HÓWHÍNWHÉN LẸ 23 - BIBLU WIWE LỌ 1923

¹ WHENUENA hiẹ sinai nado dùnú hẹ́ ogán de, Dayi ewọ he tin nukọn towe go talala.

² Bo sọ yí ohi do gbèkan towe ji, Eyín hiẹ yín gbẹtọ he yiwanna núdùdù.

³ A jlo núdùdù vivi etọn blo: Na núdùdù oklọ tọn wẹ.

⁴ A wàzón nado yín adọkunnọ blo: Doalọte sọn nuyọnẹn dewe tọn mẹ.

⁵ Bó hiẹ na yí nukun towe do pọ́n onú he ma tin? Na adọkun basi awà Na yéde di akùn he to zinzlọn to oji aga.

⁶ A dù núdùdù nukun ylankannọ tọn blo, Mọ a sọ jlo núdùdù vivi etọn blo:

⁷ Na le é to linlẹn to ayiha etọn mẹ, mọwẹ e te: To dùdù, bo to nùnù wẹ é to didọ na we: Ṣigba ayiha etọn ma tin hẹ we gba.

⁸ Núdùdù he hiẹ dù wẹ hiẹ na slu jẹgbonu, Hiẹ na sọ hẹn ohó vivi towe bú.

⁹ A dọ ohó to otọ́ nulunọ tọn mẹ blo; Na é na vlẹ nuyọnẹn ohó towe tọn.

¹⁰ A fẹ dògbo hóhówhenu tọn sẹ́ blo; A sọ biọ ogle otọ́ṣiọvi lẹ tọn mẹ blo.

¹¹ Na Mẹjitọ yetọn dohuhlọn; E na yí avùn yetọn ho hẹ we.

¹² Yí ayiha towe do oplón go, Podọ oto towe do òhó nuyọnẹn tọn go.

¹³ A dòn alọ wọhẹ tọn do godo sọn yòpọ de blo: Na eyín hiẹ yí obá do hò e, é ma to na: kú.

¹⁴ Hiẹ na yi obá do hò e, Bo sọ whlẹn ẹn sọn olọn zòdo mẹ,

¹⁵ Ovì ṣie, eyín ayiha towe yọnnuin, Ayiha ṣie na jaya, yèdọ ṣie.

¹⁶ Homẹ ṣie na sọ jaya Whenuena nuflo towe to onú dódó dọ.

¹⁷ A dike ayiha towe hahomẹ do ylandonọ go blo: Ṣigba na hiẹ ni tin to osi OKLUNỌ tọn mẹ, to azán lẹpo mẹ.

¹⁸ Na opòdo tin nugbo, Tódido towe ma na sán só.

¹⁹ Sè, hiẹ ovi ṣie, na hiẹ ni yọnnuin, Bo sọ nọ ze ayiha towe do aliho jíjlọ ji.

²⁰ A tin to ahànnumunọ lẹ mẹ blo; To yé he to agbasalan yéde tọn hẹngble lẹ mẹ.

²¹ Na ahànnumunọ po adọ̀nọ po na zùn wamọnọ: Adidọnọ wẹ na yí nukija ṣinyọnna agbasa etọn.

²² Dotóai na otọ́ towe he ji íwẹ, A sọ vlẹ onọ towe, whenuena é pòyọnhó blo.

²³ Hò nugbo, a sà ẹ blo: Nuyọnẹn po oplón po, po zìnzìn po ga.

²⁴ Otọ́ dódónọ tọn na jaya talala: Èwọ he sọ ji ovi nuyọnẹntọ, na tindo ayajijẹ to ohò etọn mẹ.

²⁵ Otọ́ towe po onọ towe po na jaya, Homẹ mẹhe ji wẹ tọn na hùn.

²⁶ Ovi ṣie, jo ayiha towe na mi, Bo sọ gbọ nukun towe ni do homẹ hùnhùn to aliho ṣie ji.

²⁷ Na ogá, odò sisosiso de wẹ; Podọ yọnnu jonọ, odò fínfínyọn de wẹ.

²⁸ Ewọ sọ tọwu di wẹnyantọ de, Bo sọ hẹn ylanwàtọ lẹ Budeji to gbẹtọ lẹ ṣẹnṣẹn.

²⁹ Mẹnu wẹ tindo oya? mẹnu wẹ tindo awubla? mẹnu wẹ tindo avùn? Mẹnu wẹ tindo nutlọ? mẹnu wẹ tindo aslan madodego? Mẹnu wẹ tindọ bibia nukun tọn.

³⁰ Yé he nọte dẹn to vẹ̃nhàn kòn: Yé he jei nado whle vẹ̃nhàn flusọ pọ́n.

³¹ A pọ́n vẹ̃nhàn whenuena é bia blo, Whenuena é yí whẹ̀kan etọn hia to kọfo mẹ, Bọ yè tọ zizé e mì, bọ é to vivivivi.

³² To godo e nọ hẹnadúmẹ di odàn, Bo sọ nọ kanmẹdù di amapoe.

³³ Nukun towe na nọ pọ́n yọnnu jonọ lẹ, Ayiha towe na sọ nọ dọhó yẹwiwà tọn.

³⁴ Nugbo, hiẹ na taidi ewọ he mlọnai to ohù ṣẹnṣẹn, Kavi di ewọ he mlọnai to alatin ji.

³⁵ Hiẹ na sọ dọmọ, yé linú mi awú ma vẹ́ mi; Yé linú mi, yẹn ma sọ yọnẹn: Whetẹnu wẹ yẹn na fọ́n? yẹn na sọ to mọdo nẹ̃ jãnwẹ.