ẸZLA 9 - BIBLU WIWE LỌ 1923

¹ DINVIE whenuena yè ko wà onú helẹ pó wẹ ahọvi lẹ dọ̀n sẹpọ́ dẽ, dọmọ, Omẹ Islaeli tọn lẹ, po yẹwhenọ lẹ po po Levinu lẹ po, ma ko klán yéde dovò sọn omẹ aigba lọ lẹ tọn mẹ gba, to wiwà mẹ kẹdẹdi osùnú yetọn lẹ, yèdọ sọn Kananinu lẹ lọ, Hitinu lẹ lọ, Pẹlizinu lọ lọ, Jẹbusinu lẹ lọ, Ammọninu lẹ lọ, Moabinu lẹ lọ, Egiptinu lẹ lọ, po Amọlinu lẹ lọ po mẹ gba.

² Na yé ko yí sọn viyọnnu yetọn lẹ mẹ na yéde podọ na visunnu yetọn lẹ; mọ bọ okun wiwe lọ ko yí omẹ aigba lẹ lọ tọn lẹ do flusọ yéde: nugbo, alọ ahọvi lẹ lọ tọn po whépọ́ntọ lẹ po ko yín gángánsú to ylando he mẹ.

³ Whenuena yẹn sọ sè onú he, yẹn tlẹn awugbó ṣie po avọ̀kọdo ṣie po, bo sọ sùn odà ota ṣie tọn sẹ̀ po ogbi ṣie tọn po, bo sọ sinai awújinọ.

⁴ Whenẹnu wẹ yè hẹn pli do dẽ omẹ dopodopo he sisọ na ohọ́ Jiwheyẹwhe Islaeli tọn lọ tọn lẹ, na ylando yé mẹglọnọ lẹ tọn tọn lọ wutu; yẹn sinai awújinọ kakajẹ avọ́ whèjai tọn jlẹmẹ.

⁵ Podọ to avọ́ whèjai tọn lọ jlẹmẹ yẹn fọ́n tite sọn awúbla ṣie mẹ, yèdọ po awugbó ṣie po po avọ́kọdo ṣie po tintlẹn; yẹn sọ hó do oklò ṣie lẹ ji, bo sọ dlẹn alọ ṣie lẹ jẹgbonu hlan OKLUNỌ Jiwheyẹwhe ṣie;

⁶ Yẹn sọ dọmọ. Jiwheyẹwhe ṣie È, yè hẹn winyanhù mi po wùnpẹn po nado zé nukunmẹ ṣie daga hlan de we, Jiwheyẹwhe ṣie: na yè hẹn oylanwà mítọn lẹ sudeji do ota mítọn, yè sọ hẹn owhèylan whẹ́n daga jẹ olọn lẹ mẹ.

⁷ Sọn azán otọ́ mítọn lẹ tọn mẹ gbọ̀n wẹ mí ko yín whẹ̀gbledonọ susu jẹ azán he gbè; podọ na oylanwà mítọn lẹ wẹ yè ko do jó mìwlẹ, ahọlu mítọn lẹ, po yẹwhenọ mítọn lẹ po do alọ aholu aigba lẹ tọn lẹ ton mẹ, jẹ ohi, jọ mẹglọnọ, podọ jẹ hẹngble, podọ jẹ oflu nukunmẹ tọn, dile é yín to azán he gbè.

⁸ Podọ dinvie na osã pẹvi de wẹ yè ko do do nukundagbe hia sọn OKLUNỌ Jiwheyẹwhe mítọn de, nado pò pipòtọ de dai na mí nado họ̀ngán, podọ nado na osé de mí to otẹn wiwe etọn mẹ, na Jiwheyẹwhe mítọn nido nahinhón nukun mítọn lẹ, bo sọ na wùnhinhọ́n pẹvi de mí to kanlinmọgbénu mítọn mẹ.

⁹ Na mẹmẹglọ wẹ mí lẹ; gãnṣo Jiwheyẹwhe mítọn ma ko gbẹ́ mí dai to kanlinmọgbénu mítọn mẹ gba, ṣigba bo ko dotena lẹblanu jẹ mí de to nukun ahọlu Pẹlsia tọn lẹ tọn mẹ, nado na wùnhinhọ́n de mìwlẹ nado zé ohọ̀ Jiwheyẹwhe mítọn tọn lọ daga, podọ nado vọ́ gbigbà etọn lẹ jlado, podọ nado na adó de mí to Juda mẹ podọ to Jelusalẹm mẹ.

¹⁰ Podọ dinvie, Jiwheyẹwhe mítọn È, etẹ́ wẹ mí na dọ to ehe godo? na mí ko gbẹ́ gbèdide towe lẹ dai,

¹¹ he hiẹ ko degbèna gbọn mẹmẹsi towe yẹwhegán lẹ lọ dali, dọmọ, Aigba lọ, he mì yì jẹ nado tindo e, yín aigba mawé de gbọn omawé omẹ aigba lẹ lọ tọn lẹ mẹ, gbọn osùnú yetọn lẹ mẹ, he ko yí odiho yetọn do gó ẹ sọn opodo ode jẹ awetọ.

¹² Enẹwutu dinvie, mì jó viyọnnu mítọn lẹ hlan visunnu yetọn lẹ blo, mọ mì sọ yí viyọnnu yetọn lẹ hlan visunnu mítọn lẹ blo, mì sọ din jijọho yetọn blo kavi nuyọnnamẹ yetọn gbède blo: na mì nido yín huhlọnnọ, bo sọ dù dagbe aigba lọ tọn, bo sọ jódai na ogú de hlan ovi mítọn lẹ doidoi.

¹³ Podọ to enẹ lẹpo godo yè hẹn enẹ wá mí ji na owàlọ ylanylan mítọn lẹ, podọ na whèyìnylan daho mítọn, mimọ hiẹ Jiwheyẹwhe mítọn ko doyana mí whè hú le oylanwà mítọn lẹ biọ do, bo ko sọ na pipòtọ mọnkọ de mí.

¹⁴ Míwlẹ na ka sọ vọ́ gbèdide towe lẹ gbà wẹ, bo kọndopọ tó asijakó mẹ hẹ gbẹtọ he nọ wà osùnú helẹ̃? hiẹ ma ka na yín adinọ to mí de kaka hiẹ ko do súkundona mí, mọ bọ pipòtọ de ma na do tin finẹ, kavi depope nado hòngán?

¹⁵ OKLUNỌ E. Jiwheyẹwhe Islaeli tọn, dódónọ wẹ hiẹ; na yè pòdaina mí pipòtọ de he yè hẹn hóngán, dile é yín to azán he gbè: dayi e go, mí tin nukọn towe to whẹ̀yinylan mítọn mẹ; na mẹde ma sọgan ṣite nukọn towe gba na ehe wutu.