ẸZLA 6 - BIBLU WIWE LỌ 1923

¹ WHENẸNU wẹ Daliusi ahọlu lọ basi aṣẹ de, yè sọ basi odinpọ́n to ohọ̀ tòwédotẹn lẹ tọn mẹ, fie yè bẹ́ adọkunnu lẹ pli do to Babilọni mẹ.

² Yè sọ mọ to finẹ to Akinẹta, to ohọ́nmẹ he tin to ogbeta Media tọn mẹ, otòwé de, podọ to e mẹ wẹ yè wlan dole na onúflin de.

³ To owhè tintan Kilusi ahọlu lọ tọn mẹ, Kilusi ahọlu lọ basi aṣẹ de; Gbọn ohọ́ Jiwheyẹwhe tọn to Jelusalẹm tọn lọ dali, gbọ ohọ̀ lọ ni yín didó, otẹn fie yé nọ na avọ́ nunina lẹ te, bo sọ gbọ yè ni hẹn dòdo etọn sinyẹn gbángbán; jiyìyì etọn awàgbà kandeko, po ogblo etọn po awàgbà kandeko;

⁴ Po titò zannu lẹ tọn atọ̀n po, po titò whlẹlidemẹ yọ́yọ́ tọn po: bo sọ gbọ yè ni na akuẹzinzán lẹ sọn ohọ́ ahọlu tọn lọ mẹ:

⁵ podọ ga gbọ nuzinzán sika po fataka tọn po sọn ohò Jiwheyẹwhe tọn mẹ, he Nẹbukadnẹzali bẹ́ tón sọn tẹmpli he tin to Jelusalẹm mẹ, bo hẹnwá jẹ Babilọni, ni yín gọ̀jó, bo sọ vọ́ hẹn wá jẹ tẹmpli he tin to Jelusalẹm kọ̀n, omẹ dopodopo jẹ otẹn etọn mẹ, hiẹ na sọ yí yé do ohọ̀ Jiwheyẹwhe tọn lọ mẹ.

⁶ Enẹwutu dinvie, Tatenai, otogán to otọ́ lọ gododọ̃n, Ṣẹtalibozenai, po ogbẹ́ mítọn Afalsakinu lẹ lọ po, he tin to otọ̀ lọ gododọ̃n, mì ni tin dẹn sọn finẹ.

⁷ Mì gbọ sọn azọ́n ohọ̀ Jiwheyẹwhe tọn he tọn go; sọ gbọ otògán Ju tọn lẹ po mẹho Ju lẹ tọn lẹ po ni dó ohọ́ Jiwheyẹwhe tọn he to otẹn etọn mẹ.

⁸ Humọga yẹn basi aṣẹ de núhe mìwlẹ na wà hlan mẹho Ju lẹ tọn helẹ́ na didó ohọ̀ Jiwheyẹwhe tọn he tọn; dọ sọn agbàn ahọlu tọn lọ mẹ yèdọ sọn odèkuẹ mẹ to otọ̀ lọ gododọ̃n, yè ni yí sọwhiwhe lẹpo do na kuẹzinzán lẹ hlan omẹ helẹ, dọ yè glọnalina yé blo.

⁹ Podọ enẹ he yé tindo ojlo na lẹ, oyìnsú winyanwinyan lẹ, po agbò lẹ po, po lẹngbọvu le po, na avọ́ nunina mimẹ̀ lẹ hlan Jiwheyẹwhe olọn tọn, oli, ojẹ̀, ovẹ̃n, amì, kẹdẹdi ohó yẹwhenọ he tin to Jelusalẹm lẹ tọn, gbọ yè ni to nina yé egbesọegbesọ matin awugbopò:

¹⁰ na yé nido na avọ́sánnu owán vivinọ le hlan Jiwheyẹwhe olọn tọn lọ, bo sọ hodẹ̀ na ogbẹ́ ahọlu tọn, po visunnu etọn lẹ tọn po.

