HÓWHÍNWHÉN LẸ 6 - BIBLU WIWE LỌ 1923

¹ OVI ṣie, eyín hiẹ basi alọyítọ na họ́ntọn towe, Eyín hiẹ ko basi alọdlẹn hẹ jonọ.

² Eyín yè yí ohó onù towe tọn do domọ na we, Eyín yè yí ohó onù towe mẹ tọn do wle we.

³ Basi ehe dinvie, ovi ṣie, whlẹn dewe, Whenuena hiẹ jẹ alọ họ́ntọn towe tọn mẹ, Yì, whiwhẹ dewe dai, na hiẹ ni hòhuwhẹ họ́ntọn towe.

⁴ A na amlọn nukun towe blo, Kavi amlọngọ na nukunga towe blo.

⁵ Whlẹn dewe di sọn alọ gbéyantọ tọn mẹ, Podọ di ohó sọn alọ hẹ́hutọ tọn mẹ.

⁶ Yì zánwhlan de, hiẹ adidọnọ, Dayi owàlọ etọn go, na hiẹ ni sọ yọnnuin.

⁷ He ma tindo whèdatọ, Kavi hihọ́tọ, kavi ogán.

⁸ He nọ wleawu na núdùdù etọn to alunlun mẹ, Bo sọ: bẹ́ núdùdù etọn pli to jijẹ whenu.

⁹ Adidọnọ, nawẹ hiẹ na damlọn dẹn sọ? Whetẹnu wẹ hiẹ na fọ́n sọn amlọn towe mẹ?

¹⁰ Amlọn pẹvide dogọ, amlọngọ pẹvide dogọ́, Alọhadogo pẹvide nado damlọn.

¹¹ Mọwẹ ohẹ́n towe na wá di mẹhe jei whẹntọ́ngbé, Mado towe di omẹ he to awhànwu wle.

¹² Mẹvọnu, gbẹtọ ylankan, To zọnlinzin ewọ po onù yẹwiwà tọn po.

¹³ E to nukunwhe, é yí afọ etọn do to hódọ, E sọ yi alọviyẹyẹ do to núhia.

¹⁴ Yẹwiwà tin to ayiha etọn mẹ, é nọ to jijọ ylankan lẹn whepoponu; É nọ da avùn dai.

¹⁵ Enẹwutu wẹ tukla etọn na wá ajiji, Ajiji wẹ é na dón mado jlado.

¹⁶ Onú ṣidopo wẹ OKLUNỌ gbẹwanna, nugbo, Ṣinawe wẹ yín osùnú de na ayiha etọn.

¹⁷ Nukun goyíyí tọn, odẹ́ lalo tọn, Podo alọ he to ohùn homẹvọnọ tọn kòn dai.

¹⁸ Ayiha he to linlẹn ylankan lẹn, Afọ he yawu to wezun mẹ do jijọ ylankan kọ́n.

¹⁹ Kunnudetọ lalo tọn he To oho lalo dọ, Podọ ewọ he to avùn da dai to mẹmẹsunnu lẹ ṣẹnṣẹn.

²⁰ Ovi ṣie, yí osẹ́n otọ́ towe tọn whlá, A sọ gbẹ́ osén onọ towe tọn, dai blo.

²¹ Bla yé whepoponu do ayiha towe go, Bo sín yé lẹ́do okò towe.

²² Whenuena hiẹ to zọnlinzin, é na yín alihiamẹtọ towe, Whenuena hiẹ sọ damlọn, é na họ́ we; Whenuena hiẹ sọ fọ́n, é na nọ dọhó hẹ we.

²³ Na osén wẹ zògbán de; osén sọ wẹ hinhọ́n; Nukọnamẹ oplọ́n tọn lẹ wẹ aliho ogbẹ̀ tọn.

²⁴ Nado yí we whlá sọn yọnnu ylankan nẹ si, Sọn odé yọnnu jonọ tọn si.

²⁵ A túnwan do whanpẹ etọn go to ayiha towe mẹ blo; Mọ a sọ dike é yí nukunga etọn do wle we blo.

²⁶ Na yọnnu galọtọ de dali wẹ sunnu gbọn zùn akla doponọ: Ayọ̀detọ jlo na yànmọna ogbẹ́ akuẹgégénu tọn.

²⁷ Gbẹtọ sọgan hẹn miyọn to akón etọn nu, Bọ avọ̀ etọn ma na fiọ?

²⁸ Bé mẹde sọgan hẹ́ akán mìyọnawu ji, Bọ afọ etọn ma na fiọ?

²⁹ Mọ wẹ mẹhe biọ ohọ́ mẹ do asi Kọmẹnu etọn tọn; Mẹdepope he doalọ e go, ma na nọ madoylando.

³⁰ Yè ma nọ vlẹ ajotọ, eyín é jajo nado Pékọna ayiha etọn whenuena huvé to húhù i gba.

³¹ Ṣigba eyín yè wle e, é na gọ̀ ẹ jo whla sináwe; Agbàn owhé etọn gbè tọn wẹ é na yí do suahọ.

³² Ṣigba mẹdepope he deayò hẹ́ yọnnu de, nuyọnẹn pò nẹ́: Ewọ he wà ẹ he na hù gbigbọ etọn titi súdo.

³³ Alán po dèpò po wẹ é na mọ yí: Ovlẹ etọn ma na klọ sẹ.

³⁴ Na awu whàn wẹ homẹgble sunnu de tọn: Enẹwutu wẹ é ma na pòdai to azán ahọsu tọn gbè.

³⁵ E ma na hò akuẹ ofligọ tọn pọ́n; Mọ homẹ etọn ma na hùn, eyín hiẹ tlẹ hẹn nunina towe zùn susu.