EZEKIELI 4 - BIBLU WIWE LỌ 1923

¹ HIẸ ga, visunnu gbẹtọ tọn, yí agbán yè do nọ gbáhò de na dewe, bo yí i do nukọn towe, bo basi ojlẹmọ tòdaho de tọn do e ji, yèdọ Jelusalẹm:

² bo basi oglọndo do oji nẹ̃, bo dó agbó lẹ do oji nẹ̃, bo dó okiti de daga do oji nẹ; do osla lẹ ga do oji nẹ, bo sọ tùn agbòvùn lẹ lédo e pé.

³ Bo sọ yí agbán vla ogànyu tọn de hlan we, bo zé e do na adó ogànyu tọn de do hiẹ po tòdaho lọ po ṣẹnṣẹn: bo zé nukunmẹ towe hlan e dali, é bo na sọ yín oglọndo, hiẹ na sọ zé glọndo do e ji. Ehe na yín ohia de hlan owhé Islaeli tọn.

⁴ Humọ hiẹ na mlọn adà amiyọn tọn towe ji, bo sọ té oylanwà owhé Islaeli tọn tọn do e ji: kẹdẹdi osọha azán he hiẹ na do mlọn e ji, hiẹ na hẹn oylanwà yetọn.

⁵ Na yẹn ko dè owhè oylanwà yetọn lẹ tọn nado yín hlan we osọha azán lẹ tọn de, yèdọ azán fọdekẹnnẹgbàn: mọwẹ hiẹ na hẹn oylanwà owhe Islaeli tọn tọn.

⁶ Podọ, whenuena hiẹ ko hẹn ehelẹ ṣẹ, hiẹ na sọ mlọn adà adusi towe tọn ji, bo na sọ hẹn oylanwà owhé Juda tọn tọn: azán kande, azán dopodòpo na owhè de, wẹ yẹn ko do dè e hlan we.

⁷ Hiẹ na sọ zé nukunmẹ towe hlan glọndo Jelusalẹm tọn dali, po awà towe po maṣinyọnnudo; hiẹ na sọ dọdọdai do e go.

⁸ Bo, dayi e go, yẹn zé mẹsíngàn lẹ do oji we, podọ hiẹ ma na lẹ́ dèwe sọn adà de ji hlan awetọ ji, kaka hiẹ ko do hẹn azán oglọndo towe tọn lẹ sẹ

⁹ Hiẹ ni yí oli hlan dewe de ga, po ayòlikún po, po aivi lẹ po, po lẹntile lẹ po, po milẹti po, po apada po, bo bẹ́ yé do núzinzán dopo mẹ, bo do basi akla etọn na dewe; kẹdẹdi osọha azán lẹ tọn he hiẹ na do mlọn adà towe ji, yèdọ azán fọdekẹn nẹgbàn wẹ hiẹ na dù sọn e mẹ.

¹⁰ Podọ núdùdù towe he hiẹ na nọ dù na tin gbọn jlẹnú dali, ṣẹkle oko gbèdopo: sọn ojlẹ de jẹ ojlẹ de wẹ hiẹ na nọ dù i.

¹¹ Podọ hiẹ na sọ nọ nù osìn gbọn jijlẹ dali, odá Bidopotọ hinni de tọn: sọn ojlẹ de jẹ ojlẹ de wẹ hiẹ na nọ nù.

¹² Hiẹ na sọ nọ dù! di aklahihi oli tọn lẹ, hiẹ na sọ yí omí he sọn gbẹtọ homẹ do sò ẹ to nukun yetọn mẹ.

¹³ OKLUNỌ sọ dọmọ Yèdọ le wẹ ovi Islaeli tọn lẹ na dù akla yetọn mawé, to akọta lẹ ṣẹnṣẹn to fiedali yẹn na yan yé hlan.

¹⁴ Whenẹnu wẹ yẹn dọmọ, Ah OKLUNỌ JIWHEYẸWHE! dayi e go, dọ alindọn ṣie ma ko yín hinhẹnflu gba: na sọn ovú ṣie wá yèdọ kakajẹ dinvie yẹn ma ko dù sọn enẹ he kú sọn ede si tọn mẹ, kavi yè dòntlẹn sọn gbékanlin lẹ de; mọ olàn osùnúnọ de ma biọ onù ṣie mẹ wá.

¹⁵ Whenẹnu wẹ ewọ dọ hlan mi dọ, Pọ́n, Yẹn ko na omí oyín tọn we na omí gbẹtọ tọn, hiẹ na sọ wleawu akla towe tọn to enẹji.

¹⁶ Humọ ewọ sọ dọ hlan mì dọ, Visunnu gbẹtọ tọn, dayi e go, Yẹn na wén opò akla tọn to Jelusalẹm mẹ: Yé na sọ nọ dù akla gbọn ojlẹnu dali, podọ po tuklajẹ po; yé na sọ nọ nù osìn gbọn jijlẹ dali, podọ po awujiji po:

¹⁷ na yé nido bà akla po osìn po pò, bo sọ yín awujino ode po awetọ po, bo sọ sakọnyìngbe to oylanwà yetọn mẹ.