọ yẹn na lẹ́gọ̀ do mẹmẹglọ omẹ ṣie lẹ Islaeli po Juda po de, wẹ OKLUNỌ dọ; bọ yẹn na sọ hẹn yé nado lẹ́gọ̀ do aigba lọ mẹ he yẹn na hlan otọ́ yetọn le, yé na sọ tindo e.

⁴ Ehelẹ sọ wẹ ohó he OKLUNỌ dọ gbọn Islaeli tọn dali podọ gbọn Juda tọn dali.

⁵ Na le wẹ OKLUNỌ dọ: Míwlẹ ko sè ogbè sisọsisọ tọn de, obu tin finẹ, jijọho tọn ma gba

⁶ Mì kanbiọ dinvie, bo pọ́n eyín sunnusi de nọ zẹ́n jivi; etẹwutu wẹ yẹn mọ sunnusi dopodopo po aíọ etọn lẹ po to adà etọn lẹ mẹ, di yọnnusi de to ajipa mẹ, bọ yè hẹn nukunmẹ lẹpo diọ biọ yìnylọn mẹ?

⁷ Hùnun! na daho wẹ azán nẹ, mọ bọ ode ma tin taidi i; yèdọ ojlẹ tukla Jakob tọn tọn wẹ; ṣigba yè na whlẹn ẹn sọn e mẹ.

⁸ E na sọ wá jọ to azán nẹ gbè, wẹ OKLUNỌ awhànpa lẹ tọn dọ, DỌ yẹn na wén oglepònu etọn sè sọn okò etọn, bo na sọ tlu ogàn towe lẹ; ojonọ lẹ ma na sọ sẹ́n yéde sọn e de ba gba:

⁹ ṣigba yé na nọ sẹ́n OKLUNỌ Jiwheyẹwhe yetọn, po Davidi ahọlu yetọn po, mẹhe yen na zótite hlan yé.

¹⁰ Enẹwutu Jakob devi ṣie, hiẹ dibu blo, wẹ OKLUNỌ dọ; mọ a sọ yín avosatọ blo, Hiẹ Islaeli: na, pọ́n, yẹn na whlẹn we sọn aganu, po okún towe po sọn aigba mẹglọnọ yetọn tọn mẹ; Jakob na lógò, bo na sọ tin abọẹ podọ to awubọ me, mẹde ma na sọ hẹn ẹn savọ̀ gba.

¹¹ Na yẹn tin to de we, nado whlẹn we, wẹ OKLUNỌ dọ: na yẹn na basi opòdo gigọ́ akọta lẹpo tọn de fie yẹn ko vúnvún we hlan, ṣigba yẹn ma na basi opòdo gigọ́ hiẹ tọn de gba; ṣigba yẹn na yi whẹ̀dida do jla we do, bo na hẹn we matinwhẹgbledo de lala gba.

¹² Na le wẹ OKLUNỌ dọ, Matinhẹngbọ wẹ awugble towe, podọ alán towe vivó.

¹³ Mẹde ma tin nado dowhógbena owhèhó towe, hiẹ ma tindo obó kavi alánbjanú de na alán towe, kavi wunbla na.

¹⁴ Owanyinọ towe lepo ko wonji ogo we; yé ma sọ din we ba na yẹn ko yí alán okẹntọ de tọn do doalán we, po hihò okanọ de tọn po; na kiklo oylanwà towe tọn, na yè hẹn ylando towe lẹ sudeji wutu.

¹⁵ Etẹwutu wẹ hiẹ do to awhádo na awugble towe, na awufiẹsa towe yín matinhẹngbọ wutu? na kiklo oylanwà towe tọn, na yè hẹn ylando towe lẹ sudeji wutu, wẹ yẹn ko do wà onú helẹ hlan we.

¹⁶ Enẹwutu wẹ yè na dùsúdo yé he to dùdù we súdo lẹpo, podọ mẹglatọ towe lẹpo, ome dopodopo yé tọn na yì biọ mẹglọnọ mẹ; podọ yé he hẹn we gble lẹ na yín ohẹngble de, podọ yé he to wẹ̀nyàn to oji we lẹpo wẹ yẹn na jó na wènyannú de.

¹⁷ Na yẹn na gò agbasalilo jó hlan we, yẹn na sọ hẹnazọ̀ngbọna we sọn alán towe lẹ mẹ, wẹ OKLUNỌ dọ; na yé ko ylọ we mẹyandogbó de wutu, dọmọ, Ziọni wẹ, mẹhe mẹde ma sọ hòpón.

¹⁸ Le wẹ OKLUNỌ dọ: Dayi e go, yẹn sọ vó lẹ́gọ̀ do mẹglọnọ ogòhọ Jakob tọn lẹ tọn kòn, bo tindo lẹblanu to otẹn ninò etọn lẹ ji; podọ tòdaho lọ na sọ yín didó do osé etọn titi ji, podọ ohònmẹ lọ na sọ yín ninò kẹdẹdi owàlọ etọn.

¹⁹ Yé mẹ wẹ opédido po ogbè yé he to ajogidi basi lẹ tọn na nọ tón sọn wá: Yẹn bo na sọ hẹn yé sudeji, yé ma na yín vude gba, yẹn na nagigo yé ga, yé ma sọ to na yín whiwhè gba.

²⁰ Ovi yetọn lẹ ga na tin di nukọntọn, yè na sọ hẹn agùn yetọn lódo to nukọn ṣie, yẹn na sọ sayahẹ yé he bianukunna yé lẹpo.

²¹ Ahọvi yetọn lẹ na tin sọn yéde mẹ, ogándùtọ na tón sọn ogbla yé tọn mẹ wá; Yẹn na sọ hẹn ẹn nado dòn sẹ̀pọ́, ewọ bo na sọ tlinsẹ̀pó dẽ: na mẹnu wẹ ewọ he ko yín alọyítọ na ayiha etọn? wẹ OKLUNỌ dọ.

²² Míwlẹ na sọ yín omẹ ṣie lẹ, Yẹn na sọ yín Jiwheyẹwhe mitọn.

²³ Dayi e go, ojẹhònsinsinyẹn OKLUNỌ tọn, yèdọ homẹwlu etọn, yè hẹn jẹgbonu yì, ojẹhònsinsinyẹn bépli: é na là do ota mẹylankan lẹ tọn ji.

²⁴ Adanjijẹ zògbè OKLUNỌ tọn ma to na lẹ́gọ̀, kaka ewọ ko do hẹnsẹ, podọ kaka ewọ ko do yí olinlẹn ayiha etọn tọn lẹ basi: azán godomẹ tọn lẹ mẹ mìwlẹ na tùnwun in.