HÓWHÍNWHÉN LẸ 2 - BIBLU WIWE LỌ 1923

¹ OVI ṣie, eyín hiẹ na yí ohó ṣie lẹ, Bo sọ bé gbèdide ṣie pli do de we.

² Sọmọ bọ hiẹ lẹ́ otọ́ towe hlan nuyọnẹn go, Bo sọ jlẹ ayiha towe hlan ayi: tùnnugo;

³ Nugbo eyín hiẹ to awhádo hodo nuyọnẹn, Bo sọ zé ogbè towe dàga na ayitùnnugo;

⁴ Eyín hiẹ din in di fataka, Bo sọ din in di adọkunnú he whlá.

⁵ Whenẹnu wẹ hiẹ na tùnwun osí OKLUNỌ tọn, Bo na sọ mọ oyọnẹn Jiwheyẹwhe tọn.

⁶ Na OKLUNỌ wẹ nọ na oyọnẹn omẹ: Onù etọn mẹ wẹ nuyọnẹn po ayi tùnnugo po nọ sọn.

⁷ E bẹ́ nuyọnẹn pli na dódónọ lẹ: Ewọ sọ wẹ gaglo hlan yé he to zọnlinzin to dódó mẹ lẹ.

⁸ E yí omọ́ whẹ̀dida tọn whlá, Bo sọ whlá aliho mẹwiwe lẹ tọn.

⁹ Whenẹnu wẹ hiẹ ná tùnwun dódó, po whẹ̀dida po, Po kunnumahu po; yèdọ omọ́ dagbe lẹpo.

¹⁰ Whenuena nuyọnẹn biọ ayiha towe mẹ, Bọ oyọnẹn sọ yín homẹhùnnú gbigbọ towe tọn;

¹¹ Zìnzìn na whlá we, Wuntùntùn na sọ yí we whlá.

¹² Nado whlẹn we sọn aliho mẹylankan tọn ji, Sọn gbẹtọ he to onú gblezọn dọ si.

¹³ Mẹhe gbé aliho dódó tọn dai, Nado zinzọnlin to aliho zinvlu tọn ji.

¹⁴ Mẹhe jaya nado wàylan, Bo sọ hùnhomẹ to owalọ wluwlu mẹylankan tọn mẹ.

¹⁵ Mẹhe aliho etọn yín gbingbán, Bọ yé sọ yín mẹwluwlu to omó yetọn ji.

¹⁶ Nado whlẹn we sọn yọnnu jonọ si, Yèdọ sọn jonọ he nọ yí ohó etọn do gàn omẹ.

¹⁷ Mẹhe gbé alihiamẹtọ ovuwhenu etọn tọn dai, Alẹ̀nu Jiwheyẹwhe etọn tọn.

¹⁸ Na owhé etọn dè hlan okú dali, Omó etọn hlan osiọ lẹ dali.

¹⁹ Mẹhe yì e de bo sọ lẹ́gọ̀ de ma tin, Mọ alọ yetọn ma nọ jẹ omọ́ ogbẹ̀ tọn go.

²⁰ Na hiẹ nido to zọnlinzin to aliho gbétọ dagbe tọn ji, Na hiẹ nido yí omó dódónọ? tọn whlá.

²¹ Na nugbonọ wẹ na nò aigba lọ ji, Yé he pó lẹ wẹ na nò e mẹ.

²² Ṣigba mẹylankan lẹ wẹ yè na sán sọn aihọn mẹ, Sénmẹjẹtọ lẹpo wẹ yè na dónsùn sọn e mẹ.