JẸLEMIA 23 - BIBLU WIWE LỌ 1923

¹ DINDỌN an íẹngbọhọtọ lẹ lọ he và bo sọ vúnvún lẹngbọ yìndùgbo ṣie tọn lẹ wẹ OKLUNỌ dọ.

² Enẹwutu le wẹ OKLUNỌ dọ, Jiwheyẹwhe Islaeli tọn, do Iẹngbọhọtọ he to omẹ ṣie lẹ yìn lẹ go: Mìwlẹ ko vúnvún lẹngbọpa ṣie, bo yàn yé yì, bo ma ko sọ dla yé pon gba; dayi e go, yẹn na dla oylan wiwà mitọn lẹ tọn pòn to mì ji, we OKLUNỌ dọ.

³ Yẹn na bé pipòtọ lẹngbọpá ṣie tọn plidopọ sọn otò lẹpo mẹ fie yẹn ko yàn yé do, bo na sọ vó yé hẹnwá jẹ apó yetọn lẹ mẹ; yé na sọ yín sinsẹ́nnọ bo sọ jìdeji.

⁴ Yẹn na sọ zé lẹngbọhọtọ lẹ daga do yé ji he na to yé yìn: yé ma to obu na di ba, kavi yín avosatọ, mẹ depope ma sọ to na bú, wẹ OKLUNỌ dọ.

⁵ Dayi e go, azán le wá, wẹ OKLUNỌ dọ, bọ yẹn na zetite hlan Davidi nutonkùn dódono de, ewọ na sọ dugán di ahọlu bo yí ivuyonẹn do dugbẹ, bo na sọ hẹn whẹ̀dida po dodowà po sẹ to aigba lọ mẹ.

⁶ Azán etọn lẹ mẹ wẹ yè na whlẹn Juda, Islaeli na sọ yí jijọho do nò; podọ ehe sọ wẹ oyín etọn he yè na do nọ ylọ ẹ, OKLUNỌ odódó mítọn.

⁷ Enẹwutu, dayi e go, azán lẹ wá, wẹ OKLUNỌ dọ, bọ yé ma na sọ dọ ba dọ, Le OKLUNỌ togbè, he hẹn ovi Islaeli tọn hẹji sọn aigba Egipti tọn ji wá;

⁸ adavo, Le OKLUNỌ togbè, he hẹn okún owhé Islaeli tọn tọn lẹ hẹji bo sọ plan jegbonu tọn sọn oto agéwaji tọn mẹ wá, podọ sọn otò lẹpo mẹ fie yẹn ko yan yé hlan; yé na sọ nọ nò aigba yetọn titi mẹ.

⁹ Gbọn yẹwhegán lẹ tọn dali, Yè hẹn ayiha to ohò ṣie mẹ gbà, ohú ṣie lẹpo to whinwhan; yẹn tin taidi dawe ahannùmúnọ de, podọ taidi dawe de mẹhe ovẹ̃n gbanwhàn e tọn; na OKLUNỌ tọn wutu, podọ na ohó wiwe etọn lẹ tọn wutu.

¹⁰ Na aigba tin gigọ́ na ayọdetọ lẹ; na na odèhodo lọ tọn wutu aigba lọ to awubla; yè hẹn yìndùgbo zùngbomẹ tọn lẹ hú; podọ aliho yetọn yín yinylan, huhlon yetọn ma sọ yín ojlọjẹ.

¹¹ Na yẹwhegán lọ po yẹwhenọ lọ po wẹ yè hẹnflu; mọwẹ, to ohò ṣie mẹ wẹ yẹn ko mọ yìnylàn yetọn te, wẹ OKLUNỌ dọ.

¹² Enẹwutu aliho yetọn na tin hlan yé di otẹn didididi lẹ to zinvlu mẹ: yè na to yé yàn jei, bo jai do e mẹ; na yẹn na hẹn oylan wá yé ji, to owhè dlapọ́n yetọn tọn mẹ, wẹ OKLUNỌ dọ.

¹³ Podọ yẹn ko mọ alèdida to yẹwhegán Samalia tọn lẹ mẹ; ye to dọdaidọ gbọn Baali dali, bo sọ hẹn Islaeli omẹ ṣie lẹ nado búali.

