JẸLEMIA 24 - BIBLU WIWE LỌ 1923

¹ OKLUNỌ dohia mi, bo, dayi e go, yè ze oha ovòsinsẹ́n lọ tọn awe do tẹmpli OKLUNỌ tọn nukọn; godo he Nẹbukadnẹzali ahọlu Babilọni tọn ko bé Jẹkonia visunnu Jehọiakimi ahọlu Juda tọn tọn yì mẹglọnọ, po ahọvi Juda tọn lẹ po, po anazónwatọ lẹ po po ayatọ lẹ po, sọn Jelusalẹm mẹ, bo ko hẹn yé wá jẹ Babilọni.

² Oha dopo tindo ovòsinsẹ́n dagbe talala lẹ, taidi ovòsinsẹn lẹ he yín bibia tintan: podọ oha awetọ tindo ovòsinsẹ́n ylanylan talala lẹ, he yè ma ṣogan dù, yé ylan sọ mọ.

³ Whenẹnu wẹ OKLUNỌ dọ hlan mi dọ, Eté wẹ hiẹ mọ, Jẹlemia? Yẹn sọ dọmọ ovòsinsẹ́n lẹ; ovòsinsẹ́n dagbedagbe lẹ, dagbe talala; po ylanylan lọ po, ylanylan talala, he yè ma sọgan dù, yé ylan sọ mọ.

⁴ Ohó OKLUNỌ tọn sọ wá jó dè, dọmọ,

⁵ Le wẹ OKLUNỌ dọ, Jiwheyẹwhe Islaeli tọn, Taidi ovòsinsẹ́n dagbedagbe nẹlẹ, mowẹ yẹn na pònnukundagbe mẹglọnọ Juda tọn lẹ, mẹhe yẹn ko dohlan tọn sọn otẹn he mẹ biọ aigba Kaldeanu lẹ tọn mẹ.

⁶ Na yen na zé nukun ṣie lẹ do yé ji na dagbe, Yẹn na sọ vò yé hẹnwá jẹ aigba he ji: Yẹn na sọ do yé, bo ma sọ sisé yé liai gba; yẹn na tùn yé, bo ma sọ dòn yé sùn gba.

⁷ Yẹn na sọ na ayiha de yé nado yòn mi, dọ yẹn wẹ OKLUNỌ: yéwle na yín omẹ ṣie lẹ, yen na sọ yín Jiwheyẹwhe yeton: na yé na yí ayiha yetọn pete do légọ hlan dẽ.

⁸ Podọ di ovòsinsẹ́n lẹ, he ye ma sọgan dù, yé yín yinylan sọ mọ; nugbonugbo le wẹ OKLUNỌ dọ, Mọwẹ yẹn na jó Zẹdekia ahọlu Juda tọn hlan do, po ahọvi etọn lẹ po, po pipòtọ Jelusalẹm tọn lẹ po, he po to aigba he mẹ, po ye he nọnọ̀ aigba Egipti tọn mẹ lẹ po:

⁹ lèdọ yẹn na jó ye hlan nado yín núsisi de hlan ahọludu aigba tọn lepo na oylan; nado yín ovlẹ de po hówhinwhén de po, mẹkiko de po dẹ̀hodo de po, to otẹn lẹpo me fie yẹn na yàn yé hlan.

¹⁰ Yẹn na sọ do ohi lọ hlan, ohùvé, po azònylankan lọ po to yé ṣẹnṣẹn, kaka yé na do yín vivàsúdo sẹ̀ sọn aigba lọ ji he yẹn na hlan yé podọ hlan otò yetọn lẹ.