ẸZLA 8 - BIBLU WIWE LỌ 1923

¹ DINVIE ehelẹ̃ wẹ nukọntọ owhé otọ́ yetọn lẹ tọn lẹ tọn, ehe sọ wẹ whéndo yé he heji hẹ mi yì lẹ tọn sọn Babilọni, to ahọludu Altakẹlikesi ahọlu lọ tọn mẹ.

² Sọn visunnu Finehasi tọn lẹ mẹ, Gẹlṣọmi: sọn visunnu Itamli tọn lẹ mẹ, Daniẹli: sọn visunnu Davidi tọn lẹ mẹ, Hatusi.

³ Sọn visunnu Ṣekania tọn lẹ mẹ; sọn visunnu Zekalia tọn lẹ mẹ: to ewọ de wẹ yè hia gbọn whédo dali kantọ̀ngbàn sọn asú lẹ mẹ

⁴ Sọn visunnu Pahati-moabi lẹ mẹ, Eliẹhoenai: visunnu Zelahia tọn: podọ to ewọ de asú fọde.

⁵ Sọn visunnu Sẹkania tọn lẹ mẹ, visunnu Jahazlẹh tọn; podọ to ewọ de asú fọdekanweko.

⁶ Sọn visunnu Adini tọn lẹ mẹ, Ebẹdi visunnu Jonatani tọn; podọ to e de asú kandeao.

⁷ Sọn visunnu Elami tọn lẹ mẹ, Jesaia visunnu Atalia tọn lọ; podọ to e de asú kandegbàn.

⁸ Sọn visunnu Sẹfatia tọn lẹ mẹ, Zebadia visunnu Mikaẹli tọn; podọ to e de asú kanwe.

⁹ Sọn visunnu Joabi tọn lẹ mẹ, Obadia visunnu Jehlẹli tọn lọ; podọ to e de, asu fọde po fọtọ̀nnukunatọ̀n po.

¹⁰ Podọ sọn visunnu Ṣelomiti tọn lẹ mẹ, visunnu Josifia tọn; podọ to e de asú kẹnnẹ.

¹¹ Sọn visunnu Bebai tọn lẹ mẹ, Zekalia, visunnu Bebai tọn; podọ to e de asú kòatọ́nnukunatọ̀n.

¹² Podọ sọn visunnu Azgadi tọn lẹ mẹ, Johanani visunnu Hakatani tọn; podọ to e de asú kanwegbàn.

¹³ Sọn visunnu Adonikami tọn lẹ mẹ, he yín godotọn; ehelẹ sọ wẹ oyín yetọn lẹ, Elifẹlẹti, Jeuẹli, po Ṣemaia po, podọ to yé de asú kandeko.

¹⁴ Podọ sọn visunnu Bigvai tọn lẹ mẹ, Utai po Zabudi po; podọ to yé de asú kandegbàn.

¹⁵ Yẹn sọ bẹ́ yé plidopọ jẹ otọ̀ lọ kọ̀n he to sisa jẹ Ahava; finẹ wẹ mí dosla do azán atọ̀n: Yẹn sọ pọ́n gbẹtọ lẹ, po yẹwhenọ lẹ po, bo ma sọ mọ mẹde sọn visunnu Levi tọn lẹ mẹ.

¹⁶ Whenẹnu wẹ yẹn dowẹnhlan na Eliezeli, na Aliẹli, na Ṣemaia, podọ na Elnatani, podọ na Jalibi, podọ na Elnatani, podọ na Natani, podọ na Zekalia, podọ na Mẹṣulami, sunnusi ogán lẹ; na Joialibi ga, podọ na Elnatani, he yín mẹplọntọ lẹ.

¹⁷ Yẹn sọ do yé hlan jẹ Iddo ogán lọ de to otẹn Kasifia mẹ; yẹn sọ dọ na yé núhe yé do dọ hlan Iddo, po mẹmẹsunnu etọn Nẹtinimi lẹ lọ po, to otẹn Kasifia lọ mẹ, na yé na do hẹn devizọ́nwàtọ lẹ wá jẹ mí de na ohọ̀ Jiwheyẹwhe mítọn tọn.

¹⁸ Podọ kẹdẹdi alọ dagbe Jiwheyẹwhe mítọn tọn to mi ji yé hẹn dawe hóyọnẹn tọn de wá mí de, sọn visunnu Mahli tọn lẹ mẹ, visunnu Levi tọn, visunnu Islaeli tọn; po Ṣelebia po, gọ́na visunnu etọn lẹ po mẹmẹsunnu etọn lẹ po, fọtọ̀nnukunatọ̀n;

¹⁹ po Haṣabia po, podọ to e de Jesaia sọn visunnu Mẹlali tọn lẹ mẹ, mẹmẹsunnu etọn lẹ po visunnu yetọn lẹ po, òko:

²⁰ podọ sọn Netinimi lẹ mẹ, mẹhe Davidi po ahọvi etọn lẹ po ko jó na sinsẹ̀n Levinu lẹ tọn, Nẹtinimi fọdeko: popo yé tọn wẹ yè ylọ gbọn oyín dali.

²¹ Whenẹnu wẹ yẹn demìsẽluna núbibla de to finẹ, to otò Ahava kòn, na mí nido whiwhẹ mìde to Jiwheyẹwhe mítọn nukọn, nado nọ din alọ jlọjlọ de sọn ewọ mẹ, na mí, podọ na omẹ flinflin mítọn lẹ, podọ na agbàn mítọn lẹpo.

