HÓWHÍNWHÉN LẸ 11 - BIBLU WIWE LỌ 1923

¹ OJLẸNU oklọ tọn de osùnú de wẹ na OKLUNỌ: Ṣigba nujlẹnu nugbo tọn de wẹ họmẹhùnhùn etọn.

² Whenuena sakla wá, whenẹnu wẹ winyan wá. Ṣigba nuyọnẹn tin to whiwhẹ́nọ de.

³ Nugbo nugbonọ lẹ tọn na plọ́n yé: Ṣigba yẹwiwà ylanwàtọ lẹ tọn na hù yé súdo.

⁴ Adọkun ma doale to azán homẹgble tọn gbè: Ṣigba dódó wẹ nọ whlẹn omẹ sọn okú si.

⁵ Dódó mẹpipé tọn na plọ́n ẹn to aliho etọn ji: Ṣigba mẹylankan na jai gbọn ylankan etọn mẹ.

⁶ Dódó nugbonọ lẹ tọn na whlẹn yé: Ṣigba ylanwàtọ lẹ wẹ yè na wle to oylan yetọn mẹ.

⁷ Whenuena mẹylankan kú, nukundo etọn na súdo: Tódido gbẹtọ mawàdódónọ lẹ tọn súdo.

⁸ Yè whlẹn nugbonọ sọn tukla mẹ, Mẹylankan na sọ jẹ otẹn etọn mẹ.

⁹ Onù wẹ ylanwàtọ do nọ hù kọmẹnu etọn súdo: Ṣigba nuyọnẹn wẹ yè na do whlẹn nugbonọ lẹ dai.

¹⁰ Whenuena jijọho tin na dódónọ, otò nọ jaya: Whenuena mẹylankan dọ́n, abobo nọ di.

¹¹ Gbọn dona nugbonọ lẹ tọn dali otò yín zedaga: Ṣigba yè gbọn onù mẹylankan lẹ tọn dali hó ẹ liai.

¹² Ewọ he ma tindo nuyọnẹn nọ vlẹ kọmẹnu etọn: Ṣigba gbẹtọ he zìn bò onù etọn do.

¹³ Ewọ he nọ doajan dè ohó nuglọ tọn hia: Ṣigba ewọ he yín nugbonọ to ayiha mẹ yí ohó lọ whlá.

¹⁴ Fie mẹdèdaliji nuyọnẹn tọn ma tin te gbẹtọ lẹ jai: Ṣigba susugege tòhódọtọ lẹ tọn mẹ wẹ jijọho te.

¹⁵ Ewọ he basi alọyítọ na jonọ na mọ tukla: Ṣigba ewọ he gbẹwanna alọyíyí tin to jijọho.

¹⁶ Yọnnu dagbewàtọ hẹn yẹyi dote: Dile gbẹtọ huhlọntọ lẹ nọ hẹn adọkun dote do.

¹⁷ Gbẹtọ lẹblanunọ wà dagbe hlan gbigbọ ede tọn: Ṣigba gbẹtọ okanọ to tuklado agbasa ede tọn.

¹⁸ Mẹylankan to azón ale oklọ tọn wà; Ṣigba ewọ he to dódó dọ wẹ ale nugbo tin na.

¹⁹ Dile mẹhe nọte to dódó mẹ do ogbẹ́ do: Mowẹ mẹhe to módona oylan, é to módona okú ede tọn.

²⁰ Yé he yín gbigble to ayiha mẹ wẹ osùnú de hlan OKLUNỌ: Ṣigba homẹ etọn hùn do mẹhe yín nugbonọ to aliho yetọn ji lẹ go.

²¹ Eyín yé tlẹ sín alọ do alọ go, mẹylankan ma na yì majiya: Ṣigba okún dódónọ lẹ tọn wẹ yè na whlẹn.

²² Dile sikalọkẹ te to awọntin ohàn de tọn mẹ, Mọwẹ yọnnu whanpẹnọ he ma zìn.

²³ Dagbe dodo wẹ ojlo dódónọ homẹ tọn; Ṣigba homẹgble wẹ nukundo mẹylankan lẹ tọn.

²⁴ Mẹde tin bọ to vúnvúnvúnvún, gãnṣo é to susu deji, Mẹde sọ tin bo sọ jọ hẹngógóenọ hú le é jẹ do, ṣigba hlan mado mẹ wẹ:

²⁵ Ayiha dagbewà tọn wẹ yè na hẹn klo: Ewọ he to sìnhúmẹ, ewọ lọsu ga na yín sìnhúna.

²⁶ Ewọ he doalọ gbàdo tọn ote, ewọ wẹ gbẹtọ na hòdèdo: Ṣigba dona na tin to ota ewọ he sà ẹ tọn.

²⁷ Ewọ he wadẹ̃dẹ̃ do din dagbe, na mọ nukundagbe: Ṣigba ewọ he to oylan din pé, é ja pipla ẹ gbè.

²⁸ Ewọ he dotudo adọkun etọn go na jai: Ṣigba dódónọ na to vùnvùn di ala atin tọn.

²⁹ Ewọ he dotukla owhé ede tọn na dù jẹhọn gú: Nulunọ na yín lizọnyítọ na nuyọnẹntọ ayiha tọn.

³⁰ Sinsén dódó tọn atin ogbè tọn de wẹ; Podọ ewọ he sọ diọ ayiha gbẹtọ tọn, wẹ nuyọnẹntọ.

³¹ Dayi e go, yè na suahọ etọn dódónọ to aihọn mẹ: Nẹmunẹmu wẹ mẹylankan po ylandonọ po.