ẸZLA 3 - BIBLU WIWE LỌ 1923

¹ WHENUENA yè hẹn osùn sinawetọ lọ wá, bọ ovi Islaeli tọn lẹ tin to tòdaho lẹ mẹ, gbẹtọ lẹ bẹ́ yéde plidopọ di gbẹtọ dopo do Jelusalẹm.

² Whenẹnu wẹ Jeṣua visunnu Jozadaki tọn tite, po mẹmẹsunnu etọn yẹwhenọ lẹ po, po Zelubabẹli visunnu Ẹealtiẹlì tọn po, po mẹmẹsunnu etọn lẹ po, bo dó agbà Jiwheyẹwhe Islaeli tọn tọn lọ, nado nọ na avọ́ nunina mimẹ̀ lẹ to e ji, dile yè wlan ẹn do to osẹ́n Mọse omẹ Jiwheyẹwhe tọn tọn lọ mẹ.

³ Yé sọ zé agbà lọ do pòtin etọn ji; na obu tin to yé ji na omẹ otò lẹ lọ tọn lẹ tọn wutu: yé sọ na avọ́ nunina mimẹ̀ lẹ to e ji hlan OKLUNỌ, yèdọ avọ́ nunina mimẹ̀ afọnnu po whèjai po tọn lẹ.

⁴ Yé sọ payi hùnwhẹ gohọ̀túntún lẹ tọn go, dile yè wlan do, bo sọ na avọ̀ nunina mimẹ̀ egbesọegbesọ tọn lẹ gbọn osọha dali, kẹdẹdi ogbèdai lọ, dile sinsẹnzón azán dopodopo tọn biọ do;

⁵ to enẹgodo avọ́ nunina mimẹ̀ whẹ whẹ tọn, po avọ́ nunina osùn yọ́yọ́ lẹ tọn lẹ po, podọ sọn hùnwhẹ dido OKLUNỌ tọn he yè hẹnzùnwiwe lẹpo mẹ, podọ son omẹ dopodopo mẹ he yí ojlo do na avọ́ nunina ojlonọ de hlan OKLUNỌ.

⁶ Sọn azán tintan osùn ṣinawetọ tọn me wẹ yé sọ́ nado na nunina mimẹ̀ lẹ hlan OKLUNỌ: ṣigba yè ma ko do dòdo tẹmpli OKLUNỌ tọn tọn ai gba.

⁷ Yé na akuẹ hlan họ̀dótọ lẹ ga, podọ hlan atinpatọ lẹ; po núdùdù po, po núnùnù po, po amì po, hlan yé Zidọni tọn lẹ, podọ hlan yé Tile tọn lẹ, nado hẹn atin kedali lẹ sọn Lẹbanọni mẹ wá jẹ ohù tó, jẹ Jọpa kẹdẹdi aṣẹ he yé tindo sọn Kilusi ahọlu Pẹlsia tọn de.

⁸ Dinvie to owhè awetọ wiwá jẹ ohọ̀ Jiwheyẹwhe tọn lọ mẹ yetọn tọn, to Jelusalẹm, to osùn awetọ mẹ, wẹ Zelubabẹli visunnu Sealtiẹli tọn lẹ ṣẹ̀, po Jeṣua visunnu Jozadaki tọn lọ po, po pipòtọ mẹmẹsunnu yetọn yẹwhenọ lẹ po, po Levinu lẹ po, po yé he yè hẹn sọn mẹglọnọ mẹ wá jẹ Jelusalẹm lẹpo po; bo sọ dè Levinu lẹ, sọn owhè òko mẹho lẹ mẹ podọ yìaga, nado tindo nugopọ́n azọ́n ohọ́ OKLUNỌ tọn lọ tọn.

⁹ Whenẹnu wẹ Joṣua po visunnu eton lẹ po po mẹmẹsunnu etọn lẹ po, Kadiniẹli po visunnu etọn lẹ po, visunnu Juda tọn lọ, di dopo site, nado tindo nugopón azọ́ntọ lẹ tọn to ohò Jiwheyẹwhe tọn lọ mẹ: visunnu Hẹnadadi tọn lẹ, po visunnu yetọn lẹ po po mẹmẹsunnu yetọn Levinu lẹ po.

¹⁰ Whenuena didótọ lẹ do dòdo tẹmpli OKLUNỌ tọn lọ tọn ai, yé tò yẹwhenọ lẹ to awù yetọn lẹ mẹ po opẹn lẹ po, po Levinu visunnu Asafi ton lẹ lọ po, po ajogàn lẹ po, nado pà OKLUNỌ, kẹdẹdi titò Davidi ahọlu Islaeli tọn tọn lọ.

¹¹ Yé sọ to hànji omẹ de hlan awetọ to pipà mẹ, podọ to opẹ́ lẹ nina hlan OKLUNỌ mẹ, dọmọ, Na dagbe wẹ ewọ, na lẹblanu etọn tote doidoi hlan Islaeli dali. Gbẹtọ lẹpo sọ yí ogbè lélé de do dabóbó whenuena yé to OKLUNỌ pà, na yè do dòdo ohọ̀ OKLUNỌ tọn lọ tọn wutu.

¹² Ṣigba susu sọn yẹwhenọ lẹ mẹ po Levinu lẹ po, po nukọntọ owhé otọ́ lẹ tọn lẹ po, omẹ hóhó tọn lẹ he ko mọ ohọ̀ tintan lọ, whenuena yè do dòdo ohọ̀ he tọn ai to nukun yetọn lẹ nukọn, yí ogbè lélé de do viavi; susu sọ to abóbódo na ayajẹ:

¹³ sọmọ bọ gbẹtọ lẹ ma do sọgan yọ́n awhá abóbó ayajẹ tọn lọ tọn sọn awhá avivivi gbẹtọ lẹ tọn lọ ton mẹ: na gbẹtọ lẹ yí awhá daho de do to abóbódo, yè sọ sè linlin lọ to aganu boboe.