EZEKIELI 5 - BIBLU WIWE LỌ 1923

¹ Podọ hiẹ, visunnu gbẹtọ tọn, yí ohi dida de na dewe, di odalunhi odapàtọ de tọn wẹ hiẹ na yí i hlan we, bo na sọ hẹn ẹn nado gbọn ota towe ji podọ gbọn agbakọ towe ji: whenẹnu bo yí na we nujlẹnu lẹ nado jlẹ, bo má yé.

² Odá atọ̀ntọ wẹ hiẹ na mè to miyọn mẹ to gblagbla tòdaho lọ tọn mẹ, whenuena yè hẹn azán oglọndo lọ tọn pé; podọ hiẹ na sọ yí odá otòntọ de, bo yí ohi do hò lédo e pé; podọ odá atọ̀ntọ de wẹ hiẹ na vúnvún hlan ojẹhọn mẹ, yẹn na sọ dòn ohi de jẹgbonu hodo ye.

³ Hiẹ na sọ yi vude sọnfinẹ to osọha mẹ, bo sìn yé do avọ̀tónu towe lẹ mẹ.

⁴ Podọ ehelẹ mẹ wẹ hiẹ na sọ vó yí sọn, bo zé yé dlan biọ gblagbla miyọn lọ tọn mẹ, bo mẹ yé to mìyọn lọ mẹ; finẹ wẹ miyọn de na jẹgbonu wá biọ owhé Islaeli tọn lẹpo gbè.

⁵ Le wẹ OKLUNỌ JIWHEYẸWHE dọ: Ehe wẹ Jelusalẹm: Yẹn ko zé e do gblagbla akọta lẹ tọn mẹ, bọ otò lẹ tin lédo ewọ pé.

⁶ Bọ ewọ ko sọ diọ whẹ̀dida ṣie lẹ do yìnylan mẹ hugan akọta lẹ, podọ do oséndoai ṣie lẹ go hugan otò he tin lédo ewọ pé lẹ: na yé ko gbẹ́ whẹ̀dida ṣie lẹ dai, podọ na oséndoai ṣie lẹ tọn, yé ma ko zinzọnlin to yé mẹ gba.

⁷ Enẹwutu le wẹ OKLUNỌ JIWHEYẸWHE dọ: Na mìwlẹ yín tukladomẹtọ hugan akọta he tin lédo mì pé lẹ wutu, bo ma ko sọ zinzọnlin to oséndoai ṣie lẹ mẹ, bo ma ko sọ yìn whẹ̀dida ṣie lẹ, bo ma ko sọ wà hodo whẹ̀dida akọta he tin lédo mì pé lẹ gba;

⁸ enẹwutu le wẹ OKLUNỌ JIWHEYẸWHE dọ: Dayi e go, Yẹn, yèdọ Yẹn, tin agọ̀ do ogo we; yẹn na sọ hẹn whẹdìdà le sẹ to gblagbla towe mẹ to nukun akọta lẹ tọn mẹ.

⁹ Yẹn na sọ wà to hiẹ mẹ enẹ he yẹn ma ko wà, podọ hlan ehe yẹn ma sọ to na wà di mọnko ba, na osùnú towe lẹpo lẹ tọn wutu.

¹⁰ Enẹwutu otọ́ lẹ na dù visunnu lẹ to gblagbla towe mẹ, visunnu lẹ na sọ dù otọ́ yetọn lẹ; yẹn na sọ hẹn whẹ̀dida lẹ sẹ to hiẹ mẹ, podọ pipòtọ pete sọn hiẹ mẹ lẹ wẹ yẹn na vunvún hlan o jẹhọn lẹpo mẹ

¹¹ Enẹwutu, le yẹn togbẹ, wẹ OKLUNỌ JIWHEYẸWHE dọ, nugbonugbo, na hiẹ ko yí onú hiọawu towe lẹpo, po osùnú towe lẹpo po do flu fiwiwe ṣie wutu, enẹwutu wẹ yẹn ga na sán we liai; mọ nukun ṣie ma na hladai, yẹn ga ma na tindo awublanamẹ de.

¹² Oda atọ̀ntọ de sọn hiẹ mẹ na kú po azònylankan lọ po, podọ ohùvé wẹ yè na do và yé súdo to gblagbla towe mẹ; podọ odá atọ̀ntọ de na sọ jai gbọn ohi lọ dali lédo we pé; podọ odá atọ̀ntọ 1 de wẹ yẹn na sọ vúnvún hlan ojéhọn lepo mẹ, bo na sọ dòn ohi de jẹgbonu hodo yé.

¹³ Le we yè na hẹn adi ṣie sẹ do, yẹn na sọ hẹn homẹwlu ṣie wá yé ji, yẹn na sọ yin homẹmiọnnọ: yé na sọ yọnẹn dọ yẹn OKLUNỌ ko dọhó to vivẹnu ṣie mẹ, whenuena yẹn ko hẹn homẹwlu ṣie wá yé ji.

¹⁴ Humọ yẹn na hẹn we zùn ovójẹ de po ovlẹ de po, to akọta he tin lédo we pé lẹ ṣẹnṣẹn, to nukun mẹhe juwájei lẹpo tọn mẹ.

¹⁵ Mọwẹ é na sọ yín ovlẹ de po mẹkiko de po, oplọ́n de po awujiji de po, hlan akọta he tin lẹ́do we pé lẹ, whenuena yẹn na hẹn whẹ̀dida lẹ ṣe to hiẹ mẹ to adi mẹ podọ to homẹwlu mẹ, podọ to owọhẹ ofìẹnọ lẹ mẹ: yẹn OKLUNỌ wẹ ko dọ ẹ:

¹⁶ whenuena yẹn na do ogá ylankan ohùvé tọn lẹ hlan yé ji, he tin na vivà, he yẹn na dohlan nado và mì súdo; bọ yẹn na sọ hẹn ohùvé lọ sudeji to mì ji, bo na wón opò mitọn akla tọn;

¹⁷ bọ yẹn na sọ do ohùvé po gbékanlin ylankan lẹ po hlan mì ji, bọ yé na sọ fò mì yì; bọ azònylankan po ohùn po na sọ gbọn de we luntọ́n; bọ yẹn na sọ hẹn ohi wa oji we: Yẹn OKLUNỌ wẹ ko dọ ẹ.