JẸLEMIA 10 - BIBLU WIWE LỌ 1923

¹ MÌ sè ohó he OKLUNỌ dọ hlan mì, Mì owhé Islaeli tọn emi:

² Le wẹ OKLUNỌ dọ, dọmo, Mì plọn ali akọta lẹ tọn blo, mì sọ yín avosatọ to ohia olọn tọn lẹ kòn blo; na akọta lẹ wẹ yè hẹn savo to yé kòn.

³ Na ovó oséndoai kosi lẹ tọn lẹ: na atin wẹ ehe mẹde sán, azón sọn alọ azọ́ntọ de tọn lẹ mẹ po asiọvi po.

⁴ Yé yí fataka do doasọ nẹ̃ po sika po; yé yí húngàn lẹ po ogòmẹ lẹ po do whè e na é setẹn blo.

⁵ Yé tin taidi odotin to ojipa kukumbeli lẹ tọn de mẹ, azón didiọ tọn, bo ma nọ dohó: yè ma sọgan nọma zé yé, na ye ma sọgan yì wutu. Mì yín avosatọna yé tọn blo; na yé ma sọgan wà oylan, mọ e ma sọ tin to yé mẹ nado wà dagbe.

⁶ Mẹde pia tin jijlẹ hlan we gba, OKLUNỌ E; kiklo wẹ hie, podọ oyín towe sọ yín kiklo to hlọnhlọn me.

⁷ Mẹnu wẹ ma do dibusi we, Hiẹ ahọlu akọta lẹ tọn? na é jèhẹ we: sùsọ le to gbẹtọ nuyọnẹntọ akọta lẹ tọn lẹpo ṣẹnṣẹn, podọ to ohá ahọlu tọn yetọn lẹpo mẹ mẹde ma tin finẹ jijlẹ hlan we gba.

⁸ Ṣigba yé tin gbọn onú dopo mẹ kanlinjọmẹ, oklenọ: núpinplọ́n ovó lẹ tọn atinpo de wẹ.

⁹ Yè tùn fataka finẹ do agbanvla lẹ he yè hẹn sọn Talsisi mẹ, po sika po sọn Ofili mẹ, azón adaundotọ tọn podọ sọn alọ sikayáwàtọ tọn lẹ mẹ; oféno po gèfunwunmẹ po na avọ́ yetọn; azón gbẹtọ ananọ lẹ tọn we yé mẹpó.

¹⁰ Ṣigba OKLUNỌ wẹ Jiwheyẹwhe to nugbo mẹ; ewọ wẹ Jiwheyẹwhe ogbónọ, podọ ahọlu madopodo de: to homẹgble etọn me aigba sisọ, podọ akọta lẹ ma sọ tin sọgan nado dakónna adanjijẹ etọn.

¹¹ Le wẹ mì na do hlan yé, dọmọ, Yẹwhe he ma ko basi olọn lẹ po aigba po, ye na và sọn aigba ji to olọn helẹ glọ.

¹² Gbọn huhlọn etọn dali wẹ ewọ ko do basi aigba lọ, ewọ ko hẹn aihọn lódo gbọn nuyọnẹn etọn dali, podọ gbọn wuntùntùn etọn dali wẹ ewọ ko do dlen olọn lẹ jẹgbonu:

¹³ Whenuena é do ogbè etọn tón, zingidi osìn lẹ tọn de tin to olọn lẹ mẹ, ewọ sọ hẹn avivi lẹ nado hẹjiyì sọn opòdo aigba tọn lẹ mẹ; é basi abi lẹ na ojikun, bo sọ hẹn ojẹhọn jegbonu wá sọn agbànhò etọn lẹ mẹ.

¹⁴ Omẹ dopodopo yín kanlinjọmẹ gbahu nado yọnen; sikayáwàtọ lẹpo wẹ yè hẹnwinyanhù gbọn bosiọ pipa etọn dali: na bosiọ kinkòn etọn olalo wẹ, podọ gbọfufu de ma tin to yé mẹ

¹⁵ Ovó wẹ yé, azón ovlẹ tọn de: to ojlẹ odlapón yetọn tọn mẹ yé na súdo.

¹⁶ Mimá Jakob tọn ma tin taidi ehelẹ gba: na ewọ wẹ didotọ onú lẹpo tọn; podọ Islaeli wẹ whẹ̀ndo ogúdu etọn tọn: OKLUNỌ awhànpa lẹ tọn wẹ oyín etọn.

¹⁷ Bó odì towe pli sọn aigba, Hlẹ tòmẹnu-yọnnu sọn zùnkangbo mẹ.

¹⁸ Na le wẹ OKLUNỌ dọ, Dayi e go, Yẹn na mì tòmenu aigba lọ tọn le jegbonu to ojlẹ he mẹ, bo na so bianukunna yé, na yé nido mọ ẹn.

¹⁹ Dindọn wẹ yẹn na awugble ṣie adihú wẹ alán ṣie: ṣigba yẹn dọmọ, Òlànmezòn ṣie wẹ ehe nugbonugbo, yẹn do na doakónna en.

²⁰ Yè hẹn gòhọ ṣie gble, okàn ṣie lẹpo wẹ yè sọ wén: Yè hẹn ovi ṣie lẹpo jẹgbonu yì sọn dẽ, yé ma sọ tin gba: mẹde ma sọ tin finẹ nado dlẹn gòhọ ṣie jẹgbonu ba, podọ nado zé avọ̀dido ṣie lẹ daga.

²¹ Na yè hẹn lẹngbọhọtọ lẹ tin lẹzùn kanlinjọmẹ, bo ma ko sọ kanbiọ son OKLUNỌ de gba: enẹwutu we yé ma ko do yí nuyọnẹn do zán, yè so vúnvún lẹngbọpa yetọn lẹpo.

²² Ogbè lìnlìn de tọn, dayi e go é ja, po zínzínyẹn daho de po sọn oto agéwaji tọn mẹ, nado hẹn tòdaho Juda tọn lẹ zùn adóto dẹ, otẹn fininò ohia lẹ tọn de.

²³ OKLUNỌ E, yẹn yọnẹn dọ aliho gbẹtọ tọn ma tin to ewlọsu mẹ gba: é ma tin to omẹ he to zọnlinzin mẹ nado do afọdidè etọn le gba

²⁴ OKLUNỌ È, yí whẹ̀dida do hen mi sọgbè; adi towe mẹ ma gba, hiẹ nikã hẹn mi whè.

²⁵ Túntún homẹwlu towe jẹgbonu do kosi he ma yón we ji, podọ do whédo lẹ ji he ma nọ ylọ oyín towe: na y é ko dù J akob súdo, mọwẹ, yé ko dù i súdo bo sọ và ẹ, bo ko sọ hẹn kanlindùgbo etọn zùn vótọ.