HEBLU LẸ 11 - BIBLU WIWE LỌ 1923

¹ DINVIE yise wẹ dòdó onú yè to tódo tọn, okunnu onú he mí ma mọ tọn.

² Na é mẹ wẹ mẹho lẹ mọ kunnude dagbe yí te.

³ Gbọn yise dali mìwlẹ yọnẹn dọ gbọn ohó jiwhey ẹwhe tọn dali wẹ yè tò owhenu lẹ do hajihaji te, sọmọ bọ yè ma yí onú he yè ma mọ do da onú he yè mọ le gba.

⁴ Gbọn yise dali Abẹli sánvọ́ dagbedagbe de hlan Jiwheyẹwhe hú Kaini: gbọn ehe dali é mọ kunnude yí dọ dódónọ wẹ ewọ, Jiwheyẹwhe sọ dekunnuna nunina etọn: gbọn ehe dali, le é kú, dinvie é to hódọ.

⁵ Gbọn yise dali yè diọtẹnna Enọku, bọ é ma nado mọ okú; yè ma sọ mọ ẹn, na Jiwheyẹwhe ko diọtẹn nẹ̃ wutu; na jẹnukọnna tẹndidiọ etọn é tindo kunnude he dọ, e hẹn homẹ Jiwheyẹwhe tọn hùn.

⁶ Ṣigba matin yise, é glo nado hẹn homẹ etọn hùn: na ewọ he ja Jiwheyẹwhe de, ma sọgan nọma yise dọ é tin, podọ ewọ wẹ ahọsutọ yé he whèsọ do din i lẹ tọn

⁷ Gbọn yise dali Noa, whenuena yè dohia onú hè yè ma kó mọ lẹ tọn nẹ sọn Jiwheyẹwhe; de, le obu di i, é wleawu ohún (aki) tọn dai na whlẹngan owhẹ́ etọn tọn: gbọn ehe tọn dali é gblewhẹdo aihọn, bo sọ lẹzun whédutọ dódó he tin gbọn yisè dali tọn.

⁸ Gbọn yise dali Ablaham, whenuena yè ylọ ẹ nado tón yì ofi de he é na yí to godomẹ na ogú, é yise: bo sọ tọ́n yì, é ma yọ́n fie é jei.

⁹ Gbọn yise dali é wáwási tọ aigba opagbe tọn lọ ji, di ojonọ to otò me, bo nọnọ̀ gohò mẹ po Isaki po, po Jakobu po, yé gúdutọ opagbe dopolọ tọn hẹ ẹ:

¹⁰ na é to nukundo otò daho de he tindo dòdó, ewọ he dó e bo sọ basi i wẹ Jiwheyẹwhe.

¹¹ Gbọn yise dali Sala lọsu ga tindo huhlọn nado mọhò, bo sọ jivi whenuena é ko pòyọnho vọ̀, na é hia ewọ he dopagbe na nugbonọ.

¹² Enẹwutu wẹ mẹsusu do tọ́nkun sọn omẹ dopo go, yèdọ to ewọ he di oṣiọ, mẹsusu gege di sunwhlẹvu he to aga lẹ, bo sọ di otòkẹn he tin to ohùtó madohihia.

¹³ Yé omẹ helẹ pó wẹ kú to yise mẹ, bo ma mọ opagbe lọ yí, ṣigba yé ko mọ ẹn to aganu boboe, bo yọnẹn to yéde mẹ, bọ sọ jlẹgbèna yé, bo sọ yígbe dọ jonọ, towiwehisizọnlinnọ wẹ yé to aihọn mẹ

¹⁴ Na yé he nọ dọ onú mọhunkọ tọn lẹ, yé dọ ẹ họn un dọ, yé to otóyigba de din pé.

¹⁵ Nugbo wẹ, eyín yé ko flin otò he mẹ yé tòn sọn lọ, yé na ko din ali nado lẹgọ̀ yì.

¹⁶ Ṣigba dinvie yé to otò he yọnwhanpẹ humọ de din, enẹ wẹ, olọn tọn de: enẹwutu Jiwheyẹwhe ma kuwinyan dọ yè ni ylọ ẹ dọ jiwheyẹwhe yetọn gba: na é ko jla otò de do dai na yé wutu.

¹⁷ Gbọn yise dali Ablaham, whenuena yè whle ẹ pọn, é yi Isaki do sánvọ́: ewọ he sọ yí opagbe lẹ yí Ovi dètọ́n etọn dopo akàn lọ do sánvọ̀,

¹⁸ na ewọ he tọn mẹ yè dọ, dọmọ, To Isaki mẹ wẹ yè na nọ ylọ okún towe te:

¹⁹ ehe é hia dọ, Jiwheyẹwhe tlẹ sọgan fọ́n ẹn dote sọn osiọ mẹ; sọn ehe mẹ é yí i to ọpajlẹ mẹ.

