JẸLEMIA 18 - BIBLU WIWE LỌ 1923

¹ OHÓ he wá Jẹlemia de sọn OKLUNỌ de, dọmọ,

² Tite, bo jẹte yì owhé zéndotọ tọn gbè, finẹ wẹ yẹn na hẹn we nado sè ohó ṣie lẹ te.

³ Whenẹnu wẹ yẹn jẹte yì owhé zéndotọ lọ tọn gbè, bo, dayi e go, é to azón etọn wà to kẹkẹ lẹ ji.

⁴ Podọ whenuena yè hẹn núzinzán he é basi sọn Okò lọ mẹ gble to alọ zéndotọ lọ tọn mẹ, é sọ vó yí i do basi núzinzán dẽvo, dile é sọawuhia dagbe hlan zéndotọ lọ do nado basi i.

⁵ Whenẹnu wẹ ohó OKLUNỌ tọn wá dẽ, dọmo,

⁶ Owhé Islaeli tọn E, bé yẹn ma sọgan wà hẹ mì di zéndotọ he wẹ? wẹ OKLUNỌ dọ. Dayi e go, di okò to alọ zéndotọ lọ tọn mẹ mọwẹ míwlẹ te to alọ ṣie mẹ, mì owhé Islaeli tọn E.

⁷ Adónu he mẹ yẹn na dọhó gbọn akọta dè tọn dali, podọ: gbọn ahọludu de tọn dali, nado dòn sùn podọ nado gbà liai podọ nado sú i do;

⁸ Eyín akọta nẹ gbọn ehe tọn dali yẹn ko dọhó, lé sọn oylan yetọn mẹ, Yẹn na diòlinlẹn sọn oylan lọ mẹ he yen lẹn nado wà hlan yé

⁹ Podọ adónu he mẹ yẹn na dọhó gbọn akọta de tọn dali, podọ gbọn ahọludu de tọn dali, nado doaì podọ nado do e;

¹⁰ Eyín é wà oylan to nukun ṣie mẹ, bọ é ma sètónuna ogbè ṣie gba, whenẹnu yẹn na diọlinlẹn sọn dagbe lọ mẹ ehe tọn yẹn dọ yẹn do wàdagbena yé.

¹¹ Enẹwutu dinvie, yì nado dọhó hlan ome Juda tọn lẹ, podọ hlan tomẹnu Jelusalẹm tọn lẹ, dọmọ, Le wẹ OKLUNỌ dọ; Dayi e go, Yẹn ṣẹ̀ oylan do mì go, bo sọ bladọ obladọ de do mì go: mì ni lẹ́gọ̀ dinvie omẹ dopodopo sọn ali ylankan ẹtọn mẹ, bo jla ali mitọn le do po wiwà mitọn lẹ po

¹² Ṣigba yé dọmọ, Otódo de ma tin gba: na mìwlẹ na to zọnlinzin hodo núbladọ mítọn lẹ, mí na sọ nọ wà omẹ dopodopo hodo otasinyẹn ayiha ylankan etọn tọn.

¹³ Enẹwutu le wẹ OKLUNỌ dọ: Mì kanbiọ dinvie to akọta lẹ ṣẹnṣẹn, menu wẹ ko sè onú mọnkọ lẹ; awhli Islaeli tọn ko wà onú dobu talala de.

¹⁴ Bó osìnago Lẹbanọni tọn na gbodà sọn osé danji tọn mẹ wẹ? kavi osìn miọnmiọn lẹ sọn aigba ojonọ lẹ mẹ he sà jẹte na yín húhú wẹ?

¹⁵ Na omẹ ṣie lẹ ko wọnji ogo e, yé ko mè nuwhẹnwan hlan ovó; yé ko sọ hẹn yé nado mùsa to aliho yetọn lẹ mẹ, to omó hóhó lẹ mẹ, nado nọ zinzọnlin to núglọmó lẹ mẹ, to aliho yè ma dè de mẹ,

¹⁶ Nado basi aigba yetọn awujiji de, podọ pislọdidè de whepoponu; omẹ dopodopo he gbọn fìnẹdali jujei lẹ nayín awujinọ, bo sọ mimí ota etọn.

¹⁷ Yẹn na vúnvún yé di po jẹhọn whèzẹtẹn tọn de po to kẹ̀ntọ lẹ nukọn; yẹn na do nẹgbé hia yé é ma yín nukunmẹ gba, to azán oya yetọn tọn gbè.

¹⁸ Whenẹnu wẹ yé dọmọ, Wá, bo gbọ mí ni bladọ núbladọ lẹ do Jẹlemia go; na osén ma na súdo sọn yẹwhenọ lọ de gba, kavi ohónamẹ sọn nuyọnẹntọ de, kavi ohó sọn yẹwhegán lọ de. Wá, bo gbọ mí ni yí odó do hò e, a sọ dike mí na ayipa ohó etọn lẹ depope blo.

¹⁹ Na ayipa hlan mi, OKLUNỌ E, bo sọ tuntóai hlan ogbè he to avùnho hẹ mi lẹ tọn.

²⁰ Bé yè na yí oylan do súahọ na dagbe wẹ? na yé ko kùn odò de na alindọn ṣie. Flin le yẹn site to nukọn towe nado dọhó dagbe na yé do, nado lè homẹwlu towe sọn yé de.

²¹ Enẹwutu jó ovi yetọn lẹ hlan ohùvé, bo sọ jó yé hlan na huhlọn ohi tọn; bo sọ gbọ asi yetọn lẹ ni lẹzùn madovinọ, asusiọsi; bo sọ gbọ sunnu yetọn lẹ ni yin alántọsiọ okú tọn, podọ yọ̀pọ sunnu yetọn lẹ mẹhiho ohi tọn to awhànfuntẹn mẹ.

²² Gbọ ogbè de ni yín sisè sọn owhé yetọn lẹ gbè, whenuena hiẹ na hẹn awhànfuntọ de wá yé ji ajiji: na yé ko kùn odò de nado wle mi, bo sọ whla omò lẹ dai na afọ ṣie lẹ.

²³ Gãnṣo, OKLUNỌ hiẹ yón hónamẹ yetọn lẹpo do oji e nado hù mi; a jona oylanwà yetọn blo, kavi súnsún ylando yetọn sè sọn nukun towe me blo: ṣigba gbọ yè ni hẹn yé nado mùsa to nukọn towe; zán hẹ yé to ojlẹ adi towe tọn mẹ.