ẸZLA 1 - BIBLU WIWE LỌ 1923

¹ DINVIE to owhè tintan Kilusi ahọlu Pẹlsia tọn tọn mẹ, na ohó OKLUNỌ tọn gbọn onù Jẹlemia tọn mẹ yè nido hẹn di, OKLUNỌ fọ́n gbigbọ Kilusi ahọlu Pẹlsia tọn tọn daga, bọ é do basi mìsẽlu de lédo ahọludu etọn lẹpo pó, bo sọ yí ì do owéwlan mẹ ga, dọmọ,

² Le wẹ Kilusi ahọlu Pẹlsia tọn dọ, dọmọ, Ahọludu aigba tọn lẹpo wẹ OKLUNỌ, Jiwheyẹwhe olọn tọn, na mì; é ko sọ naṣẹ mi nado dó ohọ̀ de nẹ̃ to Jelusalẹm mẹ, he tin to Juda mẹ.

³ Mẹdepope tin finẹ to mì ṣẹnṣẹn sọn omẹ etọn lẹpo mẹ, Jiwheyẹwhe etọn ni tin po e po, bo sọ gbọ é ni hẹji yì jẹ Jelusalẹm, he tin to Juda mẹ, bo dó ohò OKLUNỌ tọn lọ, Jiwheyẹwhe Islaeli tọn, (ewọ wẹ Jiwheyẹwhe,) he tin to Jelusalẹm mẹ.

⁴ Podọ mẹdepope yè pòdai, to otẹn depope mẹ fie é wáwáṣi te, gbọ omẹ otẹn etọn tọn lẹ ni yí fataka do gọalọ nẹ̃, po sika po, po agbàn lẹ po, po okanlin lẹ po, gọ́na avọ́ nunina ojlonọ na ohọ̀ Jiwheyẹwhe tọn lọ he tin to Jelusalẹm mẹ.

⁵ Whenẹnu wẹ nukọntọ owhé otọ́ Judapo Bẹnjamini po tọn lẹ tọn tọn lẹ, po yẹwhenọ lẹ po, po Levinu lẹ po, yèdọ gbigbọ mẹhetọn Jiwheyẹwhe fọ́n lẹpo nado hẹji yì nado dó ohọ̀ OKLUNỌ tọn lọ he tin to Jelusalẹm mẹ

⁶ Yé he tin lẹ́do yé lẹpo sọ yí nuzinzán fataka tọn lẹ, po sika po, po agbàn lẹ po, po okanlin lẹ po, po onú akuẹgégénu lẹ po, do nahublọn alọ yetọn lẹ, gọ́na ehe yè yí ojlo do na lẹpo.

⁷ Kilusi ahọlu lọ ga hẹn nuzinzán ohò OKLUNỌ tọn tọn lẹ wá, he Nẹbukadnẹzali ko hẹn tọ́n sọn Jelusalẹm mẹ, bé ko bó yé do ohọ̀ yẹwhe etọn lẹ tọn mẹ;

⁸ Yèdọ enẹlẹ wẹ Kilusi ahọlu Pẹlsia tọn bẹ́ tọ́n gbọn alọ Metleda kuẹyíhẹntọ lọ tọn mẹ, bo sọ hia yé hlan Ṣẹṣibazali, ahọvi Juda tọn lọ.

⁹ Ehe sọ wẹ osọha yé tọn: agbánvla sika tọn ogbàn, agbánvla fataka tọn fọtọ́n dopo, ohi kòatọ̀nnukunenẹ;

¹⁰ kọfo sika tọn ogbàn, kọfo fataka tọn hunkọ awetọ tọn de fowe po ao po, po nuzinzán devo le po fọtọ́n dopo.

¹¹ Nuzinzán sika tọn lepo po fataka tọn lẹ po yín fọtọ́n atọ́n po fowe po.

¹² Ehe lẹpo wẹ Ṣẹṣibazali hẹn hẹji wá whenuena yè hẹn yé mẹglọnọ tọn lẹ hẹji sọn Babilọni wá jẹ Jelusalẹm.