JẸLEMIA 12 - BIBLU WIWE LỌ 1923

¹ Dódónọ we hie, OKLUNỌ E, whenuena yẹn to whógbèdo hẹ we: gãnṣo whẹ̀dida le we yẹn na dọ etẹwutu wẹ aliho mẹylankan lẹ tọn do doale? etẹwutu yé he yí odanú susu do to zinzán lẹpo do tin to awubọ mẹ?

² Hiẹ wẹ ko do yé, mọwẹ, yé ko hẹnadọai: yé to whinwhén, mọwẹ, yé hen sinsẹ́n jegbonu wá: hie tin yakẹ to onù yetọn mẹ, bo dèn do otu y, etọn lẹ.

³ Ṣigba hiẹ yón mi, OKLUNỌ E, hiẹ mọ mi, bo sọ whló ayiha ṣie pọn hlan dali towe: dòn yé jẹgbonu taidi lẹngbọ na hùhù, bo sọ lẹ̀ yé wé na azán hùhù tọn.

⁴ Nawẹ aigba lọ na blawu dèn sọ, bọ omá otò lọ pete tọn na do yé? na kanyinylan yé he nọ nọ e mẹ lẹ tọn, yè và gbékanlin le súdo, po ohẹ le po; na yé dọ wutu, dọ Ewọ ma to na mọ godo mitọn gba.

⁵ Eyín hiẹ hònwezun hẹ afọno lẹ, bọ yé ko hẹnagbọpé we, whenẹnu nawẹ hie sọgan péhe osé lẹ do? podọ yín yè tlẹ hen hiẹ gán to aigba jijoho tọn de mẹ, gãnṣo nawẹ hie na wà dó to wuwlu Jodani tọn mẹ?

⁶ Na yèdọ mẹmẹsunnu towe lẹ, po owhé otọ́ towe tọn po, yèdọ yé ko yí odanú do zán hẹ we, yèdọ yé ko to awhádo léló to godo towe: hiẹ yí yé sè blo, yíh yé tlẹ dọ onú dagbe le hlan we.

⁷ Yẹn ko gbé owhó ṣie dai, yẹn ko zé ogú ṣie dlangbé; yẹn ko jó mẹyiwanna vivé alindọn ṣie ton do alọ kẹ̀ntọ etọn lẹ tọn mẹ.

⁸ Yè hẹn ogú ṣie lẹzùn kinnikinni de hlan mi to zùnkangbo mẹ: é ko do ogbè etọn tón do ogo e; enẹwutu wẹ yen ko do gbewanna en.

⁹ Bé ogú ṣie hlan mi tin di ohè wlanwlan wẹnyan tọn de wẹ? bé ohè wenyan tọn lẹ tin pannukọn ẹn lédo wẹ? mì yì, bé gbékanlin danji tọn lẹpo pli, hẹn yé wá nado dù súdo.

¹⁰ Lengbohọtọ susu ko và vẹ̃ngle ṣie, yé ko zín mimá ṣie dai to afọ glọ, yé ko hẹn mimá whanpẹnọ ṣie zùn zùngbo jẹvó de.

¹¹ Yé ko hẹn ẹn zùn oyojẹ de; é to awubla hlan mi, yínyín vọ́jẹ; aigba lọ pete wẹ yè hẹn zùn jẹvó, na omẹ de ma yí i do ayiha mẹ wutu.

¹² Yè hẹn hengbletọ lẹ wá fiyìaga vọtọ lẹpo ji to zùngbo mẹ: na ohi OKLUNỌ tọn to dùdùsúdo sọn opòdo aigba lọ tọn de yèdọ jẹ opodo dẽvo aigba lọ tọn: agbasalan de ma tindo jijọho.

¹³ Yé ko do olikún, bo ko gbèn owun lẹ; yé ko yí yede do awufìẹsa mẹ, bo ma dùalena núde: mì ni yín winyannọ, na adi zògbe OKLUNỌ tọn wutu.

¹⁴ Le wẹ OKLUNỌ dọ do kọmẹnu ylanylan sie lẹpo go, he doalọ ogú he yẹn ko hẹn Islaeli omẹ ṣie lẹ nado dù go: Dayi e go, yẹn na sún yé sè sọn aigba yetọn ji, bo sọ sún owhé Juda tọn sọn yé ṣẹnṣẹn.

¹⁵ E na sọ wá jọ, ehe godo yen ko sún yé sè, yen na lẹ́gọ̀ bo tindo lèblanu to yé ji; yẹn na sọ vó yé henwá, omẹ dopodopo jẹ ogú etọn kòn, podọ omẹ dopodopo jẹ aigba etọn kòn.

¹⁶ E na sọ wá jọ, eyín yé na yí sọwhiwhe do plón ali omẹ ṣie lẹ tọn lẹ, nado nọ whle gbọn oyín ṣie, Le OKLUNỌ togbẹ̀, dali; yèdọ dile yé plón omẹ ṣie lẹ do nado nọ whle gbọn Baali dali; whenẹnu wẹ yè na dó yé daga to gblagbla omẹ ṣie lẹ tọn mẹ.

¹⁷ Ṣigba eyín yé ma na sè gba, whenẹnu wẹ yẹn na sún akọta nẹ ṣẹ̀, súnsún in daga po vivà po, wẹ OKLUNỌ dọ.