HÓWHÍNWHÉN LẸ 31 - BIBLU WIWE LỌ 1923

¹ OHÓ ahọlu Lẹmuẹli tọn, ohó oplòn tọn he onọ etọn plòn ẹn.

² Bé etẹwẹ, ovi ṣie? etẹ sọ wẹ, ovi ohò ṣie mẹ tọn? Bé etẹ ka wẹ, ovi pagbe ṣie tọn.

³ A jo huhlọn towe na yọnnu lẹ blo, Kavi jijo aliho towe na enẹ he nọ hù ahọlu lẹ súdo.

⁴ É ma jẹ na ahọlu lẹ, Lẹmuẹli È, é ma jẹ na ahọlu lẹ nado nù vẹ̃nhàn gba; Kavi na ahọvi lẹ nado yiwanna ahàn sinsinyẹn:

⁵ Na yé nikã nù bo wọ́n osén, Bo sọ diọ whẹ̀dida nukunbibianọ lẹ tọn.

⁶ Yí ahàn sinsinyẹn na ewọ he wleawu vọ̀ nado dọ̀n, Podọ vẹ̀nhàn na homẹgblenọ lẹ.

⁷ Gbọ ni nù bo wòn ohẹn etọn, Na é sọ flin oyà etọn bà blo.

⁸ Kẹ̀ onù towe na unbọpẹn lẹ To owhè yé he yè dè hlan dindòn mẹ lẹpo tọn.

⁹ Kẹ̀ onù towe, yí dódó do dawhẹ̀, Bo yiwhẹ̀ do wamọnọ po hẹntọnọ po ji.

¹⁰ Mẹnu wẹ sọgan mọ yọnnu jijọdagbenọ? Na akuẹ etọn hú ayòn tọn.

¹¹ Otù asú etọn tọn jai do e go madibu, Mọ é ma na nọ ma tindo ale azọ̀n tọn.

¹² Dagbe wẹ nawe lọ nọ wà nẹ̃, é ma nọ wàylan To gbẹ̀zán etọn lẹpo mẹ.

¹³ Nawe lọ nọ din ofún po sékan po, E sọ yí alọ etọn do wàzòn po, homẹhùnhùn po.

¹⁴ E taidi ohún ajòtọ tọn; E nọ hẹn núdùdù etọn sọn aganu wá.

¹⁵ É fọ́n whenuena ai ma ko hòn, Bo na núdùdù whégbenu etọn, Podọ azọ̀n gbèdopo tọn na viyọnnu, etọn lẹ.

¹⁶ E dayi ogle go, bo sọ hò ẹ; Ale alo etọn mẹ tọn wẹ é do do vẹ̃ngle.

¹⁷ E yi hlọnhlọn do blagbajana adaja etọn, Bo sọ hẹn awà etọn awelẹ sinyẹn

¹⁸ E dayi e go dọ ajọ̀ etọn yòn: Zogban etọn ma nọ ṣi to ozán mẹ.

¹⁹ E yí alọ etọn do kẹkẹ́ go, Alọ etọn sọ hẹn sóki.

²⁰ E dlẹn alọ eton hlan wamọnọ lẹ; Nugbo alọ etọn dlẹn jẹ agbatọnọ lẹ de.

²¹ E ma hanu na kònjikun na whégbenu etọn; Na whégbenu etọn lẹpo wẹ yè ṣinyọn avọ̀ yéndawe na.

²² E sọ lòn avọ̀ dido na ede; Awu dagbe ogèfúnwunmẹ wẹ avọ̀ etọn.

²³ Yè yòn asú etọn to dòkònu, Whenuena é sinai hẹ́ mẹhó otò lọ tọn lẹ.

²⁴ E gbò ala dagbedagbe, bo sọ sà ẹ, Humọ é yí homẹbla zọ̀n sisa ajòtọ.

²⁵ Huhlọn po yẹyi po wẹ avọ̀ etọn; E na sọ jaya to ójlẹ he ja mẹ.

²⁶ E yí nuyọnẹn do kò onù etọn: Podọ to odẹ́ etọn ji wẹ osén dagbewiwà tọn te.

²⁷ É nọ zín nukun dai do pọ̀n jijọ whegbenu etọn lẹ tọn, É ma sọ nọ dù núdùdù adidọ tọn.

²⁸ Ovi etọn lẹ fọ́n, bo sọ ylọ: ẹ dọ donanọ; Asú etọn ga, ewọ sọ na pipa ẹ.

²⁹ Viyọnnu susu wẹ jọ jijọ-dagbe, Ṣigba hiẹ hugán yé omẹ pó.

³⁰ Nukunmẹ dagbe oklọ wẹ, whànpẹ sọ yín nuvò: Ṣigba yọnnu he dibusi OKLUNỌ, wẹ yè na nọ pa.

³¹ Yí na ẹn sọn sinsẹ́n azọ̀n alọ etọn mẹ tọn mẹ; Gbọ̀ azọn etọn titi ni pa ẹ to dòkọ̀ ji.