HEBLU LẸ 2 - BIBLU WIWE LỌ 1923

¹ ENẸWUTU é je mí ni nọ do ayi onú he mí ko sè lẹ go talala, na mí sọ dike yé dùdú kọnyinai to whedepopenu blo.

² Na eyín ohó he yè gbọn angẹli lẹ mẹ dọ nọte, bọ osénmejẹ podọ tólivivẹ dopodopo sọ to ale ahosu he jẹ tọn yí;

³ nawẹ mìwlẹ na hòngán do, eyín mí gbẹkọ whlẹngan daho di ehe hunkọ go, he yè to dido sọn whéwhéwhenu gbọn Oklunọ me, bọ yè sọ to didọ hlan mí sọn yé he ko sè to onù etọn mẹ lẹ de;

⁴ Jiwheyẹwhe ga sọ to ohia, azón dabla, huhlon alọpalọpa le, po nunina Gbigbọ Wiwe tọn po jí do to kunnudena yé, kẹdedi ojlo etọn.

⁵ Na angẹli lẹ wẹ é ma yí aihọn he ja do oglọ na, ehe tọn mìwlẹ to didọ

⁶ Ṣigba mẹde do to ofi de, dọ, Etẹwẹ gbẹtọ, bọ hiẹ do to ayi do go? Kavi ovi gbẹtọ tọn, bọ hiẹ do to didla ẹ pọ́n?

⁷ Hiẹ hẹn ẹn whè pẹvìde hù angeli lẹ; Hiẹ sọ yí gigo po yẹyi po do ṣinyọn ojẹgbakun nẹ̃, Bo sọ yí i do dogán do azón alọ towe tọn ji.

⁸ Hiẹ ko yí onu lepo do afọ etọn glo. Na ehe é yí onú lẹpo do afọ ètọn glọ, é ma pò onú de he yè ma yí do oglọ etọn. Ṣigba dinvie mìwlẹ ma ko mo yè yí onú lẹpo do oglọ etọn gba.

⁹ Ṣigba mìwlẹ mọ Jesu, mẹhe yè hẹn whè pẹvide hú angẹli lẹ, na yajiji okú tọn wutu yè yí gigo po yẹyí po do ṣinyọn ojẹgbakun nẹ; na gbọn ojọmiọn Jiwheyẹwhe tọn dali ewọ nidó dó okú pọn na gbẹtọ le dopodopo.

¹⁰ Na é jẹ hẹ ẹ, mehe onú lẹpo tin na, podọ mẹhe dali onú lẹpo gbọn, to hinhẹn ovi susu wá gigo mẹ, nado hẹn awhangán whlẹngan yetọn tọn sọgbè gbọn yajiji dali.

¹¹ Na mẹhe to omẹ hẹn zùn wiwe, po mẹhe yè to hinhen zùn wiwe po, omẹ dopo ton wẹ ye omẹ pó: na enẹwutu wẹ é ma do kuwinyan nado ylọ yé dọ mẹmẹsunnu,

¹² dọmọ, Yẹn na dọhó oyín towe tọn hlan mẹmẹsunnu ṣie lẹ, To ṣẹnṣẹn agùn tọn wẹ yẹn na jihan pipa tọn hlan we.

¹³ Humọ, Yẹn na yí tudido ṣie do e go. Humọ ga, Do ayi e go, yẹn po ovi he Jiwheyẹwhe ko yí na mi lẹ po.

¹⁴ Be le eyín ovi lẹ yín máhẹtọ to agbasalan po ohùn po mẹ, ewlọsu basi máhẹtọ to e mẹ ga; dọ gbon alo okú tọn mẹ é nido hù mẹhe Tindọ huhlọn okú ton súdo, enẹ wẹ, lẹgba;

¹⁵ bo whlen yé he gbọn osi okú tọn mẹ tin to ogbẹwhenu yetọn lẹpo mẹ jẹ mẹglọnọ mẹ

¹⁶ Na nugbo wẹ é ma yí agbasa angẹli le tọn do ogo; ṣigba é yí okún Ablaham tọn tọn dò ogo.

¹⁷ Enewutu to onú lepo mẹ, é jẹ yè ni basi i di mẹmẹsunnu etọn lẹ, na é nido yín yewhenọ daho, lẹblanunọ, nugbonọ to onú he yín Jiwheyẹwhe tọn mẹ, nado basi ovẹ̀se na ylando gbẹtọ lẹ tọn.

¹⁸ Na le ewlọsu ko jiya, bọ yè whle e pọn, é sọgan gọalọna yé he yè to whiwhlepón le.