JẸLEMIA 16 - BIBLU WIWE LỌ 1923

¹ OHÓ OKLUNỌ tọn sọ wá dẽ ga, dọmọ,

² Hiẹ ma na dà asi de, mọ hiẹ ma na tindo visunnu lẹ kavi viyọnnu lẹ to otẹn he me gba.

³ Na le wẹ OKLUNỌ dọ gbọn visunnu lẹ tọn dali po gbọn viyọnnu lẹ po tọn dali he yé ji to otẹn he mẹ, podọ gbọn onọ yetọn lẹ tọn dali he ji yé, podọ gbọn otọ́ yetọn lẹ tọn dali hẹ dè yé tọ́n to aigba lọ mẹ:

⁴ Yé na kú okú lànmẹzọn tọn lẹ; yé ma na yín mẹviavina, mọ yè ma na di yé gba; ye na tin di ogbó to nukunme aigba tọn ji: yé na sọ yín vivàsúdo gbọn ohi dali, podọ gbọn ohùvé dali; podọ oṣiọ yetọn lẹ na sọ yín núdùdù na ohẹ̀ olọn tọn lẹ, podọ na gbékanlin aigba tọn le.

⁵ Na le wẹ OKLUNỌ dọ, dọ a biọ ohò aiflu tọn mẹ blo, kavi yì nado viavi blo, kavi ví yé blo: na yẹn ko dè jijọho ṣie sẹ̀ sọn omẹ he lẹ de, wẹ OKLUNỌ dọ, yèdọ dagbewanyi po lẹblanu bibọ lẹ po.

⁶ Daho po pevi po na kú to aigba he mẹ: yè ma na di yé, mo gbẹtọ lẹ ma na doavigbè na yé, kavi húhú yéde, kavi hen yéde zùn mẹpáta na ye gba:

⁷ mọ gbẹtọ ma na kán akla na yé tó awubla mẹ, nado miọnhomẹna yé na osiọ gba; mọ gbẹtọ lẹ ma na na kọfo homẹmiọn tọn yé nado nù na otọ́ yetọn kavi na onọ yetọn gba.

⁸ Hiẹ ma na sọ yì biọ ohò hùnwhẹ tọn mẹ nado sinai po yé po nado dù podọ nado nù gba.

⁹ Na le wẹ OKLUNỌ awhànpa lẹ tọn dọ, Jiwheyẹwhe Islaeli tọn: Dayi e go, yẹn na hen sọn otẹn he mẹ, to nukun mitọn lẹ nukọn podọ to azán mitọn lẹ mẹ, ogbè ajogidi tọn po ogbè homẹhùn tọn po, ogbè asisúnọ tọn po ogbè asiyọ́yọ́ tọn po nado doalote.

¹⁰ E na sọ wá jọ, whenuena hiẹ na do ohó he lẹpo hia gbẹtọ he lẹ, wẹ yé na dọ hlan we dọ, Etẹwutu wẹ OKLUNỌ do dọ oylan daho helẹ do mí go? kavi etó wẹ oylanwà mítọn? kavi eté wẹ ylando mítọn he mí ko wà do OKLUNỌ Jiwheyẹwhe mítọn go?

¹¹ Whenẹnu wẹ hiẹ na dọ hlan yé dọ, Na otọ mitọn lẹ ko gbé mi dai wutu, wẹ OKLUNỌ dọ, bo ko hodo yẹwhe dẽvo lẹ, bo ko sẹn yé, bo litaina yé, bo ko gbó mi dai, bo ma ko yìn osén ṣie gba;

¹² mìwlẹ ko sọ wà oylan hugan otọ mitọn lẹ; na, dayi e go, mì omẹ dopodopo to zọnlinzin tó otasinyẹn ayiha ylankan etọn tọn godo, sọmọ bọ mì ma tuntóai hlan mi gba:

¹³ Enẹwutu wẹ yẹn na zé yé dlẹn tón sọn aigba he mẹ biọ aigba he mìwlẹ ma ko yọnẹn mẹ, mìwlẹ kavi otọ́ mitọn lẹ; finẹ wẹ mìwlẹ na tó yẹwhe dẽvo lẹ sẹ́n te to okle po ozán po; fie yẹn ma nado nukundágbe de hia mì te.

¹⁴ Enewutu, dayi e go, azán lẹ wá, wẹ OKLUNỌ dọ, bọ yè ma na sọ dọ ba, dọ, Le OKLUNỌ togbẹ̀, he hẹn ovi Islaeli tọn lẹ heji tọn sọn aigba Egipti tọn mẹ wá:

¹⁵ adavo, Le OKLUNỌ togbẹ̀, he hẹn ovi Islaeli tọn lẹ hẹji sọn aigba agéwaji tọn mẹ wá, podọ sọn otò lẹpo mẹ fie é ko yàn yé hlan yẹn na sọ vó yé hẹnwá biọ aigba yétọn mẹ he yẹn na hlan otọ́ yetọn lẹ.

¹⁶ Dayi e go, yẹn na domẹhlan na whèhùtọ susu, wẹ OKLUNỌ dọ, yé na sọ yí yé dó hùwhèvi; podọ to enẹgodo yẹn na sọ domẹhlan na gbéyàntọ susu, yé na sọ I yí yé do yàngbé sọn osé dopodopo mẹ, podọ sọn okọta dopodopo mẹ, podọ sọn odò osé lẹ tọn lẹ mẹ

¹⁷ Na nukun ṣie lẹ tin to aliho yetọn lẹpo ji: ye ma yín whiwhla sọn nukun ṣie mẹ gba, mọ oylanwà yetọn ma sọ yín núglọnú sọn nukun ṣie lẹ mẹ gba.

¹⁸ Podọ tintan yẹn na yiahọsuna oylanwà yetọn po ylando yetọn po yẹndawe: na yé ko flu aigba ṣie: yé ko yí osiọ onú hiọkọ yetọn lẹ tọn po osùnú yetọn lẹ po do go gúigba ṣie.

¹⁹ OKLUNỌ È, huhlọn ṣie, figangán ṣie, podọ fibẹ̀tado ṣie to azán nukunbia tọn mẹ, de we wẹ akọta lẹ na wá sọn opodo aigba tọn le, bo na didọmọ, Otọ́ mitọn lẹ ma dùgú núde tọn hú lalo, yèdọ ovó podọ onú ehe tọn mẹ ale de ma tin te lẹ.

²⁰ Bó gbẹtọ de na basi yẹwhe lẹ hlan ede, ehe gãnṣo ma yín yẹwhe lẹ de?

²¹ Enẹwutu, dayi e go, yẹn na hẹn yé nado yọnẹn, whladopo he wẹ yẹn na hẹn yé nado yón alọ ṣie po hlọnhlọn ṣie po; yé na sọ yọnẹn dọ Jehova wẹ oyín ṣie.