¹⁴ To yẹwhegán Jelusalẹm tọn lẹ mẹ ga yẹn ko mọ onú dobu de; yé to ayọde, bo to zọnlinzin lalo lẹ mẹ, bo sọ nahuhlọn alọ oylan wàtọ lẹ tọn lẹ, bọ mẹde ma lẹ́gọ̀ sọn kanyinylan etọn mẹ: ye popo yé tọn tin lẹzùn hlan mi di Sọdọmi, podọ tòmenu etọn lẹ di Gomola.

¹⁵ Enẹwutu le wẹ OKLUNỌ awhànpa lẹ tọn dọ gbọn yẹwhegán lẹ lọ tọn dali: Dayi e gp, yẹn na yí magbọjẹ do yìn yé, bo sọ hẹn yé nù osìn ovivé tọn: na yẹwhegán Jelusalẹm tọn lẹ mẹ wẹ yè hẹn hinhẹnfiu jegbonu sọn yì biọ aigba lẹpo mẹ.

¹⁶ Le wẹ OKLUNỌ awhànpa lẹ tọn dọ, Mì tuntóai hlan ohó yẹwhegán he to dọdaido hlan mì lẹ tọn lẹ blo; yé to ovó plọn mì: numimọ ayiha yetọn titi tọn de wẹ ye to didọ, bo ma tọn sọn onù OKLUNỌ tọn mẹ gba.

¹⁷ Yé didọ hlan yé tẹgbẹtẹgbẹ he to ohó OKLUNỌ tọn jlo lẹ dọ, OKLUNỌ ko dọmọ, Mìwlẹ na tindo jijọho; podọ hlan ome dopodopo he to zọnlinzin to otasinyẹn ayiha etọn titi tọn mẹ yé dọmọ, Oylan de ma na wá mì ji gba.

¹⁸ Na mẹnu wẹ ko site to oplito OKLUNỌ tọn bọ ewọ na do mohlan bo sọ sè ohó etọn? mẹhe ko dohia ohó etọn go, bo sọ sè e.

¹⁹ Dayi e go, jẹhọnsinsinyẹn OKLUNỌ tọn, yèdọ homẹwlu etọn, wẹ yè hẹn tòn yì, mọwẹ, jẹhọnsinsinyẹn lépénọ: é na wulà to ota mẹylankan lẹ tọn ji.

²⁰ Adi OKLUNỌ tọn ma na lẹgò, kaka ewọ ko do wà ẹ, podọ kaka ewọ ko do basi linlẹn ayiha etọn mẹ tọn: to azán godomẹ lẹ tọn mẹ miwle na tunwun in dagbedagbe.

²¹ Yẹn ma do yẹwhegán helẹ hlan gba, gãnṣo yé dowezun: yẹn ma dọhó hlan yé gba, gãnṣo yé dọdọdai.

²² Ṣigba eyín yé ko nọte to hóplonmẹ ṣie mẹ, whenẹnu yé do ko hẹn omẹ ṣie lẹ nado sè ohó ṣie lẹ, bo do ko diọ yé sọn aliho ylankan yetọn mẹ, podọ sọn oylan wiwà yetọn lẹ tọn mẹ.

²³ Bé Jiwheyẹwhe to yakẹ de wẹ yẹn, wẹ OKLUNỌ dọ, bo ma yín Jiwheyẹwhe to aganu boboe de?

²⁴ Bé mẹde sọgan whlá ede to tẹnmẹ whiwhlá lẹ mẹ bọ yẹn ma na mọ ẹn? wẹ OKLUNỌ dọ. Bé yẹn ma gò olọn mẹ po aigba po? wẹ OKLUNỌ dọ.

²⁵ Yẹn ko sè núhe yẹwhegán lẹ dọ, he dọdai lalo lẹ dọ to oyín ṣie mẹ, dọmọ, Yẹn ko kúdlọ, yẹn ko kúdlọ.

²⁶ Nawẹ ehe na tin dẹn sọ to ayiha yẹwhegán lẹ lọ tọn mẹ he to dọdai lalo lẹ dọ; yèdọ yẹwhegán oklọ ayiha yetọn titi tọn ínẹ tọn lẹ?

