FILEMONI 1 - BIBLU WIWE LỌ 1923

¹ PAULU, ogàntọ Jesu Klisti tọn de, po Timoti mẹmẹsunnu mítọn po hlan Filemoni mẹyiwanna mítọn vivẹ, azónwàtọgbé,

² pódọ hlán mẹyiwanna mítọn Affia, podọ hlan Alkippu awhànfùntọgbẹ́ mítọn, podọ hlan agùn he tin to Owhé towe gbè:

³ Ojọmiọn, po jijọho po hlan mì, sọn Jiwheyẹwhe Otọ́ mítọn, podọ Jesu Klisti Oklunọ mítọn de.

⁴ Yẹn dopẹna Jiwheyẹwhe ṣie, bo do to finflin we whepoponu to ódè Sie lẹ mẹ,

⁵ le yẹn to owanyi po yise towe po sè, he hiẹ do hlan Jesu Oklunọ de, podọ hlan mẹwiwe lẹpo de;

⁶ na omáhẹ yise towe tọn nido zùn nuyíwà to oyọnẹn onú dagbe lẹpo tọn mẹ he tin to ohò towe mẹ hlan Klisti Jesu de.

⁷ Na mìwlẹ tindo ayajẹ daho po homẹmimiọn po to owanyi towe mẹ, na yè hen homẹ mẹwiwe lẹ tọn hùn gbọn dali towe, mẹmẹsunnu.

⁸ Enẹwutu, le yẹn do tlẹ ko sinyẹnnukun susu to Klisti mẹ nado degbè onú he jẹ tọn na we,

⁹ ṣigba na owanyi tọn wutu, yẹn kúkú gbọ bo vẹ́ we, yẹn he yín omẹ nẹ nkọ di Paulu yónhonọ, podọ to dinvie ogàntọ Jesu Klisti tọnde ga.

¹⁰ Yẹn vẹ́ we na ovi ṣie Onesimu tọn wutu, mẹhe yẹn ji to ogàn ṣie lẹ mẹ:

¹¹ mẹhe kọ yín madoalenọ hlan we to ojlẹ he juwayì mẹ, ṣigba dinvie é yín alenọ hlan we, podọ hlan mi:

¹² mẹhe yẹn sọ gò dohlan; enẹwutu na hiẹ ni yí i, enẹ wẹ, ovi ohò ṣie mẹ tọn:

¹³ mẹ-he yẹn do ko glọn do dẽ, dọ to otẹn towe mẹ ewọ nido ko wàdevizọ́n hlan mi to ogan wẹndagbe tọn lẹ mẹ:

¹⁴ ṣigba yen ma ylo nado wa núde to ayiha towe mayọnẹn godo; ha dagbewà towe ma na do yin numananọmawà tọn, adavo ojlo tọn.

¹⁵ Eya ehewutu wẹ é do tón sọn de we yì na whenu vude, na hiẹ nido yí i gò kakadoi;

¹⁶ dinvie é ma sọ yín di afànumẹ de ba gba, ṣigba húgan afànumẹ de, yèdọ mẹmẹsunnu mẹyiwanna, humọ hlan yẹn, ṣigba húgan mọ susu hlan hiẹ, to agbasa mẹ, podọ to Oklunọ mẹ.

¹⁷ Enẹwutu eyín hiẹ lẹn mi do oha mẹ, bo yí i di yẹnlọsu.

¹⁸ Eyín é ko wàylan do we, kavi duahọ núde tọn do we, lẹn enẹ dokò na mi;

¹⁹ yẹn Paulu ko yí alọ ṣie titi do wlan ẹn, yẹn na sú i: mọ yen ma dọ hlan we le hiẹ duahọ do mi do tọn gba, yèdọ hielọsu titi tọn dovo.

²⁰ Mọwẹ, mẹmẹsunnu, gbọ yẹn ni tindo ayajẹ to dali towe to Oklunọ me; miọnhomẹna mi to Oklunọ mẹ.

²¹ Le yẹn tindo tudodomẹgo do to tónusisè towe mẹ wẹ yẹn do wlanwe hlan we, bo sọ yọnẹn dọ hiẹ na wa hú ehe yẹn dọ ga.

²² Ṣigba gọna popo, wleawu nọtẹn de tọn do ote na mi; na yẹn dotódido dọ gbọn odè mìtọn lẹ mẹ, yè na yí mi na mì.

²³ Epafla dọnúdo we, ogàntọ ogbé ṣie to Klisti Jesu mẹ;

²⁴ Malku, Alistalku, Dema, Luku, azónwàtọgbé ṣie lẹ.

²⁵ Ojọmiọn Jesu Klisti Oklunọ mí tọn tọn ni tin to gbigbọ mìtọn de Niṣẹ.