HEBLU LẸ 12 - BIBLU WIWE LỌ 1923

¹ BE enẹwutu sọle yè yí aslọ kunnude tọn susu lẹ́do mí pé ga di ehe, mì gbọ mí ni dè ọnú pinpẹ̀n lepo do apadopo, po ylando he ma sinyẹnawú nado tẹ́ do omẹ go po, bo sọ gbọ mí ni nọ yí homefa do hòn alewezun he yè zé do mí nukọn,

² bo nọ pọ́n hlan Jesu he yín dòdó po opòdo yise mìton tọn po, mehe na ayajẹ he ye zé do nukọn eton wutu é doakọ́nna satin lọ, ma hò winyan lọ pòn, bo sọ sinai to adusilọ ofìn Jiwheyẹwhe tọn ji.

³ Bo sọ lẹn ewọ he doakónna hódọdomẹgo ylandonọ lẹ tọn he hunkọ tọn pọn, na onú nikã dikọna mì, na agbọ́ nikã pé ajiha mìtọn.

⁴ Miwlẹ ma sà ko pànnukọn avùn jẹ ohùn to avùnhiho mìtọn mẹ hẹ ylando.

⁵ Mì ko sọ wòn homẹjladohó he é to didọ hlan mì di hlan ovi lẹ, dọ, Ovi ṣie, hiẹ vlẹ mẹplọnlọ Oklunọ tọn blo, Agbọ́ sọ pé we whenuena yè gbọn alọ etọn mẹ do to wiwọhẹ we blo:

⁶ Na ewọ he Oklunọ yiwanna wẹ é nọ wóhẹ, Bo sọ nọ hò ovi dopodopo he é yi.

⁷ Eyín mìwlẹ doakónna mẹplọnlọ, Jiwheyẹwhe wà hẹ mì dile yè nọ wà hẹ ovi lẹ do; na ovi tẹ wẹ tin bọ otọ́ etọn ma nọ do mẹplọnlọ e go?

⁸ Ṣigba eyín mìwlẹ tin matin mẹplọnlọ, ehe mẹ omẹ popo yín mimàtọ te, be ayọvi wẹ mì, mì ma yín ovi gba.

⁹ Humọ mìwlẹ tindo otọ́ gbọn agbasalan mítọn dali he nọ deana mí, mí nọ gbògbéna yé: be mí ma na kúkú gbọ bo litai hlan Otọbigbọ lẹ tọn, bo nò ogbè?

¹⁰ Na azán pẹvide nugbo wẹ yé do nọ do mẹplọnlọ mí go dile é sọawúhia dagbe hlan yé do; ṣigba ewọ na ale mítọn, na mí nido yín máhẹtọ owalọ wiwe etọn tọn.

¹¹ Ṣigba mẹplọnlọ depope, whenuena é tin to ote, ma sọawúhia nado yín ayajẹnu gba, adavo homẹgblenu: ṣigba to godomẹ, é jo sinsẹ́n jijọho gigọ dódó tọn hlan yé he yè zán gbọn e dali lẹ.

¹² Enẹwutu mì zé alọ he kuyẹ̀ daga, po kligonu he ma sinyẹn lẹ po:

¹³ mí deali jijlọ na afọ mìtọn, na ehe gbán nikã fẹ́ sọn aliho; ṣigba yè ni kúkú gbọ bo hẹn azọ̀n etọn gbọ.

¹⁴ Mì nọ yí jijọho do zọ̀nhẹ gbẹtọ lẹpo, po owalọ wiwe po, eyín enẹ ma tin, mẹde ma sọgan mọ Oklunọ:

¹⁵ to vivẹnu mẹ talala dọ mẹdepope pòali ojomiọn Jiwheyewhe tọn tọn blo; na adò vivẹ tọn de nikã tónkun jẹgbonu bo dotukla mì, mẹsusu bo nasọ gbọn e dali gble;

¹⁶ na gàlọtọ kavi omẹ gbigbletọ di Esau tin blo, ewọ he sa jijihuhlọn etọn lọsu na núdùdù nudo dopo.

¹⁷ Na mì yọnẹn dọ to godomẹ, whenuena ewọ jlo nado dugú mọ dona lọ tọn, yè gbẹ́ ẹ dlanai na é ma sọ otẹnmẹ nado lẹnvọjọ), eyín é tlẹ yí dasìn do whèsọ din i talala.

¹⁸ Na mì ma wá osọ́ he yè sọgan do alọ e go ji gba, ehe to miyọn ji, kavi wá oyú, zinvlu, po jẹhọn po kòn,

¹⁹ ogbè opẹ̀n tọn, po ogbè ohó tọn po; ogbè he yé he sè lẹ vẹvẹ dọ, yè sọ dọ ohó lọ hlan yé ba blo:

²⁰ (na agbasa yetọn ma sọgan hẹn onú he yè degbè etọn, E sọ sọmọ, bọ eyín kanlin de liagba osọ́ lọ, zannu wẹ yè na yín do ẹ hù, kavi yè na sọwhán ẹ hù: 3

²¹ onú pinpọ́n lọ dobu sọmọ, bọ Moṣe dọmọ, Yẹn savo talala bọ sọ sisọ:)

²² ṣigba osọ́ Ziọni tọn ji wẹ mì wá jẹ, podọ, otòdaho Jiwheyẹwhe ogbènọ lọ tọn mẹ, Jelusalẹm olọn tọn, podọ ogbé angeli le tọn he madohìhia mẹ;

²³ wá ogbé daho, agùn plọnji lẹ tọn mẹ, he yè ko wlanwe etọn to olọn mẹ, to Jiwheyẹwhe Whẹdatọ gbẹtọ lẹpo tọn de, podọ to gbigbọ gbẹtọ dódónọ lẹ tọn de, he yè ko basi sọgbè,

²⁴ podọ jẹ Jesu avùndatọ alènu yọ́yọ́ tọn de, podọ jẹ ohùn yìnyìn do omẹ go tọn, ehe to onú dagbe dọ hú Abẹli tọn.

²⁵ Mì payi e go dọ mì sọ gbẹ́ ewọ he to hódọ blo. Na eyín yé he gbẹ́ ewọ he to hódọ to aihọn mẹ ma gán, nẹmunẹmu wẹ mìwlẹ ma na sọgan hòngan, eyín míwlẹ lé sọn ewọ he to hódọ sọn olon mẹ de:

²⁶ ogbè mẹhetọn whàn aigba to whenẹnu, ṣigba to dinvie é ko dopagbe dọmọ, Whladopo dogọ́ yẹn ma to aigba kẹde na whàn ba, ṣigba olọn ga.

²⁷ Ohó he lo, Whladopo dogó, bibẹsè onú he yè ko whàn lẹ tọn dohia, di onú he yè da tọn lẹ mẹ, dọ onú he yè ma whàn nẹlẹ nido nọ mọ.

²⁸ Enẹwutu le mìwlẹ to ahọlu yigba he yè ma sọgan whàn yí, mì gbọ mí ni hẹn ojọmiọn go, ehe mẹ mí sọgan nọ basi sinsẹ̀n homẹhùnnọ hlan Jiwheyẹwhe te po yẹyi po, po osi po.

²⁹ Na miyọn dusúdo de wẹ Jiwheyẹwhe mítọn.