²⁷ He lẹn nado hẹn omẹ ṣie lẹ nado wọn oyín ṣie gbọn odlọ yetọn lẹ he dali yé to didọ omẹ dopodopo hlan kọmẹnu etọn, dile otọ yetọn lẹ wọn oyín ṣie na Baali do.

²⁸ Yẹwhegán lọ he tindo odlo de, gbọ é ni dọ odlọ de; podọ ewọ he tindo ohó ṣie, gbọ é ni yí nugbowà do dọ ohó ṣie. Eté wẹ oligètin hlan oli? we OKLUNỌ dọ.

²⁹ Bé ohó ṣie ma tin tauli miyọn? wẹ OKLUNỌ dọ; podọ taidi ogọmẹ de he nọ gbà osé hanyanhanyan?

³⁰ Enẹwutu, dayi e go, yẹn tin pannukọn yẹwhegán lẹ lọ, wẹ OKLUNỌ dọ, he to ohó ṣie lẹ fìn omẹ dopodopo sọn kọmẹnu etọn si.

³¹ Dayi e go, Yẹn tin pannukọn yẹwhegán lẹ lọ, wẹ OKLUNỌ dọ, he yí odé yetọn lẹ, bo to didọmọ, Ewọ dọmọ.

³² Dayi e go, yẹn tin pannukọn ye he dọdai odlọ lalonọ lẹ dọ, le wẹ OKLUNỌ dọ, bo sọ to yé dọ, bo to omẹ ṣie lẹ hẹn nado buali gbọn lalo yetọn lẹ dali, podọ gbọn ogoyíyí yetọn ovo dali; gãnṣo yẹn ma do yé hlan, kavi degbèna ye; mọ yé ma na nale omẹ he lẹ lala gba, we OKLUNỌ dọ.

³³ Podọ whenuena omẹ he lẹ, kavi yẹwhegán lọ, kavi yẹwhenọ lọ na kanbiọ we, dọmọ, Eté wẹ agbàn OKLUNỌ tọn lọ? whenẹnu wẹ hiẹ na dọ na yé núhe agbàn lọ yín dọ, Míwlẹ wẹ agbàn lọ. Yẹn na zé mì dlangbé, wẹ OKLUNỌ dọ.

³⁴ Podọ na yẹwhegán lọ tọn, po yẹwhenọ lọ po, po gbẹtọ lẹ po, he na dọmọ, Agbàn OKLUNỌ tọn, yèdọ yẹn na sayahẹ dawe nẹ po owhé etọn po.

³⁵ Le wẹ mi na dọ omẹ dopodopo hlan kọmẹnu etọn, podọ ome dopodopo hlan novisunnu etọn dọ, Etẹ wẹ OKLUNỌ ko gblọn? podọ, Eté wẹ OKLUNỌ ko dọ?

³⁶ Podọ agban OKLUNỌ tọn wẹ mìwlẹ ma na sọ dọ ba; na ohó omẹ dopodopo tọn titi na yín agbàn etọn, na mìwlẹ ko sọ hẹn ohó Jiwheyẹwhe ogbènọ tọn lẹ gble, OKLUNỌ awhanpa lẹ tọn tọn Jiwheyẹwhe mítọn.

³⁷ Le we hiẹ na dọ hlan yẹwhegán lọ dọ, Etó wẹ OKLUNỌ ko gbíọnna we? podọ, Eté wẹ OKLUNỌ ko dọ?

³⁸ Ṣigba eyín mìwlẹ dọmo, Agban OKLUNỌ tọn; enẹwutu le wẹ OKLUNỌ dọ; Na mìwlẹ dọ ohó he wutu dọ, Agbàn OKLUNỌ tọn, podọ yẹn ko domẹhlan mì, dọmọ, Mìwlẹ ma na sọ dọmọ, Agbàn OKLUNỌ tọn gba;

³⁹ enẹwutu, dayi e go, Yẹn na zé mì yìaga, yẹn na sọ zé mì dlangbó, po tòdaho he yẹn jó hlan mì lọ po hlan otọ́ mitọn lẹ, sọn nukọn ṣie:

⁴⁰ podọ yẹn na hẹn pvlẹ madopodo wá mì ji, podọ owinyan tẹgbẹtẹgbẹ tọn de, he ma na yín winwọn.