²⁰ Gbọn yise dali Isaki dona Jakobu po Esau po gbọn onú he ja lẹ tọn dali.

²¹ Gbọn yise dali Jakobu, whenuena é to azọ̀nzàn ji, é dona ovi Josẹfu tọn awe lẹ, é litai bo zẹ̀nmenú alọnupọ etọn ji.

²² Gbọn yise dali Josefu, whenuena é to na kú, é flin tintọn ovi Islaeli tọn lẹ tọn; bo sọ degbèna yé gbọn ohú etọn dali.

²³ Gbọn yise dali Moṣe, whenuena yè ji i, yè sọ ẹ whlá họ̀ osùn atọ̀n to mẹjitọ etọn le de, na yé mọ é yín ovi whanpenọ wutu; yéma sọ dibuna osén aholu tọn.

²⁴ Gbọn yise dali Moṣe, whenuena é whẹ́n, é kọ́ nado yín yiylọ ovi viyọnnu Falo tọn lọ tọn;

²⁵ é tlẹ jlo na jiya nukunbibia tọn hẹ omẹ Jiwheyẹwhe tọn lẹ, hú nado dugbè ylando ton to ojlẹ pevide mẹ;

²⁶ é hia ovlẹ Khsti tọn na adọkun daho hú adọkunnu Egipti tọn lẹ: na é pòn hlan ahọsu ale lọ tọn.

²⁷ Gbọn yise dali, é gbé Egipti dai, bo ma sọ dibuna homẹgble ahọlu tọn: é doakọ́n nẹ̃ taidi e mọ ewo he yín mamọ lọ.

²⁸ Gbọn yise dali é sánvò juwayì, po ohùn yìn do onú go ton po, na ewọ he to ovi plọnji lẹ hù nikã do alọ yé go.

²⁹ Gbọn yise dali yé gbọn Ohù Vẹ̃ mẹ yì taidi to aigba húhú ji; ehe Egiptitọ lẹ whlepón nado basi, yé siọ.

³⁰ Gbọn yise dali dòkọ Jẹliko tọn họ súai ehegodo yé lédo ye azán ṣinawe.

³¹ Gbọn yise dali Lekabu yọnnu gàlọto ma dọ̀n po tólivẹtọ lẹ po, whenuena é kẹalọyi amẹ́ lẹ po jìjọhọ po.

³² Etẹ wẹ yẹn nasọ to vivọ dọ? na whenu na fẹ́ do mi nado dọ Gidiọni tọn, Balaki tọn, Samsọni tọn, Jẹfta tọn, Davidi tọn, Samuẹli tọn, po yẹwhegán le po tọn:

³³ yé he gbawhàn aholu yigba tọn gbọn yise dali, he wàzọ́n dódó tọn, he yí opagbe lẹ lọ, bo sọ bla onù kinnikinni lẹ tọn,

³⁴ he sizò huhlon miyọn tọn, he họ̀ngán sọn onù ohi tọn mẹ, to madogán mẹ ye hẹn yé zùn huhlọnnọ, yé lẹzun adantọ to avùn me, yé yàn awhan jonọ le tọn yì.

³⁵ Yọnnusi lẹ to osiọ yẹtọn lẹ mọyí gbọn fònsọnku de dali: yè to yasahẹ mẹdelẹ, yé gbẹ́ whlẹngan; na ye nido mọ fọ́nsọnku he yọ́nwhanpẹ hú yí:

³⁶ yé mẹdelẹ tindo whlepọ́n vlẹko oka tọn, hihò tọn, nugbo, bibla po ogàndomẹ tọn po ga.

³⁷ Yè to zannu dlan do yé, yè yí ayinyòn de do yé sán doawe, yè to yé whlepón, yè yí ohi do to yé hù: yé to dindanpe to ayú lẹngbọ po gbọgbọe po tọn mẹ; ye zùn agbátọno, nukunbibiano, awufiẹsanọ.

³⁸ (Mehe aihọn ma jẹhẹ:) yé to dindanpé to zùngbo mẹ, to osé daho lẹ ji, to odo mẹ, podọ to aigba slo glọ.

³⁹ Ehelẹ pó he mọ kunnude dagbe yí gbọn yise dali, ma mọ opagbe lọ yí:

⁴⁰ Jiwheyẹwhe ko sọ wleawu onú he yọ́nwhanpẹ humọ tọn dai na mí, dọ to mìwlẹ godo yè ma sọgan hẹn yé sọgbè gba.