HÓWHÍNWHÉN LẸ 24 - BIBLU WIWE LỌ 1923

¹ HIẸ basi homẹha do mẹylankan go blo, Mọ a sọ jlo nado nọ̀hẹ yé blo.

² Na ayiha yetọn to hùsúdo lẹn, Nuflo yetọn sọ to ohó oka tọn dọ.

³ Nuyọnẹn wẹ yè do nọ gbà ohò; Zìnzìn wẹ yè do nọ do e ai.

⁴ Gbon nuyọnẹn dali wẹ yè nọ hẹn abòmẹ gọ́ Na adọkun hunkọhunkọ akuẹgégénu tọn po ehe yọnwhànpẹ lẹ po.

⁵ Gbẹtọ nuyọnẹntọ do huhlọn: Nugbo gbẹtọ nuyọnẹntọ nọ hẹn huhlọn etọn zùn susu.

⁶ Na gbọn linlẹn nuyọnẹn tọn dali wẹ hiẹ na fùn awhàn towe: Podọ to susu tòhódọtọ lẹ tọn mẹ wẹ gingán te,

⁷ Nuyọnẹn dite gbahu na nulunọ: Ewọ ma na kẹ̀ onù etọn to dòkọ́nu.

⁸ Ewọ he to linlẹn nado wàylan Wẹ yè na ylọ gbẹtọ okanọ.

⁹ Linlẹn nululu tọn ylando wẹ: Osùnú de wẹ mẹvlẹtọ to e de.

¹⁰ Eyín núsikọna we to azán nukunbibia tọn gbè, Huhlọn towe ma sẹtén gba.

¹¹ Eyín hiẹ gbẹ́ nado whlẹn yé he yè dọ̀n yì okú mẹ lẹ, Podọ yé he yè dè na hùhù lẹ.

¹² Bọ hiẹ dọmọ, Pọ́n, mí ma yón we; Bé ewọ he nọ jlẹ ayiha pọ́n ma to ayido e go? Be ewọ he to ayiha towe go pọ́n ma yón ẹn? É na suahọ etọn gbẹtọ kẹdẹdi azón etọn.

¹³ Ovi ṣie, dù owin, na é yón; Po owínja he vivi to onù towe mẹ po:

¹⁴ Mowẹ yinyọnẹn nuyọnẹn tọn na te hlan ayiha towe: Whenẹnu wẹ ale na tin, Yè ma na sọ sán tódido towe ṣè.

¹⁵ Hiẹ tọwu blo, hiẹ mẹylankan, do aisintẹn dódónọ tọn ji blo: À hẹn otẹn gbọjẹ etọn tọn gble blo.

¹⁶ Na nugbonọ jai whla ṣinawe, bo sọ fọ́n: Ṣigba mẹylankan na jai do oylan mẹ.

¹⁷ A jaya whenuena kẹ̀ntọ towe jai blo, A dike homẹ towe hùn whenuena é yín gòhùnna blo.

¹⁸ Na OKLUNỌ nikã mọ ẹn, bọ é na ylan to nukun etọn mẹ, E bo na sọ lẹ́ homẹgble etọn sọn é ji.

¹⁹ A gblehomẹ na mẹylankan tọn wutu blo, A sọ whanwu na ylandonọ lẹ tọn blo.

²⁰ Na ale ma na tin na mẹylankan, Miyọngbán mẹylankan tọn wẹ yè na si.

²¹ Ovi ṣie, dibusi OKLUNỌ po ahọlu po: A sọ kòndopọ hẹ́ yé he nọ wàyẹnu lẹ blo:

²² Na nukunbibia yetọn na fọ́n ajiji: Podọ hùsúdo yé mẹawelẹ lọ tọn, mẹnu wẹ yọ́n ẹn?

²³ Onú helẹ̃ ga wẹ didọ nuyọnẹntọ lẹ tọn. É ma yón na kú gbẹtọ winyan to whẹ̀dida kọ̀n gba.

²⁴ Ewọ he dọ na mẹylankan dọ dódónọ wẹ hiẹ; Ewọ wẹ gbẹtọ lẹ na zùn, akọta lẹ na sọ gbẹwan nẹ̃.

²⁵ Ṣigba yé he wọhẹ ẹ lẹ na tindo homẹhùn, Dona dagbe na sọ jẹte do yé ji.

²⁶ Mẹdepope he na donùnùgo Na ewọ he gblọnhó dagbe.

²⁷ Wleawu azón towe tọn dai to gbonu, Bo sọ yi vivẹnu do jloai to ogle towe mẹ; To godo ehe tọn, gbá ohó towe.

²⁸ A yin kunnudetọ do kọmẹnu towe go yaya blo: A yi nuflo towe do wayẹ́ blo.

²⁹ A dọ blo, dọ, mọwẹ Yẹn na wà do e, Dile é wà do mi do: Yẹn na suahọ dawe lọ kẹdẹdi azón etọn.

³⁰ Yẹn gbọn ogle adidọnọ tọn mẹ, Podọ vẹ́ngle mẹhe nuyọnẹn pò na tọn dali.

³¹ Dayi e go, owun kó ṣinyọn popo lẹpo ji. Azọ́wunnọ ko ṣinyọn nukun etọn ji, Agbó zannu etọn tọn ko họ́ liai.

³² Whenẹnu wẹ yẹn mọ, bo sọ yí ayiha do e go susu: Yẹn pọ́n ẹn, bo sọ yí oplọ́n.

³³ Amlọn pẹde dogó, amlọngó pẹ de, Alọbladogo pẹ́de nado damlọn vude.

³⁴ Mowẹ oya towe na wá di mẹhe to zọnlin ji: Matindo towe di sunnu to mẹ.