HÓWHÍNWHÉN LẸ 27 - BIBLU WIWE LỌ 1923

¹ A gblònadan osọ̀ tọn na dewe blo; Na hie ma yọ́n onú he azán de sọgan hẹn wá.

² Gbọ mẹdẽvo ni pa we, é yín onù hiẹlọsu tọn blo; Jonọ, é yín nuflo hiẹlọsu tọn blo.

³ Zánnu pènzín, tòkén sọ pènzín; Ṣigba homẹgble nulunọ tọn pènzín hú yé mẹawelẹ.

⁴ Homẹgble wẹ oka, homẹfìọ sọ wẹ otò gigọ́; Ṣigba mẹnu wẹ sọgan nọte to awuwhàn nukọn.

⁵ Wọhẹ gbangba tọn pọ́nte Hú owanyi he whlá.

⁶ Nugbo wẹ alán họ́ntọn tọn; Ṣigba nùdonugo kẹ̀ntọ tọn wẹ oklọ.

⁷ Ayiha he gọho tùn afọ winja ji; Ṣigba na ayiha he huvé do hù, onú vivẹ́ lẹpo wẹ vivi.

⁸ Leohè nọ do zlọn pé sọn adọ̀ etọn mẹ, Mọwe omẹ he to dindanpé dẹn do otẹn etọn.

⁹ Amì po nudèwán po hẹn ayiha vivi; Mọwẹ vivi họ́ntọn mẹtọn tọn gbọn linlẹn ayiha mẹ tọn dali.

¹⁰ Họntọn towe po họ́ntọn otó towe tọn po, A gbẹ́ to azán nukunbibia towe tọn gbè blo: Na kọmẹnu he sẹ̀pọ́ omẹ, pọ́nte hú mẹmẹsunnu he tin to aganu.

¹¹ Ovi ṣie, yín nuyọnẹntọ, bo sọ hẹn homẹ ṣie hùn; Na yẹn nido gblọnhona ewọ he to vivlẹ mi.

¹² Gbẹtọ zìnzìn mọ oylan jẹnukọn, bo sọ yí ede whlá; Ṣigba wunvinọ lẹ juwayi, yè sọ sayahẹ yé.

¹³ Yí avọ̀ etọn, na é yíalọ na jonọ wutu, Sọ yí gòdenú sọn é si na jonọ yọnnu.

¹⁴ Ewọ he fọ́n tọ afọnnufũ bo yí ogbè lélé do to nudọdo họ́ntọn etọn, Dẹhodo wẹ yè-na lẹn ẹn do nẹ.

¹⁵ Jikun-sọnnọnọ to jikun whenu, Po yọnnu avùnhotọ po, doponẹ wẹ yé.

¹⁶ Mẹdepope he yí i whlá, é yí jẹhọn whlá, Amì adusilọ etọn mẹ tọn he dè ede hia.

¹⁷ Ogàn na gàn ogàn: Mowẹ sunnu nọ gàn nukunmẹ họ́ntọn etọn tọn.

¹⁸ Mẹhe pọn votin go na dù sinsẹ́n etọn; Mọ ewọ he nọte pọ́n mẹmẹnu etọn wẹ yè na gbògbéna.

¹⁹ Le nukun nọ pé nukun to osìn mẹ, Mọwẹ ayiha gbẹtọ ton.

²⁰ Olọn zòdomẹ po dindọn po ma nọ gọ gbede Mọ é ma nọ sì: nukun gbẹtọ tọn gbède.

²¹ Di oganzén na fataka, Podọ zohò na sika; mọwẹ gbẹtọ na pipa etọn.

²² Eyín hiẹ tlẹ yí odóvi do tùn nulunọ to odó mẹ to, likun ṣẹnṣẹn, Nululu etọn ma na jo e do.

²³ Nọ dovivẹnu nado yọ́n le lẹngbọpó towe te, Na hiẹ ni sọ pọ́n kanlinpo, é towe go.

²⁴ Na adọkun ma nọ tin kakadoi gba: Be ojẹgbakun nọ tin jẹ whẹndo lẹpo mẹ?

²⁵ Ogbé tón, nufé ogbé tọn sọ ede hia, Omá osóta lẹ tọn plidopọ.

²⁶ Lẹngbọvu lẹ tin na avọ̀ towe, Alunkun lẹ sọ wẹ akuẹta ogle tọn.

²⁷ Hiẹ na tindo yìnnọ gbọgbọẹ tọn sù na dùdù towe, na dùdù whégbènu tọwe lẹ tọn, Podọ na dùdù devi-yọnnu towe lẹ tọn.