ISAIA 15 - BIBLU WIWE LỌ 1923

¹ AGBÀN Moab tọn. Na to ozánmẹ wẹ yè gbà Ai Moab tọn kija, yè sọ hẹn ẹn nabọẹ; na to ozánmẹ wẹ yè gbà Kili Moab tọn kija, yè sọ hẹn ẹn nabọẹ:

² Ewọ ko hẹji yì Bajiti, podọ yì Diboni, ofi he fọ́n yì aga nẹlẹ nado viavi: Moab na wẹnhùn do Nebo ji, podọ do Medeba ji: ota yetọn lẹpo na pá, yè na sọ lùn otán lẹpo kọnyingbé.

³ To tohòmẹ yé na yí odẹ́vọ̀ ṣinyọn yéde: to ohọ̀ yetọn ta, podọ to tohomẹ yetọn mẹ, mẹdopodopo na wẹnhùn, bo sọ to dasìn kọ̀n ploplo.

⁴ Hẹṣbọn na sọ dawhá po Eleale po: yè na sè ogbè yetọn kaka jẹ Jahati: enẹwutu wẹ awhànpa Moab tọn he pànnu lẹ na dawhá yì oji, ogbẹ etọn naylan na ede.

⁵ Ayiha ṣie dawhá yì oji na Moab wọwá etọn lẹ họ̀n jẹ Isoali, oyìnsi owhè atọ̀n tọn: to oji Lukiti tọn hihẹ mẹ, avi wẹ yé na do to hihẹ ẹ jei; na aliho Kolonainu tọn, yé na zé awhá dindọ̀n tọn daga.

⁶ Na osìn Nimlim tọn lẹ na jẹvọ́: na ogbéma to wiwlo, amà to kúkú, onú mú de ma tin wutu.

⁷ Enẹwutu susu he yé ko tindo, po ehe yé ko bẹ́ pli po, wẹ yé na hẹn gbọn otọ̀ sauli lẹ tọn mẹ wá yì.

⁸ Na awhá lọ ko lẹ́do odògbo Moab tọn, hùnwinwẹn etọn wá Eflaimi, hùnwinwẹn etọn wá Beẹl-Elimi.

⁹ Na otọ̀ Dimọni tọn lẹ na gọ́ na ohùn: na yẹn na hẹn oylan dẽvo wá Dimọni ji, yẹn na hẹn kinnikinni wá ewọ he họngán sọn Moab ji, podọ to pipòtọ he pò to aigba lọ ji tọn.