²² Na yè hẹn winyanhu mi nado biọ ogbẹ́ awhànvipẹ lẹ tọn de po osọ́nọ lẹ po sọn ahọlu lọ si nado gọalọna mí to kẹ̀ntọ ji to aliho: na mí ko dọhó hlan ahọlu lọ wutu, dọmọ, alọ Jiwheyẹwhe mítọn tọn tin to yé he to dindin in lẹpo ji na dagbe; ṣigba huhlọn etọn po homẹgble etọn po tin to yé he gbẹ́ ẹ dai lẹpo ji,

²³ Mowẹ mí blanú bo sọ vẹ́ Jiwheyẹwhe mítọn na ehe: é sọ yín mẹvẹ́vèna sọn mí de.

²⁴ Whenẹnu wẹ yẹn klán wiawe sọn ogán yẹwhenọ lẹ tọn lẹ mẹ, yèdọ Ṣelebia, Hasabia, po ao po sọn mẹmẹsunnu etọn lẹ mẹ gọ́na yé,

²⁵ bo sọ jlẹ fataka lọ hlan yé, po sika lọ po, po nuzinzán lẹ lọ po, yèdọ avọ́ nunina lọ na ohọ́ Jiwheyẹwhe mítọn tọn lọ, he ahọlu lọ, po hónamẹtọ etọn lẹ po, po ahọvi etọn lẹ po, po Islaeli lẹpo po ko na to finẹ:

²⁶ Yèdọ yẹn jlẹ talẹnti nuọntọ̀nkandeao fataka tọn do alọ yetọn mẹ, po talẹnti kanweko nuzinzán lẹ tọn po; talẹnti kanweko sọn sika mẹ;

²⁷ po apánko òko sika tọn po, daliki fọtọ́n tọn; po nuzinzán awe gànvẹ̃ sisẹ́ dagbedagbe tọn po, akuẹgégénu di sika.

²⁸ Yẹn sọ dọ hlan yé dọmọ Wiwe wẹ mìwlẹ yín hlan OKLUNỌ, wiwe wẹ núzinzán lẹ sọ yín; fataka lọ po sika lọ po wẹ avọ́ nunina ojlonọ de hlan OKLUNỌ, Jiwheyẹwhe ọtó mítọn lẹ tọn.

²⁹ Mì ni nọ họ́, bo sọ pọ́n yé go, kaka míwlẹ do jlẹ yé to ogán yẹwhenọ lẹ tọn lẹ nukọn po Levinu lẹ po, po ahọvi owhé otọ́ Islaeli tọn lẹ tọn tọn po, to Jelusalẹm, to abò ohọ̀ OKLUNỌ tọn tọn lẹ mẹ.

³⁰ Mọwẹ yẹwhenọ lẹ lọ po Levinu lẹ lọ po mọ ojlẹ fataka lọ po sika lọ tọn po yí, po nuzinzán lẹ lọ po, nado hẹn yé wá jẹ Jelusalẹm jẹ ohó Jiwheyẹwhe mítọn tọn lọ mẹ.

³¹ Whenẹnu wẹ mí fọ́nyì sọn otò Ahava tọn lọ tó to azán wiawetọ osún tintan lọ tọn ji, nado yì jẹ Jelusalẹm: alọ Jiwheyẹwhe mítọn tọn sọ tin to mí ji, é sọ whlẹn mí sọn alọ kẹ̀ntọ lọ tọn mẹ podọ sọn owuvàtọ lẹ si to aliho.

³² Míwlẹ sọ wá je Jelusalẹm, bo sọ nò finẹ azán atọ̀n.

³³ Podọ to azán ẹnẹtọ gbè wẹ yè jlẹ fataka lọ po sika lọ po po nuzinzán lẹ lọ po to ohọ̀ Jiwheyẹwhe mítọn tọn mẹ do alọ Melemoti visunnu Ulia yẹwhenọ lọ tọn tọn mẹ; podọ Eleazali visunnu Finehasi tọn tin to e de; podọ Jozabadi visunnu Jeṣua tọn lọ, po Noadia visunnu Binnui tọn, Livinu lẹ lọ po tin to yé de;

³⁴ pete lọ gbọn osọha po jijlọ po dali: jijlẹ lẹpo lọ wẹ yè sọ wlan to ojlẹ nẹ mẹ.

³⁵ Ovi mẹglọnọ tọn lẹ lọ, he yè hẹn tọ́n wá sọn ogbéji, sọ na avọ́ nunina mimẹ̀ lẹ hlan Jiwheyẹwhe Islaeli tọn, oyìnsú wiawe na Islaeli Ìẹpo, agbò kanwefọtọ̀nnukundopo, lẹngbọvu kandegbãntọ̀nnukunawe, alunkùn wiawe na avọ́ nunina ylando de tọn: ehe lẹpo wẹ avọ́ nunina mimẹ̀ blan OKLUNỌ.

³⁶ Yé sọ na asẹ ahọlu lọ tọn lẹ hlan otògán ahọlu lọ tọn lẹ, podọ hlan otògán to otọ́ lọ gododọ̃n lẹ: yé sọ gọalọna gbẹtọ ewlẹ po ohọ́ Jiwheyẹwhe tọn lọ po.