HÓWHÍNWHÉN LẸ 30 - BIBLU WIWE LỌ 1923

¹ OHÓ Aguli ovi jakẹ tọn, ohó oplòn tọn. He dawe lọ dọ hlan Itiẹli, yèdọ na Itiẹli po Ukali po.

² Nugbo, yen jòkanlin hú mẹdepope, Yẹn ma sọ tindo yinyọnẹn gbẹtọ tọn gba.

³ Yẹn ma tlẹ plón nuyọnẹn, Yẹn ma tlẹ tindo nuyọnẹn mẹwiwe lẹ tọn.

⁴ Mẹnu wẹ ko hẹji yì olọn mẹ, bo ko jẹte? Mẹnu wẹ bẹ́ jẹhọn pli do akòtòkún etọn mẹ? Mẹnu wẹ bla osìn do awu mẹ? Mẹnu wẹ yí opòdo aigba tọn lẹpo hẹnai? Etẹ wẹ oyín etọn yín, podọ etẹ wẹ oyin ovi etọn tọn, eyín hiẹ sọgan yọnẹn?

⁵ Ohó Jiwheyẹwhe tọn lẹpo wẹ wiwé: Ewọ wẹ sàgba hlan yé he sọ otu yetọn do é gó lẹ.

⁶ Hiẹ dè dogó ohọ́ etọn blo, Na é nikã wọhẹ we, é bo na sọ yí we na lalonọ.

⁷ Onú awẹ wẹ yẹn ko kanbiọ sọn de we; A whlen yé do mi whẹpo yẹn na do kú blo.

⁸ Hẹn ovò po lalo po dẹn do mi: À na ohén kavi odọkun mi blo: Yí núdùdù he pé mi na mi dù.

⁹ Na yẹn nikã dù gọ̀ho hugán bo mòn we, dọ, Mẹnu wẹ OKLUNỌ lọ? Kavi dọ yẹn niká yín hẹntọnọ bo sọ finnú, na yẹn nikã wàylan do oyín Jiwheyẹwhe ṣie tọn go.

¹⁰ A jẹwhẹ̀ devi tọn na OKLUNỌ etọn blo, Na é nikã hodẹ̀do we, na hiẹ nikã yín owhè ylantọ.

¹¹ Whẹndo de tin he nọ hodẹ̀do otọ̀ yetọn, Bo ma sọ dona onọ yetọn.

¹² Whẹndo de tin, he wé to nukun ede tọn mẹ, Ṣigba yè ma ko klọ ẹ sọn dihó etọn mẹ.

¹³ Whẹndo de tin, Jẽ, na wẹ goyí etọn sọ; Nukunga etọn zé daga.

¹⁴ Whendo de tin, adú mehetọn taidi ohi, adúsó etọn di ohi, Nado dù wamọnọ lẹ súdo sọn aihọn mẹ, podọ agbatọnọ lẹ sọn gbẹtọ lẹ mẹ.

¹⁵ Aslọnẹn tindo viyọnnu awe, he to awhádo dọ, Yiwá, yíwá, Onú atọ̀n wẹ tin bọ yè ma sọgan pékọna gbède, Yèdọ ẹnẹ he ma nọ dọmọ, E sù.

¹⁶ Kútòmẹ; po adọ̀ wẹnsinọ tọn po; Aigba he ma nọ gọ́ na osìn; Podọ miyọn he ma nọ dọmọ, E sù.

¹⁷ Nukun he nọ gúnanyansi do otò etọn go, Bo sọ vlẹ nado sè onọ etọn tọn, Ohón agbadò mẹ tọn wẹ na dè e jẹgbonu, Ovi akùn tọn na sọ sọ ẹ dù.

¹⁸ Onú atọ̀n wẹ tin bo jawu do mi gbahu, Nugbo, enẹ he yẹn ma yọnẹn.

¹⁹ Aliho akùn tọn to oji aga; Aliho odàn tọn to osé ji; Aliho ohún tọn to ohù nukọn; Podọ aliho sunnu tọn po awhli de po.

²⁰ Mọ hunkọ wẹ aliho yọnnu ayọdetọ tọn; E dùnú, bo sọ súnsún onù eton, Bo dọmọ, Yẹn ma wà oylan de.

²¹ Na onú atọ̀n wutu, aihọn nọ jẹtukla, Podọ na ẹnẹ wutu wẹ é ma sọgan nọte.

²² Devi, whenuena é dugán; Podọ nulunọ, whenuena é gọ̀ho na núdùdù.

²³ Na yọnnu he yè gbẹwanna, whenuena yè yí i do basi asidaho; Podọ devi yọnnu, whenuena é zùn whédutọ onọ etọn tọn.

²⁴ Onú ẹnẹ wẹ tin bo whè gbahu to aihọn mẹ, Gãnṣo yé yọnnuin, yé sọ na oplòn omẹ.

²⁵ Madohuhlọnnọ wẹ dìdẹ́ lẹ, Ṣigba yé nọ wleawu na núdùdù yetọn to alūn whenu.

²⁶ Madohuhlọnnọ wẹ azui lẹ, Ṣigba yé basi odò yetọn to osé glọ.

²⁷ Owèn lẹ ma tindo ahọlu, Gánso yé omẹ pó nọ tòn yì to gbémẹgbémẹ.

²⁸ Tọ́gboyẹyẹ yí alọ etọn do hẹnnú, Bo sọ tin to awánu ahọlu lẹ tọn.

²⁹ Onú atọ̀n wẹ tin bo nọ zinzọnlin dagbedagbe, Nugbo ẹnẹ wẹ yòn to zọnlin zìnzìn mẹ:

³⁰ Kinnikinni he do huhlọn gbahu to kanlin lẹ mẹ, Bo ma nọ légodo na mẹde.

³¹ Osọ̀ he yè blapana; alukun; Ahọlu he awhàn de ma tin bo nọ fọ́n do e ji.

³² Eyín hiẹ ko basi nulu to zizé dewe do aga mẹ, Kavi eyín hiẹ ko lẹn oylan, yí alọ towe do onù towe.

³³ Nugbo whinwhàn yìnnọ̀ wẹ nọ hẹn limu anọ́sin tọn wá, Podọ fínfínyọn awòntin wẹ nọ hẹn ohùn jẹgbonu: Mọ adándonukunmẹ na homẹgble wẹ nọ hẹn avùn wá.