HÓWHÍNWHÉN LẸ 1 - BIBLU WIWE LỌ 1923

¹ HÓWHÍNWHÉN Sọlomọni tọn, ovi Davidi, ahọlu Islaeli tọn tọn le;

² Nado yón nuyọnẹn po mẹplọnlọ po; Nado tùnwun oho wuntùntùn tọn.

³ Nado mọ mẹplọnlọ zìnzìn tọn, to dódo, whẹ̀dida po kunnumahu po mẹ;

⁴ Nado na zìnzìn hlan mayọndèno, Oyọnẹn po hóyọnẹn po hlan sunnu dẹpẹ

⁵ Na nuyọnẹntọ nido sè, bo sọ sudeji to nupinplọn mẹ; Podọ na zìnzìntọ nido yíjẹ hónamẹ whínwhén lẹ kòn:

⁶ Nado tùnwun hówhínwhón de, po oló de po; Ohó nuyọnẹntọ tọn lẹ po agọ̀gbè yetọn lẹ po.

⁷ Dòdo oyọnẹn tọn wẹ osi OKLUNỌ tọn: Ṣigba oklenọ vlẹ nuyọnẹn po mẹplọnlọ po.

⁸ Ovi ṣie, sè mẹplọngbè otọ́ towe tọn, A gb osén onọ towe tọn dai blo:

⁹ Na ye na yín gbakun whanpẹ tọn de hlan ota towe, Podọ okòjé lẹ de lẹ́do okọ̀ towe.

¹⁰ Ovi ṣie, eyín ylandonọ lẹ klọ we, A dikè blo.

¹¹ Eyín ye dọmọ, Wá gọ́na mí, Gbọ mí ni tòwu na ohùn, Gbọ mí ni java do nuglọ na homẹvọnọ whemahu.

¹² Gbọ mí ni ze yé mì gbẹ́te di kútòmẹ; To agbligbẹ, di yé he jẹte jei odò mẹ lẹ.

¹³ Mí na din adọkun lẹpo mọ, Mí na yí ogblan do gọ́ ohọ̀ mítọn lẹ.

¹⁴ Hiẹ na kọn ovò towe do ṣẹnṣẹn mítọn; Mí omẹ pó na tindo sẹ́gẹ dopo.

¹⁵ Ovi ṣie, a zinzọnlin to aliho hẹ yé blo; Gọ̀ afọ towe sọn omọ́ yeton ji:

¹⁶ Na afọ yetọn dowezun hlan oylan, Bo sọ yá nado kòn ohùn dai;

¹⁷ Na yaya wẹ yè kun odò dai To ohó depope nukunmẹ:

¹⁸ Ye dowuna ohùn yéde tọn; Yé to avajẹ to nuglọ na ogbọ́ yéde tọn.

¹⁹ Mọwẹ aliho mẹhe yín wónkutọ bublu tọn lẹpo tọn te; É nọ yí ogbẹ́ onúnọ etọn lẹ tọn yì.

²⁰ Nuyọnẹn to awhá lélé do to aligboji; E to ogbè etọn do to ofi gbigblo lẹ:

²¹ É to awhádo to aligbo jinján lẹ ji: To bibiọ họmẹ họngbo lẹ tọn mẹ, to tòdahó mẹ, E to oho etọn lẹ dọ:

²² Na é na dẹn do, mì mayọndẽnọ, bọ mì na do yiwanna mayọndẽ? Bọ mẹylẹtọ na do tindo homẹhùn to ovlẹ yetọn mẹ, Bọ oklenọ na do gbẹwanna ọyọnẹn?

²³ Mì diọ to wọhẹ ṣie mẹ, Dayi e go, yẹn na kọ̀n gbigbọ ṣie hlan mi mẹ, Yẹn na yí ohó ṣie hia hlan mì.

²⁴ Na yẹn ylọ, bọ mì gbó wutu; Yẹn dlẹn alọ ṣie, bọ mẹde ma hopón wutu;

²⁵ Ṣigba mì gbẹkọ ohónamẹ ṣie lẹpo go, Bo ma sọ jlo wọhẹ ṣie.

²⁶ Yẹn ga na kò toojlẹ nukunbibia mítọn tọn mẹ; Yẹn na vlẹ whenuena sisọsisọ mítọn wá.

²⁷ Whenuena sisọsisọ mítọn wá di gbigbà, Bọ nukunbibia mítọn sọ wá di jẹhọn vivatọ; Whenuena tukla po awufiẹ po wá mì ji;

²⁸ Whenẹnu wẹ yé na ylọ mi, ṣigba yen ma na siọ, Yé na whesọ do din mi, ṣigba yéma na mọ mì.

²⁹ Na yé gbẹwanna oyonen, Bo ma sọ dè osi OKLUNỌ tọn gba.

³⁰ Yé ma jlo ohónamẹ ṣie: Yé vlẹ wọhẹ ṣie lẹpo.

³¹ Enẹwutu yé na nọ dù sinsén ali yetọn titi tọn, Bo yí ohónamẹ yetọn titi lẹ do gó yé.

³² Na godogọyì mayọndẽnọ lẹ tọn na hù yé súdo, Nuyónna oklenọ lẹ tọn na gbà yé súdo.

³³ Ṣigba mẹhe tuntóai hlan mi na tin mahanú, Bo nasọ nọ́ blẹo matin obudi oylan tọn.