JẸLEMIA 3 - BIBLU WIWE LỌ 1923

¹ YÉ dọmọ, Eyín sunnu de gbẹ́ asi etọn dai, bọ ewọ yì sọn e dẹ, bo sọ lezùn omẹ dẽvo tọn, bé sunnu lọ na sọ gọ̀ do e de ba? aigba nẹ ma na zùn gbigble gbahugbahu? ṣigba hiẹ ko lọgà họntọn susu; gãnṣo hiẹ sọ vọ́ lẹn nadọ gò do dẽ, wẹ OKLUNỌ dọ.

² Zé nukun towe lẹ daga hlan otẹn he yìaga lẹ, bo mọ fie yè ma ko lọgà hẹ we te? Áliho wẹ hiẹ sinai na yé te, di Alabiatọ de to zùngbo mẹ; podọ hiẹ ko yí ogàlilọ towe le po kanyinylan towe po do hẹn aigba zùn gbigble.

³ Enẹwutu wẹ yẹn dọn jikun katakata do godo, bọ jikun agọ̀gbọnẹn ma ko do tin: hiẹ sọ tindo onukọn gàlọtọ tọn, hie gbẹ́ nado yín winyannọ.

⁴ Hiẹ ma na dawhá hlan mi sọn ojlẹ he mẹ dọ, Otọ́ ṣie, hiẹ wẹ ogbé ovuwhenu ṣie tọn?

⁵ Ewọ na hẹn homẹgble etọn dote kakadoi? ewọ na whla ẹ jẹ opòdo? Dayi e go, hiẹ ko dọhó lẹ, ṣigba bo ko wà onú ylankan lẹ dile hiẹ tin sọgan do.

⁶ OKLUNỌ sọ dọ hlan mi ga, to azán Josia ahọlu tọn lẹ mẹ dọ, Hiẹ ko mọ enẹ he Islaeli agòjotọ ko wà? ewọ ko hẹji yì aga osé he yìaga lẹpo ji podọ to atin mú lẹpo glọ, bo ko zán ogàlilọ to finẹ.

⁷ Bọ yẹn sọ dọ to ehe godo ewọ ko wà onú helẹ̃ dọ, Gbọ é ni lẹ́ hlan dẽ. Ṣigba ewọ ma lẹ́ gba: Podọ Juda nọviyọnnu etọn danuwàtọ mọ ẹn.

⁸ Yẹn sọ mọ, whenuena, na owhẹ̀hó he lọ tọn he Islaeli agòjotọ ko deayọ̀, yẹn ko gbẹ́ ẹ dài, bo sọ na ẹn owé gbédai tọn de; gãnṣo Juda nọviyọnnu etọn danuwàtọ ma sinú, ṣigba e yì bo to ogàlilọ zán ga.

⁹ E sọ wá jọ gbọn aslanyìnyìn ogàlilọ etọn tọn mẹ wẹ yè hẹn aigba gble, ewọ sọ to ayọdè hẹ zannu lẹ podọ hẹ atinta lẹ.

¹⁰ Podọ gãnṣo na ehe lẹpo Juda nọviyọnnu etọn danuwàtọ ma ko ví ayiha etọn pete do lẹ́gọ̀ do dẽ gba, adavo po oklọ po, wẹ OKLUNỌ dọ

¹¹ OKLUNỌ sọ dọ hlan mi dọ, Islaeli agọ̀jotọ ko do ede hia dódónọ hugán Juda danuwàtọ.

¹² Yì, bo lá ohó helẹ hlan agéwaji dali, bo dọmọ, Lẹ́gó, hiẹ Islaeli agọ̀jotọ, wẹ OKLUNỌ dọ: Yẹn ma na hẹn nukunmẹylọn nado flẹjẹ oji we gba: na lẹblanunọ wẹ yẹn, wẹ OKLUNỌ dọ, Yẹn ma na whlá adi kakadoi gba.

¹³ Sa yón oylanwà towe sokẹdẹ, dọ hiẹ ko wàylando do OKLUNỌ Jiwheyẹwhe towe go, bo ko vúnvún aliho towe lẹ hlan ojonọ lẹ to atin omú lẹpo glọ, podọ mìwlẹ ma ko sètónuna ogbè ṣie gba, wẹ OKLUNỌ dọ.

