HÓWHÍNWHÉN LẸ 21 - BIBLU WIWE LỌ 1923

¹ AYIHA ahọlu tọn tin to alọ OKLUNỌ tọn mẹ, di otọ̀ osìn tọn: Ewọ sọ nọ lẹ́ ẹ hlan fidepope he jlo e.

² Aliho gbẹtọ tọn lẹpo wẹ yòn to nukun ede tọn mẹ: Ṣigba OKLUNỌ wẹ alihiamẹtọ ayiha tọn.

³ Nado basi dódó po whẹ̀dida po, É basi alọkẹyi na OKLUNỌ hú avọ̀.

⁴ Nukun sakla tọn, po goyí ayiha tọn po, Po glepipọ mẹylankan lẹ tọn po, ylando wẹ.

⁵ Linlẹn tuklajẹtọ tọn hlan súsu mẹ wẹ: Ṣigba dopodopo mẹhe yawu tọn, hlan matindo mẹ wẹ.

⁶ Adọkunnu whiwhla gbọn odé lalo tọn de dali, Gbọfufu he to godoyì nukọnyì to yé he to okú dinpé lẹ si, de wẹ.

⁷ Jijọ mẹylankan lẹ tọn wẹ na hù yé súdo; Na yé gbé nado basi whẹ̀dida wutu.

⁸ Mẹdepope he to zọnlin yẹwiwà tọn zìn, gbẹtọ ylankan wẹ: Ṣigba homẹ wiwenọ wẹ azọ̀n etọn jlọ.

⁹ E pọnte nado nọnọ̀ lọnglọnẹn ozà tọn ji to aga, Hú hẹ yọnnu avùnhotọ to họngbo dopo mẹ.

¹⁰ Ayiha mẹylankan tọn to oylan dinpó: Kọmẹnu etọn ma mọ nukundagbe to nukun etọn ji.

¹¹ Whenuena yè sayahẹ mẹvletọ, yè hẹn wunvinọ zùn nuyọnentọ: Whenuena yé sọ to nuyọnẹntọ plọ̀n, ewọ mọ nuyọnẹn yi.

¹² Dódónọ dayi owhé mẹylankan tọn go; Ṣigba Jiwheyẹwhe gbà mẹylankan lẹ súdo na ylankan yetọn wutu.

¹³ Mẹhe sú otó etọn do awhá wamọnọ lẹ tọn go, Ewọ lọsu na dawhá ga, ṣigba yè ma na sé

¹⁴ Nunina nuglọ tọn vọ̀ homẹgble: Ale to yẹndawe avọ̀ tọn mẹ, vọ̀ homẹgble sinsinyẹn.

¹⁵ Aya wẹ na dódónọ nado basi whẹ̀dida: Ṣigba dindọ̀n wẹ na ylanwàto lẹ.

¹⁶ Mẹhe zẹ̀ sọn aliho zìnzìn tọn ji, E na nọnọ̀ agùn oṣiọ lẹ tọn mẹ

¹⁷ Ewọ he yiwanna gbẹ̀dudu na zùn wamọnọ: Ewọ he sọ yiwanna vẹ̃nhàn po amì po ma sọgan wàdọkun.

¹⁸ Mẹylankan wẹ na yín mẹflikuẹ na dódónọ, Podọ ylanwàtọ to otẹn nugbonọ tọn mẹ.

¹⁹ E pónte nado nọnọ̀ zùngbo mẹ, Hú hẹ yọnnu akunnanọ po homẹhatọ po.

²⁰ Adọkun jijlo po amì po tin to aisintẹn nuyọnẹntọ le tọn mẹ: Ṣigba gbẹtọ nulunọ zán en hẹngble.

²¹ Ewọ he hodo dódó po leblanu po na Mọ ogbó, dódó po yẹyi po.

²² Gbẹtọ nuyọnẹntọ họ́ dokó otò huhlọntọ lẹ tọn ji, Bo sọ hó huhlọn tódido etọn tọn liai.

²³ Mehe whlá onù etọn po odé etọn po, Whlá ayiha etọn sọn tukla mẹ.

²⁴ Omẹ saklanọ podọ goyìtọ, mẹvlẹtọ wẹ oyín etọn, E to nuwà to homẹgble susu mẹ.

²⁵ Ojlo adidọnọ tọn hù i: Na alọ etọn gbẹ́ azón wiwà dai.

²⁶ E yí homẹha do to nukunkẹn basi to azán lẹpo gbè: Ṣigba dódónọ nọ namẹ, bo ma sọ doalọte.

²⁷ Avọ́ mẹylankan tọn nuylanylan wẹ: Nẹmunẹmu, whenuena é hẹn ẹn wá po ayiba ylankan po?

²⁸ Kunnudetọ lalonọ na dòn: Ṣigba omẹ he sè na to hódọ whepoponu.

²⁹ Omẹ ylankan zé nukun etọn sinyẹn: Ṣigba nugbonọ to aliho etọn hẹn jlọ

³⁰ Nuyọnẹn, kavi zìnzìn, Kavi linlẹn ma tin do OKLUNỌ ji.

³¹ Yè wleawu osé tọn dai na azán awhàn tọn: Ṣigba awhàn gbigbà sọn alọ OKLUNỌ tọn mẹ wẹ.