HÓWHÍNWHÉN LẸ 12 - BIBLU WIWE LỌ 1923

¹ MẸHE yiwanna oplọ́n yiwanna nuyọnẹn: Ṣigba ewọ he gbẹwanna wọhẹ okanlin jọmẹ wẹ.

² Gbẹtọ dagbe de mọ nukundagbe to OKLUNỌ de: Ṣigba gbẹtọ nuflo ylankan tọn de wẹ é na gbléwhẹ̀do.

³ Yè ma na yí alọ gbẹtọ tọn hẹnai gbọn jijọ ylankan dali gba: Ṣigba adò dódónọ tọn ma na yín sisẹtẹnna.

⁴ Yọnnu jijọ dagbenọ ojẹgbakun de wẹ hlan asú etọn: Ṣigba ehe nọ dowinyan omẹ taidi osìn nutitẹ tọn to ohú etọn mẹ,

⁵ Linlẹn dódónọ tọn jlọ: Ṣigba linlẹn mẹylankan lẹ tọn wẹ oklọ.

⁶ Ohó mẹylankan tọn wẹ nado dowuna ohùn: Ṣigba onù nugbonọ lẹ tọn na whlẹn yé dai.

⁷ Yè sisé mẹylankan lẹ liai, yé ma sọ tin: Ṣigba owhé dódónọ lẹ tọn na nọte.

⁸ Yè na pa gbẹtọ kẹdẹdi nuyọnẹn etọn: Ṣigba ewọ he tindo ayiha gblezọn wẹ yè na vlẹ.

⁹ Ewọ he yè to vivlẹ bọ é sọ tindo lizọnyitọ de, E pọ́nte hú ewọ he to ede pa bo ma tindo núdùdù.

¹⁰ Gbẹtọ dódónọ de hò ogbè kanlin etọn tọn pọ́n: Ṣigba lẹblanu mẹylankan lẹ tọn wẹ oka.

¹¹ Ewọ he pọ̀ aigba etọn wẹ yè na yí núdùdù do pékọna: Ṣigba ewọ he to mẹvónu hodo wẹ zìnzìn pò na.

¹² Mẹylankan lẹ jlo dòkọ—tó omẹylankan lẹ tọn: Ṣigba adò dódónọ lẹ tọn sèn sinsẹ́n.

¹³ Ylanwà nuflo lẹ tọn mẹ wẹ omò de te hlan mẹylankan: Ṣigba dódónọ na tón sọn tukla mẹ.

¹⁴ Gbọn ale onù gbẹtọ tọn mẹ tọn dali wẹ yè na yí onú dagbe do pékọ nẹ̃: Ale alọ́nuzon gbẹtọ tọn mẹ wẹ yè na yí nẹ̃: te

¹⁵ Aliho nulunọ tọn jlọ to nukun ede tọn mẹ: Ṣigba ewọ he dotó lẹnpọ́n go wẹ nuyọnẹntọ.

¹⁶ Homẹgble nulunọ tọn ma vé yínyọnẹn: Ṣigba mẹzìnzìn Ṣinyọnnúdo winyan.

¹⁷ Ewọ he dọhó nugbo sọ dódó hia: Ṣigba kunnudetọ lalonọ de, Oklọ.

¹⁸ Òmẹ dẽlẹ tin bo nọ yawu dọhó di sisọ ohi de tọn: Ṣigba odẹ́ nuyọnẹntọ lẹ tọn, wẹ núgángán.

¹⁹ Nuflo nugbonọ tọn wẹ yè na hẹn dote kakadoi: Ṣigba odẹ́ lalo tọn, whenu vude wẹ.

²⁰ Oklọ tin to ayiha yé he to oylan lẹn lẹ tọn mẹ: Ṣigba na lẹnhẹtọ jijọho tọn lẹ, ayajijẹ wẹ.

²¹ Oylan depope ma na jọ do dódónọ go: Ṣigba mẹylankan lẹ wẹ na gó na oylan.

²² Osùnú de to OKLUNỌ nukunmẹ wẹ nuflo lalo tọn: Ṣigba yé he to dagbe wà lẹ wẹ homẹhùn etọn.

²³ Omẹ zìnzìn yí nuyọnẹn whlá: Ṣigba ayiha nulunọ lẹ tọn to nululu hódo.

²⁴ Alo vivẹnunọ tọn na dugán: Ṣigba adidọnọ na tin to sónjijọ glọ.

²⁵ Awubla to ayiha gbẹtọ tọn mẹ wẹ nọ hẹn ẹn dokòdo: Ṣigba ohó dagbe wẹ nọ hẹn ẹn jaya.

²⁶ Dódónọ dè kọmẹnu etọn do aliho Ji: Ṣigba aliho mẹylankan lẹ tọn klọ yé.

²⁷ Gbẹtọ adidọnọ ma wle nuyanwẹnna etọn gba: Ṣigba na yín vivẹnunọ adọkun he hòakuẹ wẹ

²⁸ To ahho dódónọ tọn ji wẹ ogbẹ́ te: Okú ma tin to omó nugbo tọn ji gba.