¹⁴ Diọkọ, mì ovi agòjotọ lẹ emi, wẹ OKLUNỌ dọ; na asú de wẹ yẹn hlan mìwlẹ; Yẹn na sọ yi mì dopo sọn tòdaho de mẹ, podọ awe sọn whédo de mẹ, Yẹn nasọ hẹn mì wá jẹ Ziọni:

¹⁵ Yẹn na na lẹngbọhọtọ lẹ mì kẹdẹdi ayiha ṣie, he na yí oyọnẹn po wuntùntùn po do yìn mì.

¹⁶ E nasọ wá jọ, whenuena yè hẹn mì sudeji bo sọ jideji to aigba lọ ji to azán nẹlẹ mẹ, wẹ OKLUNỌ dọ, yé ma to nasọ dọ ba dọ, Alkì alẹ̀nù OKLUNỌ tọn tọn lọ; mọ é ma sọ to na wá ayiha mẹ: mọ yé ma sọ to na flin in; mọ yé ma sọ to na bà ẹ pò; mọ yè ma sọ to na basi i depope ba.

¹⁷ To ojlẹ nẹ mẹ yé na nọ ylọ Jelusalẹm dọ ofìn OKLUNỌ tọn; yè nasọ bẹ́ akọta lẹpo plidopọ do e de, hlan oyín OKLUNỌ tọn jẹ Jelusalẹm: mọ yé ma sọ to na nọ zinzọnlin hodo tasinyẹn ayiha ylankan yetọn tọn ba.

¹⁸ To azán nẹlẹ mẹ owhé Juda tọn na nọ zinzọnlin jọ owhé Islaeli tọn gbè, yé nasọ wá dopọ sọn aigba agéwaji tọn jẹ aigba he yẹn na hlan otọ́ mitọn lẹ na ogú de ji.

¹⁹ Ṣigba yẹn dọmọ, Nawẹ yẹn do yí mì do ovi lọ ṣẹnṣẹn do, bo sọ na aigba whanpẹnọ de mì, ogúigba dagbepete awhànpa akọta lẹ tọn tọn lẹ? Yẹn sọ dọmọ, Hiẹ na nọ ylọ mi Otọ́ ṣie; ho ma nasọ lẹ́ sọn hihodo mi mẹ gba.

²⁰ Nugbonugbo dile asi de nọ yí danuwiwà do fọ́nyì sọn asú etọn de do, mọwẹ mìwlẹ ko yí danuwiwà do zán hẹ mi do, Mì owhó Islaeli tọn lẹ emi, wẹ OKLUNỌ dọ.

²¹ Yè sè ogbè de to aga vọtọ lẹ ji, avi po ovẹ́gbè ovi Islaeli tọn lẹ tọn po; na yé ko hẹn aliho yetọn gble, yé ko wẹ́n OKLUNỌ Jiwheyẹwhe yetọn.

²² Diọkọ, mì ovi agòjotọ lẹ emi, Yẹn na sọ hẹnazọ̀ngbọna agòjijo mìtọn lẹ. Dayi e go, yè hẹn míwlẹ wá de wena hiẹ wẹ OKJUNỌ Jiwheyẹwhe mítọn.

²³ Nugbo ovó mẹ wẹ alọgọ lọ te he yè nukundo sọn okọta ji, gbẹtọsusu hlunhlunnọ to osé lẹ go: nugbo to OKLUNỌ Jiwheyẹwhe mítọn mẹ wẹ whlẹngán Islaeli tọn te.

²⁴ Ṣigba onú winyannọ ko dù tuklajẹ otọ́ mítọn lẹ tọn sọn ovu mítọn; lẹngbọpa yetọn lẹ po kanlinpa yetọn lẹ po, visunnu yetọn lẹ po viyọnnu yetọn lẹ po.

²⁵ Mì gbọ mí ni mlọn ai to winyan mítọn mẹ, bo sọ gbọ oflujẹ mítọn ni ṣinyọn mí: na mí ko wàylando do OKLUNỌ Jiwheyẹwhe mítọn, míwlẹ po otọ́ mítọn lẹ po sọn ovu mítọn yèdọ jẹ azán he gbè: míwlẹ ma ko sọ sètónuna ogbè OKLUNỌ Jiwheyẹwhe mítọn tọn gba.