¹¹ Yẹn ko sọ basi aṣẹ de ga, dọ mẹdepope he na diọ ohó he, gbọ yè ni dè whlelidemẹ tọ́n sọn ohọ̀ etọn go, bo sọ gbọ yè ni zé e daga bo whè e do e ji; bo sọ gbọ yè ni yí owhé etọn do basi ogbóji na ehe:

¹² Jiwheyẹwhe lọ he hẹn oyín etọn nado nọ̀ finẹ ni gbà ahọlu lẹ po gbẹtọ lẹpo po he na dè alọ yetọn tón nado diọ dopolọ, nado vọ̀ ohò Jiwheyẹwhe tọn lọ he tin to Jelusalẹm. Yẹn Daliusi ko basi aṣẹ de; gbọ yè ni yí wà po sọwhiwhe lẹpo po.

¹³ Whenẹnu wẹ Tatenai otògán lọ to otọ̀ lọ gododọ̃n, Sẹtah-bozẹnai, po ogbẹ́ yetọn lẹ po na Daliusi ahọlu lọ ko dowẹnhlan wutu, wà do mọkẹdẹ po sọwhiwhe lẹpo po.

¹⁴ Mẹho Ju lẹ tọn lẹ to didó bo sọ duale, gbọn didọdai Hagai yẹwhegán lọ tọn mẹ po Zekalia visunnu Iddo tọn lọ po Yé sọ dó bo vọ́ ẹ, kẹdẹdi gbèdide Jiwheyẹwhe Islaeli tọn tọn lọ, podọ kẹdẹdi asẹ Kilusi tọn, po Daliusi po, po Altakẹlikesi ahọlu Pẹlsia tọn po.

¹⁵ Yè sọ vó ohò he to azán atọ̀ntọ osùn Adali tọn ji, he tin to owhè ṣidopotọ aholudu Daliusi ahọlu lọ tọn lọ tọn mẹ.

¹⁶ Ovi Islaeli tọn lẹ, yẹwhenọ lẹ po Levinu lẹ po podọ pipòtọ sọn ovi mẹglọnọ tọn lẹ me, sọ yí ayajẹ do payi oklandowiwe ohọ́ Jiwheyẹwhe tọn he tọn go.

¹⁷ Yé sọ na nunina to oklandowiwe ohọ̀ Jiwheyẹwhe tọn he tọn kòn oyìnsú kanweko, agbò fọde, lẹngbọvu fowe; podọ na avọ́ nunina ylando de tọn na Islaeli lẹpo, alunkùn wiawe, kẹdẹdi osọha whẹndo Islaeli tọn lẹ tọn.

¹⁸ Yé sọ dè yẹwhenọ lẹ do mimátẹn yetọn lẹ mẹ, po Levinu lẹ po do okànta yetọn lẹ mẹ, na sinsẹ̀n Jiwheyẹwhe tọn lọ, he tin to Jelusalẹm; dile yè wlan ẹn do to owé Moṣe tọn mẹ.

¹⁹ Ovi mẹglọnọ tọn lẹ sọ payi ojuwayi lọ go to azán kònukunẹnetọ osùn tintan tọn ji.

²⁰ Na yẹwhenọ le po Levinu lẹ po ko lè yéde wé dopọ; popo yé tọn sọ yín wiwe: yé sọ hù ojuwayi lọ na ovi meglọnọ tọn lepo podọ na mẹmẹsunnu yetọn yẹwheno lẹ lọ, podọ na yéde.

²¹ Podọ ovi Islaeli tọn lẹ, he yè sọ vọ́ hẹn tón wá sọn mẹglọnọ mẹ lẹ, podọ popo mọnkọ lẹ he ko klán yéde dovò hlan yé de sọn odihó okosi aigba lọ tọn lọ tọn mẹ lẹ nado to OKLUNỌ din, Jiwheyẹwhe Islaeli tọn lọ, wẹ dù,

²² bo sọ payi hùnwhẹ akla madotọ́n tọn lọ go azán ṣinawe po ayajẹ po: na OKLUNỌ ko basi yé ayajẹnọ, bo ko sọ ló ayiha ahọlu Asilia tọn tọn hlan yé de, nado nahuhlọn alọ yetọn lẹ to azón ohọ̀ Jiwheyẹwhe tọn tọn lọ mẹ, Jiwheyẹwhe Islaeli tọn lọ.