HÓWHÍNWHÉN LẸ 25 - BIBLU WIWE LỌ 1923

¹ EHELẼ ga wẹ hówhínwhén Sọlọmọni tọn, ehe omẹ Hẹzekia ahọlu Judá tọn lẹ kàn dai.

² Gigo Jiwheyẹwhe tọn wẹ nado whlá onú: Ṣigba yẹyi ahọlu lẹ tọn wẹ nado dindòna owhẹ́.

³ Olọn na agayìyì, aigba na osédò, Yè ma sọgan dindòna ayiha ahọlu lẹ tọn mọ.

⁴ Dè ahaya sọn fataka mẹ, Onú zinzán na sọ jẹgbonu na ayatọ fataka tọn.

⁵ Dè mẹylankan sọn ahọlu nukọn, Yè na sọ yí ofìn etọn hẹnai to dódó mẹ.

⁶ Á zé dewe doaga to ahọlu nukọn blo, A sọ nọte to otẹn omẹ gbõgbõ lẹ tọn mẹ blo.

⁷ Na é bọawu na yè ni dọ na we dọ, Wá aga file, Hú na yè ni dòn we do godo to nukọn ahọvi He nukun towe mọ tọn.

⁸ A yawu tónjẹgbonu nado hòavùn blo, Na hiẹ nika nọ mayọ́n ehe hiẹ na wà to pòdo etọn, Whenuena kọmẹnu towe na dowinyan we.

⁹ Hoavùn kọmẹnu towe tọn hẹ ẹ, Ṣigba aṣli mẹdẽvo tọn hiẹ dèhia blo.

¹⁰ Na ewọ he sè nikã dowinyan we, Ovlẹ towe ma na so yì gbède.

¹¹ Di agòn sika tọn to oha fataka tọn mẹ, Mọwẹ ohó he yè dọ to ojlẹ etọn mẹ te.

¹² Di sika—lọkẹ podọ di asọdonu sika tọn dagbedagbe, Mọwẹ mẹwọhẹtọ te to otọ́ tónúsètọ tọn mẹ.

¹³ Di avivọ kẹnsu tọn to jijẹ whenu, Mowẹ wẹndagun nugbonọ te na yé he do e hlan lẹ: Na é miọnhomẹna klunọ etọn lẹ.

¹⁴ Ewọ he yígo to nunina oklọ tọn mẹ, Taidi aslọ po jẹhọn po he matindo jikun.

¹⁵ Osọ́dogo dindẹn wẹ yè do nọ diọ ayiha na ahọvi, Odó he mlẹn wẹ nọ gbà ohú.

¹⁶ Eyin hiẹ mọ owín? dù ehe pékòna we, Na é nikã gọ́hòna we, hiẹ bo na sọ slu i.

¹⁷ Dè afọ towe sọn owhé kọmẹnu towe tọn gbè: Na onú towe nikã dikọ nẹ̀, ewọ bo na sọ gbẹwanna we.

¹⁸ Mẹhe dekunnu lalo tọn do kọmẹnu etọn go, Wẹ ahuzù, ohi, po ogá dida po.

¹⁹ Tódido mawànugbonọ tọn to ojlẹ, tukla tọn mẹ, E taidi adú he wẹ́n, podọ di afọ he klan sọn opétẹn.

²⁰ Di mẹhe klọn awu dai to avivọ—whenu, podọ di vẹ̃nhàn whinwhán to afín mẹ, Mowẹ ewọ he to hànji te na mẹhe homẹ etọn gble de.

²¹ Eyín huvẹ́ to kẹ̀ntọ towe hù, na núdùdù i, Eyín Ovẹ sọ hú i, na osìn i ni nù.

²² Na hiẹ na bẹ́ mìyọnkan mìyọnawu do ota nẹ̃, OKLUNỌ na suahọ we.

²³ Jehọn agewaji tọn hẹn jikun wá: Mọwẹ odó mẹnudọtọ tọn nọ hẹn, nukunmẹ yìnylọn wá.

²⁴ E pónte na nọnọ̀ lọnglọnẹn ozà tọn ji to aga, Hú hẹ́ yọnnu avùnhòtọ to hòngbo dopo mẹ.

²⁵ Di osin mimiọn na ayiha he ovẹ́ to húhú, Mọwẹ wẹndagbe sọn aganu te.

²⁶ Dódónọ he diọtẹn to mẹylankan nukọn, é taidi asisa he wlu, Podọ di osìn vivi he gble.

²⁷ E ma yọ́n nado dù owín susu gba: Mọ na gbẹtọ nado din gigo ede tọn, ma yín gigo.

²⁸ Ewọ he ma dùgán do gbigbọ ede tọn Ji taidi otò he yè họ́ liai, bọ é ma tindo dòkó.